ຈົ່ງມີສະຕິໃນການບໍລິໂພກເຫັດ ເພື່ອຫຼີກລ່ຽງການເບື່ອເຫັດ

514 20 ພ.ພ. 2019 ຂ່າວໜ້າ​ໜຶ່ງ
ຈົ່ງມີສະຕິໃນການບໍລິໂພກເຫັດ ເພື່ອຫຼີກລ່ຽງການເບື່ອເຫັດ

    ປັດ­ຈຸ­ບັນ ກຳ­ລັງ​ກ້າວ​ສູ່​ລະ­ດູ­ຝົນ ເຫັດ​ທຳ​ມະ​ຊາດ​ຫຼາຍ​ຊະ­ນິດ​ໄດ້​ເກີດ​ຂຶ້ນ​ຢູ່​ສະ­ຖານ­ທີ່​ຕ່າງໆ ເຊິ່ງ​ບັນ­ດາ​ເຫັດ​ດັ່ງ­ກ່າວ ຫຼາຍ​ທ່ານ​ນິ­ຍົມ​ນຳ​ມາ​ປຸງ​ແຕ່ງ​ເປັນ​ອາ­ຫານ ແຕ່​ຂະ­ແໜງ​ສາ­ທາ­ລະ­ນະ​ສຸກ​ໄດ້​ເຕືອນ​ໃຫ້​ມີ​ສະ­ຕິ​ໃນ​ການ​ບໍ­ລິ­ໂພກ ເນື່ອງ​ຈາກ​ປັດ­ຈຸ­ບັນ​ສະ­ພາບ​ແວດ​ລ້ອມ​ຢູ່​ຫຼາຍ​ເຂດ ມີ​ການ​ປ່ຽນ­ແປງ ແລະ ຖືກ​ທຳ­ລາຍ​ຈາກ​ມົນ​ລະ​ພິດ ກໍ​ຄື ສານ​ປົນ​ເປື້ອນ​ຕ່າງໆ ເປັນ­ຕົ້ນ ຢູ່​ຕາມ​ທົ່ງ​ໄຮ່-ທົ່ງ​ນາ ພູ­ຜາ​ປ່າ­ໄມ້ ຫຼາຍ​ເຂດ ມີ​ສານ​ເຄ​ມີ ແລະ ທາດ​ເບື່ອ​ອື່ນໆ ທີ່​ນຳ​ໃຊ້​ໃນ​ການ​ຜະ­ລິດ​ກະ­ສິ­ກຳ ແລະ ອຸດ­ສາ­ຫະ­ກຳ ຕົກ​ຄ້າງ​ເປັນ​ຈຳ­ນວນ​ຫຼວງ­ຫຼາຍ.

    ທ່ານ​ນາງ ໄຊ​ພອນ ນັນ­ທະ​ພອນ ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ​ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ ເມື່ອ​ບໍ່​ດົນ​ມາ​ນີ້​ວ່າ: ເພື່ອ​ຫຼີກ​ລ່ຽງ​ອັນ­ຕະ­ລາຍ ກໍ​ຄື ການ​ເບື່ອ​ເຫັດ​ພາຍ­ຫຼັງ​ບໍ­ລິ­ໂພກ ບໍ່​ຄວນ​ເອົາ​ເຫັດ​ຊະ­ນິດ​ທີ່​ບໍ່​ເຄີຍ​ຮັບ​ປະ­ທານ ມາ​ປຸງ​ແຕ່ງ​ເປັນ​ອາ­ຫານ​ຮັບ​ປະ­ທານ ບໍ່​ຄວນ​ເອົາ​ເຫັດ​ຫຼາຍ​ຊະ­ນິດ​ມາ​ປົນ​ກັນ​ເພື່ອ​ປຸງ​ແຕ່ງ­ອາ­ຫານ ເມື່ອ​ເອົາ​ເຫັດ​ມາ​ປຸງ​ແຕ່ງ​ເປັນ​ອາ­ຫານ​ຕ້ອງ​ຮູ້​ທີ່​ມາ​ຂອງ​ເຫັດ ເພື່ອ​ຮັບ ປະ­ກັນ​ວ່າ​ບ່ອນ​ທີ່​ເຫັດ​ເກີດ​ນັ້ນ ບໍ່​ໄດ້​ເກີດ​ໃນ​ບ່ອນ​ທີ່​ມີ​ສານ​ເຄ​ມີ​ຕົກ​ຄ້າງ ສິ່ງ​ສຳ­ຄັນ​ຕ້ອງ​ປຸງ​ແຕ່ງ​ໃຫ້​ສຸກ​ດີ ແລະ ຖ້າ​ພາຍ­ຫຼັງ​ບໍ­ລິ­ໂພກ​ແລ້ວ​ມີ​ອາ­ການ​ວິນ​ຫົວ ປວດ­ຮາກ ຫຼື ເຈັບ­ທ້ອງ ໃຫ້​ຮີບ​ຮ້ອນ​ນຳ​ສົ່ງ​ໂຮງ­ໝໍ​ໂດຍ​ດ່ວນ ເພື່ອ​ຮັບ​ການ​ປິ່ນ­ປົວ​ຢ່າງ​ຖືກ​ວິ­ທີ ທັງ​ຮັບ­ປະ­ກັນ​ຄວາມ​ປອດ​ໄພ​ຕໍ່​ສຸ­ຂະ­ພາບ ແລະ ຊີ­ວິດ.

ຂ່າວທີ່ກ່ຽວຂ້ອງ