ເລັ່ງອະນາໄມຮ່ອງລະບາຍນ້ຳ ແກ້ໄຂບັນຫານ້ຳຖ້ວມ

445 20 ພ.ພ. 2019 ຂ່າວໜ້າ​ໜຶ່ງ
ເລັ່ງອະນາໄມຮ່ອງລະບາຍນ້ຳ ແກ້ໄຂບັນຫານ້ຳຖ້ວມ

    ນະ­ຄອນ­ຫຼວງ​ວຽງ​ຈັນ (ນວ) ເປັນ​ຕົວ​ເມືອງ​ເອກ​ຂອງ​ປະ­ເທດ​ລາວ ເປັນ​ສູນ​ລວມ​ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ມີ​ສຳ­ນັກ­ງານ​ອົງ­ການ ແລະ ການ​ພົວ­ພັນ​ພາຍ​ໃນ ແລະ ຕ່າງ­ປະ­ເທດ ການ​ຢູ່​ອາ­ໄສ​ຂອງ​ພົນ­ລະ­ເມືອງ​ມີ​ຄວາມ​ໜາ​ແໜ້ນ ເຮັດ​ໃຫ້ ນວ ມີ​ການ​ພັດ­ທະ­ນາ​ໄວ​ຢ່າງ​ກ້າວ​ກະ­ໂດດ ເປັນ­ຕົ້ນ ພື້ນ­ຖານ​ໂຄງ​ລ່າງ ຖະ­ໜົນ​ຫົນ­ທາງ ອາ­ຄານ​ສຳ­ນັກ­ງານ ຫົວ­ໜ່ວຍ​ທຸ­ລະ​ກິດ ແລະ ເຮືອນ​ປະ­ຊາ­ຊົນ ຄຽງ​ຄູ່​ກັບ​ການ​ພັດ­ທະ­ນາ​ນັ້ນ ປັດ­ຈຸ­ບັນ ນວ ກຳ­ລັງ​ພົບ​ບັນ­ຫາ​ການ​ລະ­ບາຍ​ນ້ຳ​ອອກ​ຈາກ​ຕົວ​ເມືອງ​ບໍ່​ທັນ ໂດຍ​ສະ­ເພາະ ເວ­ລາ​ຝົນ­ຕົກ​ແຮງ.

    ທ່ານ ບຸ​ຜາ ໂພນ​ສີ­ມາ ຫົວ­ໜ້າ​ຂະ­ແໜງ​ຄຸ້ມ​ຄອງ​ຮ່ອງ​ລະ­ບາຍ​ນ້ຳ ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ໃຫ້​ສຳ­ພາດ​ວັນ​ທີ 16 ພຶດ­ສະ­ພາ 2019 ວ່າ: ຂະ­ແໜງ​ຄຸ້ມ​ຄອງ​ຮ່ອງ​ລະ­ບາຍ​ນ້ຳ​ແຕ່ງ­ຕັ້ງ​ທີມ​ງານ​ລົງ​ປະ­ຈຳ​ຢູ່​ແຕ່​ລະ​ເມືອງ ເພື່ອ​ສົມ­ທົບ​ກັບ ຄບຕ ເມືອງ ແລະ ບ້ານ ເຝົ້າ​ລະ­ວັງ​ຈຸດ​ທີ່​ມີ​ບັນ­ຫາ​ນ້ຳ​ຖ້ວມ​ທຸກ​ປີ ໂດຍ​ໄດ້​ຂຶ້ນ​ແຜນ​ງົບ­ປະ­ມານ​ເພື່ອ​ລວງ​ຮ່ອງ​ລະ­ບາຍ​ນ້ຳ​ແຄມ​ທາງ ແລະ ຮ່ອງ­ນ້ຳ​ສາຍ​ຫຼັກ​ຈຸດ​ທີ່​ມີ​ບັນ­ຫາ ນອກ​ນີ້ ຍັງ​ໄດ້​ສົມ­ທົບ​ກັບ​ຫຼາຍ​ພາກ­ສ່ວນ​ແກ້​ໄຂ​ໄລ­ຍະ​ຍາວ ເປັນ­ຕົ້ນ ຈຸດ​ໄຟ​ອຳ­ນາດ​ທາດ­ຫຼວງ ເສັ້ນ­ທາງ​ໂພນ​ຕ້ອງ ແລະ ໂພນ​ສີ​ນວນ ເຊິ່ງ​ຈຸດ​ບ້ານ​ໂພນ​ສີ​ນວນ​ເຂດ​ສູນ​ບໍ­ລິ­ສັດ​ໂຄ​ລາວ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ໄດ້​ວາງ​ທໍ່​ໃໝ່ ຄາດ​ວ່າ​ຈະ​ສາ­ມາດ​ແກ້​ໄຂ​ບັນ­ຫາ​ນ້ຳ​ຖ້ວມ​ເຂດ​ດັ່ງ­ກ່າວ​ໄດ້ ແຕ່​ຈຸດ​ໄຟ​ອຳ­ນາດ​ທາດ­ຫຼວງ​ຍັງ​ຈະ​ໄດ້​ແກ້​ໄຂ​ໃນ­ຕໍ່­ໜ້າ (ລໍ­ຖ້າ​ງົບ) ສາ­ເຫດ​ທີ່​ນ້ຳ​ຖ້ວມ ຍ້ອນ​ນ້ຳ​ໄຫຼ​ບໍ່​ທັນ​ເວ­ລາ​ຝົນ­ຕົກ​ແຮງ (ລະ­ບົບ​ທໍ່​ນ້ອຍ) ຍ້ອນ​ການ​ພັດ­ທະ­ນາ​ຫຼາຍ​ພື້ນ​ທີ່​ອ້ອມ​ຂ້າງ​ໄດ້​ມີ​ການ​ເທ​ເບ​ຕົງ ເຮັດ​ໃຫ້­ການ​ໄຫຼ​ຊຶມ​ນ້ຳ​ລົງ​ດິນ​ບໍ່​ໄດ້ ຈຶ່ງ​ເຮັດ​ໃຫ້​ນ້ຳ​ໄຫຼ​ໄວ ແລ້ວ­ໄປ​ອັ່ງ​ຢູ່​ຈຸດ​ເຕົ້າ­ໂຮມ​ທີ່​ເປັນ​ບ່ອນ​ຕ່ຳ 2-3 ຊົ່ວ­ໂມງ.

    ສຳ­ລັບ​ການ​ແກ້​ໄຂ​ໄລ­ຍະ​ສັ້ນ ພວກ​ເຮົາ​ໄດ້​ແຕ່ງ­ຕັ້ງ​ກອງ​ຕະ­ລຸມ­ບອນ ກຽມ­ພ້ອມ​ເວ­ລາ​ຝົນ­ຕົກ​ນ້ຳ​ຂັງ​ອັ່ງ ກໍ​ໄດ້​ລົງ​ໄປ​ເອົາ​ສິ່ງ​ອຸດ​ຕັນ​ທີ່​ຕິດ​ຄ້າງ​ຢູ່​ປາກ​ທໍ່​ອອກ ເພື່ອ​ໃຫ້​ນ້ຳ​ໄຫຼ​ສະ­ດວກ ໂດຍ​ໄດ້​ຮັບ​ການ​ຊີ້​ນຳ​ຈາກ​ຂັ້ນ​ເທິງ ແລະ ການ​ຮ່ວມ​ມື​ຈາກ​ຫຼາຍ​ພາກ­ສ່ວນ ພ້ອມ​ທັງ​ມີ​ງົບ­ປະ­ມານ​ຈຳ­ນວນ​ໜຶ່ງ ເພື່ອ​ອະ­ນາ­ໄມ​ຮ່ອງ​ລະ­ບາຍ​ນ້ຳ​ແຕ່​ລະ​ປີ ແຕ່​ກໍ​ບໍ່​ທົ່ວ​ເຖິງ​ຍ້ອນ​ງົບ­ປະ­ມານ​ມີ​ຈຳ­ກັດ ຈຶ່ງ​ໄດ້​ແກ້​ໄຂ​ບາງ​ຈຸດ​ທີ່​ຫຼໍ່​ແຫຼມ ຫຼາຍ​ຮ່ອງ​ຍັງ​ບໍ່​ໄດ້​ອະ­ນາ­ໄມ ແລະ ພື້ນ​ທີ່​ບຶງ​ທາດ­ຫຼວງ​ກັບ​ປາກ​ທໍ່​ລະ­ບາຍ​ນ້ຳ​ຫ່າງ​ກັນ​ພຽງ​ແຕ່ 1 ແມັດ ເຮັດ​ໃຫ້​ນ້ຳ​ໄຫຼ​ຈາກ​ຕົວ​ເມືອງ​ລົງ​ຄອງ​ບຶງ​ທາດ­ຫຼວງ​ຊ້າ ການ​ລວງ​ຄອງ​ລະ­ບາຍ​ນ້ຳ​ບຶງ​ທາດ­ຫຼວງ ບາງ​ຈຸດ​ມີ​ຄູ​ຕັນ​ສາຍ​ນ້ຳ ເຊິ່ງ​ຕ້ອງ​ໄດ້​ລົງ​ແກ້​ໄຂ​ໃຫ້​ສຳ­ເລັດ ແລະ ການ​ລວງ​ຄອງ​ຈຸດ​ຫຼໍ່​ແຫຼມ ຈະ​ໃຫ້​ສຳ­ເລັດ​ພາຍ​ໃນ​ເດືອນ​ມິ­ຖຸ­ນາ 2019 ໂດຍ​ໃຊ້​ແຮງ​ງານ​ຄົນ ແລະ ກົນ​ຈັກ ເນື່ອງ​ຈາກ​ຮ່ອງ​ລະ­ບາຍ​ນ້ຳ​ມີ​ຕະ​ກອນ​ຫຼາຍ ໃນ​ໄລ­ຍະ​ຜ່ານ​ມາ​ກໍ​ມີ​ພາກ­ສ່ວນ​ທຸ­ລະ​ກິດ ປະ­ຊາ­ຊົນ ແລະ ອົງ­ການ​ລັດ​ຈຳ­ນວນ​ໜຶ່ງ ມີ​ສ່ວນ​ຮ່ວມ​ອະ­ນາ­ໄມ​ຮ່ອງ​ລະ­ບາຍ​ນ້ຳ ແລະ ໄດ້​ສືບ­ຕໍ່​ມີ​ສ່ວນ​ຮ່ວມ​ນຳ​ກັນ ເຮັດ​ໃຫ້​ນ້ຳ​ບໍ່​ຖ້ວມ​ຂັງ​ຕົວ​ເມືອງ​ວຽງ​ຈັນ​ໃນ​ລະ­ດູ­ຝົນ.

ຂ່າວທີ່ກ່ຽວຂ້ອງ