ປະທານປະເທດ ຕ້ອນຮັບທູດປະເທດເພື່ອນມິດເຂົ້າຍື່ນສານຕາຕັ້ງ

651 20 ພ.ພ. 2019 ຂ່າວໜ້າ​ໜຶ່ງ
ປະທານປະເທດ ຕ້ອນຮັບທູດປະເທດເພື່ອນມິດເຂົ້າຍື່ນສານຕາຕັ້ງ

    ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ສປປ ລາວ ຕ້ອນ­ຮັບ​ທູດ​ປະ­ເທດ​ເພື່ອນ​ມິດ ເຂົ້າ​ຍື່ນ​ສານ​ຕາ​ຕັ້ງ ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ ຄົນ​ໃໝ່ ປະ­ຈຳ ສປປ ລາວ ແລະ ມອບ​ສານ​ແຕ່ງ­ຕັ້ງ​ໃຫ້​ທູດ​ລາວ ໄປ​ປະ­ຈຳ​ຢູ່​ຕ່າງ­ປະ­ເທດ ວັນ​ທີ 17 ພຶດ­ສະ­ພາ 2019 ຢູ່​ທຳ​ນຽບ​ປະ­ທານ​ປະ­ເທດ ເຊິ່ງ​ມີ​ລາຍ​ລະ­ອຽດ ຄື: ເວ­ລາ 8:30 ໂມງ ໄດ້​ຕ້ອນ­ຮັບ​ທ່ານ Dinkar Asthana ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ​ຜູ້​ມີ​ອຳ­ນາດ​ເຕັມ ສ ອິນ​ເດຍ ຄົນ​ໃໝ່ ປະ­ຈຳ ສປປ ລາວ ໂດຍ​ມີ​ສຳ­ນັກ­ງານ​ສະ­ຖານ­ທູດ​ຢູ່​ນະ­ຄອນ­ຫຼວງ​ວຽງ​ຈັນ ກ່ອນ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ Dinkar Asthana ເຄີຍ​ດຳ­ລົງ​ຕຳ­ແໜ່ງ​ເລ­ຂາ­ທິ­ການ (ການ​ບໍ­ລິ­ຫານ​ຄູ່​ຮ່ວມ​ມື​ດ້ານ​ການ​ພັດ­ທະ­ນາ) ກະ­ຊວງ​ການ​ຕ່າງ­ປະ­ເທດ​ອິນ​ເດຍ ສ່ວນ​ລາວ ແລະ ອິນ​ເດຍ ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 2 ກຸມ­ພາ 1956.

    ເວ­ລາ 9:00 ໂມງ ໄດ້​ຕ້ອນ­ຮັບ​ທ່ານ Antonis Toumazis ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ ຜູ້​ມີ​ອຳ­ນາດ​ເຕັມ ສ ໄຊ​ປຣັດ ຄົນ​ໃໝ່ ປະ­ຈຳ ສປປ ລາວ ໂດຍ​ມີ​ສຳ­ນັກ­ງານ​ສະ­ຖານ­ທູດ​ຢູ່​ປັກ​ກິ່ງ ສປ ຈີນ ກ່ອນ​ຈະ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ Antonis Toumazis ເຄີຍ​ດຳ­ລົງ​ຕຳ­ແໜ່ງ​ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ ຜູ້​ມີ​ອຳ­ນາດ​ເຕັມ ສ ໄຊ​ປຣັດ ປະ­ຈຳ ມົງ​ໂກ​ລີ ສ່ວນ ລາວ ແລະ ໄຊ​ປຣັດ ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 29 ມິ­ຖຸ­ນາ 2000.

    ເວ­ລາ 9:30 ໂມງ ໄດ້​ຕ້ອນ­ຮັບ​ທ່ານ Obaid Saeed Obaid Bintaresh Aidhaheri ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ ຜູ້​ມີ​ອຳ­ນາດ​ເຕັມ ສ ອາ​ຣັບ ເອ​ມີ​ເຣດ ຄົນ​ໃໝ່​ປະ­ຈຳ ສປປ ລາວ ໂດຍ​ມີ​ສຳ­ນັກ­ງານ​ສະ­ຖານ­ທູດ​ຢູ່​ຮ່າ​ໂນ້ຍ ສສ ຫວຽດ­ນາມ ກ່ອນ​ມາ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ລາວ ທ່ານ Obaid Saeed Obaid Bintaresh Aidhaheri ເຄີຍ​ດຳ­ລົງ​ຕຳ­ແໜ່ງ​ເອກ​ອັກ​ຄະ​ລັດ​ຖະ​ທູດ​ວິ­ສາ­ມັນ ຜູ້​ມີ​ອຳ­ນາດ​ເຕັມ ສ ອາ​ຣັບ ເອ​ມີ​ເຣດ ປະ­ຈຳ ສສ ຫວຽດ­ນາມ ລາວ ແລະ ສ ອາ​ຣັບ ເອ​ມີ​ເຣດ ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 15 ຕຸ­ລາ 1996.

    ໂອ­ກາດ​ນີ້ ທ່ານ ບຸນ​ຍັງ ວໍ­ລະ​ຈິດ ກໍ​ໄດ້​ສະ­ແດງ​ຄວາມ​ຍິນ​ດີ​ຕ້ອນ­ຮັບ ແລະ ຊົມ­ເຊີຍ​ຕໍ່​ບັນ­ດາ​ທ່ານ​ທູດ ທີ່​ໄດ້​ຖືກ​ແຕ່ງ­ຕັ້ງ​ເປັນ​ທູດ​ຄົນ​ໃໝ່​ປະ­ຈຳ ສປປ ລາວ ເພື່ອ​ສືບ­ຕໍ່​ເສີມ​ຂະ­ຫຍາຍ​ສາຍ​ພົວ­ພັນ ແລະ ການ​ຮ່ວມ​ມື​ທີ່​ດີ ລະ­ຫວ່າງ ສປປ ລາວ ແລະ ບັນ­ດາ​ປະ­ເທດ​ເພື່ອນ​ມິດ ໃຫ້​ນັບ​ມື້​ນັບ​ແໜ້ນ​ແຟ້ນ​ຍິ່ງໆ​ຂຶ້ນ.

    ວັນ​ດຽວ​ກັນ​ນີ້ ທ່ານ ບຸນ​ຍັງ ວໍ­ລະ​ຈິດ ຍັງ​ໄດ້​ມອບ​ສານ​ແຕ່ງ­ຕັ້ງ​ໃຫ້​ທ່ານ ພູ​ໂຂງ ສີ​ສຸ​ລາດ ໄປ​ດຳ­ລົງ​ຕຳ­ແໜ່ງ​ເອກ​ອັກ​ຄະ​ລັດ​ຖະ​ທູດ ສປປ ລາວ ປະ­ຈຳ ແບນ​ຊິກ ເຊິ່ງ​ກ່ອນ​ໄປ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ແບນ​ຊິກ ທ່ານ ພູ​ໂຂງ ສີ​ສຸ​ລາດ ເຄີຍ​ດຳ­ລົງ​ຕຳ­ແໜ່ງ​ຫົວ­ໜ້າ​ກົມ​ສົນ­ທິ­ສັນ­ຍາ ແລະ ກົດ­ໝາຍ ກະ­ຊວງ​ການ​ຕ່າງ­ປະ­ເທດ ໂອ­ກາດ​ດຽວ​ກັນ​ທ່ານ​ປະ­ທານ​ປະ­ເທດ ກໍ​ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ທ່ານ ພູ​ໂຂງ ສີ​ສຸ​ລາດ ທີ່​ຈະ​ໄປ​ປະ­ຕິ­ບັດ​ໜ້າ­ທີ່​ການ​ທູດ​ຢູ່​ຕ່າງ­ປະ­ເທດ ແລະ ເນັ້ນ​ໃຫ້​ປະ­ຕິ­ບັດ​ໜ້າ­ທີ່​ຢ່າງ​ຕັ້ງ­ໜ້າ ເພື່ອ​ປະ­ກອບ­ສ່ວນ​ຮັດ​ແໜ້ນ ແລະ ເສີມ​ຂະ­ຫຍາຍ​ສາຍ​ພົວ­ພັນ​ການ​ທູດ ກໍ​ຄື ການ​ຮ່ວມ​ມື​ດ້ານ​ອື່ນໆ ລະ­ຫວ່າງ ລາວ-ແບນ​ຊິກ ໃຫ້​ເກີດ​ດອກ​ອອກ​ຜົນ ແລະ ຂະ­ຫຍາຍ­ຕົວ​ຍິ່ງໆ​ຂຶ້ນ.

ຂ່າວທີ່ກ່ຽວຂ້ອງ