ສຸກອາພອນ ຄວ້າລາງວັນປະຕູດີເດັ່ນ ໄທລີກ ປະຈຳເດືອນເມສາ

495 20 ພ.ພ. 2019 ວົງຈອນກີລາ
ສຸກອາພອນ ຄວ້າລາງວັນປະຕູດີເດັ່ນ ໄທລີກ ປະຈຳເດືອນເມສາ

    ເຟດ​ບຸກ​ຂອງ​ການ​ແຂ່ງ­ຂັນ​ໂຕ​ໂຢ​ຕ້າ ໄທ​ລີກ ປະ­ຈຳ​ປີ 2019 ໃຫ້​ຮູ້​ວ່າ: ໃນ​ຕົ້ນ​ເດືອນ​ເມ­ສາ ຜ່ານ​ມາ ສຸກ​ອາ­ພອນ ວົງ​ຈຽງ​ຄຳ ກອງ​ໜ້າ​ທີມ​ຊາດ​ລາວ ຂອງ​ສະ­ໂມ­ສອນ ໄຊ​ນາກ ຮອນ​ບິ​ລ ຍິງ​ປະ­ຕູ​ໃສ່ ເມືອງ​ທອງ ຢູ​ໄນ​ເຕັດ ທີມ​ລະ­ດັບ​ແຖວ​ໜ້າ​ຂອງ​ໄທ ພາ​ຕົ້ນ​ສັງ­ກັດ ເອົາ​ຊະ­ນະ ເມືອງ​ທອງ 3-0 ປະ­ຕູ ການ​ແຂ່ງ­ຂັນ​ບານ­ເຕະ ໂຕ​ໂຢ​ຕ້າ ໄທ​ລີກ ປະ­ຈຳ​ປີ 2019 ນັດ​ທີ 6 ປະ­ຈຳ​ວັນ​ທີ 3 ເມ­ສາ ແລະ ເປັນ​ປະ­ຕູ​ທຳ​ອິດ​ຂອງ ສຸກ​ອາ­ພອນ ວົງ​ຈຽງ​ຄຳ.

    ວັນ​ທີ 16 ພຶດ­ສະ­ພາ ຜ່ານ​ມາ ເຟ​ສ​ບຸກ​ທາງ​ຂອງ ໄທ​ລີກ ໄດ້​ປະ­ກາດ​ປະ­ຕູ​ໂດດ​ເດັ່ນ​ປະ­ຈຳ​ເດືອນ​ເມ­ສາ 2019 ຈາກ​ການ​ໂຫວດ​ຂອງ​ແຟນ​ບານ​ຊາວ​ໄທ ໄດ້​ໃຫ້​ຄະ­ແນນ​ປະ­ຕູ​ຂອງ ສຸ​ຂະ​ພອນ ວົງ​ຈຽງ​ຄຳ ເປັນ​ປະ­ຕູ​ດີ­ເດັ່ນ​ປະ­ຈຳ​ເດືອນ​ເມ­ສາ ເຊິ່ງ​ປະ­ຕູ​ດັ່ງ­ກ່າວ​ເກີດ​ຂຶ້ນ​ໃນ​ເຄິ່ງ​ເວ­ລາ​ທີ 2 ຫຼັງ​ຈາກ​ທີ່ ໄຊ​ນາກ ນຳ​ຢູ 2-0 ປະ­ຕູ ສຸກ​ອາ­ພອນ ຍິງ​ປິດ​ທ້າຍ​ສຸດ​ງາມ ຊ່ວຍ​ໃຫ້ ໄຊ​ນາກ ເກັບ 3 ຄະ­ແນນ​ນັດ​ທຳ​ອິດ ໃນ​ນັດ​ນັ້ນ.

    ສຸກ​ອາ­ພອນ ວົງ​ຈຽງ​ຄຳ ເກີດ​ວັນ​ທີ 9 ມີ­ນາ 1992 ຢູ່​ແຂວງ​ຈຳ­ປາ​ສັກ ສປປ ລາວ ຜ່ານ​ມາ​ເຄີຍ​ຫຼິ້ນ​ໃຫ້​ສະ­ໂມ­ສອນ ເອ​ສຣາ (ສປປ ລາວ) ສະ­ໂມ­ສອນ ບີ​ອີ​ຊີ ເທ​ໂຣ ສະ­ໂມ­ສອນ ກຣະ​ບີ່ ສະ­ໂມ­ສອນ ພິດ​ສະ​ນຸ​ໂລກ ແລະ ສະ­ໂມ­ສອນ ສະ​ຣະ​ບູ​ຣີ (ປະ­ເທດ​ໄທ) ກ່ອນ​ຈະ​ມາ​ຫຼິ້ນ​ໃຫ້​ສະ­ໂມ­ສອນ ລ້ານ​ຊ້າງ ຢູ​ໄນ​ເຕັດ (ສປປ ລາວ) ແລະ ພາ​ທີມ​ຄວ້າ​ແຊັມ ລາວ ພຣີ​ເມຍ​ລີກ ປີ 2016 ແລະ ຮອງ​ແຊັມ​ບານ­ເຕະ ໂຕ​ໂຢ​ຕ້າ ແມ່​ຂອງ​ຄັບ ປີ 2016 ຈາກ​ນັ້ນ​ລ້ານ​ຊ້າງ ກໍ​ໄດ້​ຍຸບ​ທີມ ສຸກ​ອາ­ພອນ ຈຶ່ງ​ຕັດ­ສິນ​ໃຈ​ໄປ​ຫຼິ້ນ​ໃຫ້​ສະ­ໂມ­ສອນ ສີ­ສະ​ເກດ ເອັຟ​ຊີ (ປະ­ເທດ​ໄທ) ປີ 2018 ແລະ ສ້າງ​ຜົນ­ງານ​ໃຫ້​ຕົ້ນ​ສັງ­ກັດ​ໃໝ່ ສະ­ໂມ­ສອນ ໄຊ​ນາກ ຮອບ​ບິ​ລ ໃນ​ໄທ​ລີກ ຢູ່​ອັນ​ດັບ​ທີ 12 ຈາກ 16 ສະ­ໂມ­ສອນ ເຂົ້າ​ຮ່ວມ ຫຼັງ​ຈາກ​ລົງ​ສະ­ໜາມ 10 ນັດ ຊະ­ນະ 2 ນັດ ສະ­ເໝີ 4 ນັດ ແລະ ເສຍ 4 ນັດ ມີ 10 ຄະ­ແນນ.

ຂ່າວທີ່ກ່ຽວຂ້ອງ