ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 20-05-2019

934 21 ພ.ພ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະຈຳ​ວັນ​ນີ້ ມີ​ສອງ​ເລື່ອງ​ທີ່​ຄວນ​ເບິ່ງ​ໄວ້​ເປັນ​ບົດຮຽນ ຄື: ນະໂຍບາຍ​ດຶງ​ດູດ​ເອົາ​ຄົນ​ຮັ່ງມີ​ເຂົ້າ​ປະເທດ​ກາ​ນາ​ດາ ແລະ ເລື່ອງ ອິນ​ໂດ​ເນ​ເຊຍ ກັບ​ແຜນ​ກຳຈັດ​ເນື້ອ​ໃນ​ບໍ່​ດີ​ຕາມ​ເວັບ​ໄຊ.

    ທີ່ ກາ​ນາ​ດາ: ກ່ອນ​ໜ້າ​ນີ້​ປະມານ 5 ປີ ທາງ​ການ​ປະເທດ​ກາ​ນາ​ດາ​ໄດ້​ຟື້ນ​ຟູ ແຜນ​ດຶງ​ດູດ​ຄົນ​ຮັ່ງມີ​ໃນ​ທົ່ວ​ໂລກ ເຂົ້າ​ໄປ​ຢູ່​ປະເທດ​ກາ​ນາ​ດາ​ດ້ານ​ນະໂຍບາຍ​ດີໆ ຄື: ການ​ອອກ​ນະໂຍບາຍ​ວີ​ຊາ​ພິເສດ​ໃຫ້​ນັກ​ລົງທຶນ​ຕ່າງປະເທດ​ຈຳນວນ 50 ຄົນ ທີ່​ຕ້ອງການ​ເຂົ້າ​ໄປ​ຕັ້ງ​ຖິ່ນ​ຖານ​ແບບ​ຖາວອນ ຢູ່​ກາ​ນາ​ດາ ເງື່ອນໄຂ​ທີ່​ຈະ​ໄດ້​ຮັບ​ນະໂຍບາຍ​ທີ່​ສຸດ​ແສນ​ສະດວກ​ດັ່ງກ່າວ​ນັ້ນ ກໍ​ຄື ນັກ​ລົງທຶນ​ແຕ່ລະຄົນ (ໃນ​ຈຳນວນ 50 ຄົນ ) ຕ້ອງ​ມີ​ຊັບ​ສິນ​ສຸດທິ​ຢ່າງ​ໜ້ອຍ 10 ລ້ານ​ໂດ​ລາ​ກາ​ນາ​ດາ ແລະ ຕ້ອງ​ລົງທຶນ​ເປັນ​ໄລຍະ​ເວລາ 15 ປີ ດ້ວຍ​ເງິນ​ລົງທຶນ​ຕ່ຳ​ສຸດ​ບໍ່​ຫຼຸດ 2 ລ້ານ​ໂດ​ລາ​ກາ​ນາ​ດາ ນອກຈາກ​ນັ້ນ ບັນດາ​ນັກ​ລົງທຶນ​ຕ່າງປະເທດ​ຖົງ​ເງິນ​ຕື່ງ​ທັງຫຼາຍ​ຍັງ​ຕ້ອງ​ເວົ້າ​ພາສາ​ອັງກິດ ແລະ ຝຣັ່ງ​ເສດ​ໄດ້​ອີກ​ດ້ວຍ (ກາ​ນາ​ດາ​ມີ​ພາສາ​ທາງ​ການ2 ພາສາ ຄື: ອັງກິດ ແລະ ຝຣັ່ງ) ນະໂຍບາຍ​ດຶງ​ດູດ​ຄົນ​ຮັ່ງມີ​ເຂົ້າ​ປະເທດ​ກາ​ນາ​ດາ​ຊຸດ​ປັບປຸງ​ນີ້​ເລີ່ມ​ປະຕິບັດ​ແຕ່​ເດືອນ​ມັງກອນ ປີ 2015 ເປັນຕົ້ນ​ມາ ກ່ອນ​ໜ້າ​ນັ້ນ ຄື: ເລີ່ມ​ແຕ່​ປີ 1980 ກາ​ນາ​ດາ ກໍ​ເຄີຍ​ປະຕິບັດ​ນະໂຍບາຍ​ນີ້​ມາ​ແລ້ວ ດ້ານ​ການ​ອອກ​ວີ​ຊາ ໃຫ້​ນັກ​ລົງທຶນ​ຕ່າງປະເທດ​ທີ່​ມີ​ຊັບ​ສິນ​ສຸດທິ 8 ແສນ​ໂດ​ລາ​ກາ​ນາ​ດາ ແລະ ມີ​ເງິນ​ລົງທຶນ​ບໍ່​ຫຼຸດ 4 ແສນ​ໂດ​ລາ​ກາ​ນາ​ດາ ຕໍ່​ມາ​ກໍ​ໄດ້​ປັບ​ຂຶ້ນ ມູນ​ຄ່າ​ຊັບ​ສິນ​ສຸດທິ​ເປັນ 1,6 ລ້ານ​ໂດ​ລາ​ກາ​ນາ​ດາ ແລະ ມີ ເງິນ​ລົງທຶນ​ບໍ່​ຫຼຸດ 8 ແສນ​ໂດ​ລາ​ກາ​ນາ​ດາ ແຕ່​ເທື່ອ​ນີ້​ທາງ​ການ​ກາ​ນາ​ດາ​ໄດ້​ປັບ​ຂຶ້ນ​ມູນ​ຄ່າ​ຊັບ​ສິນ​ສຸດທິ ແລະ ເງິນ​ລົງທຶນ​ສຸດທິ​ຕາມ​ຕົວ​ເລກ​ທີ່​ໄດ້​ກ່າວ​ມາ​ຂ້າງ​ເທິງ​ນັ້ນ ນະໂຍບາຍ​ດຶງ​ດູດ​ດ້ວຍ​ການ​ອອກ​ວີ​ຊາ ພິເສດ​ນີ້​ໄດ້​ຮັບ​ຄວາມ​ນິຍົມ​ສູງ​ຈາກ​ນັກ​ລົງທຶນ​ຕ່າງປະເທດ ໂດຍ​ສະເພາະ ແມ່ນ​ຈາກ​ຈີນ ຂ່າວ​ບອກ​ວ່າ​ນະໂຍບາຍ​ດັ່ງກ່າວ​ຖືກ​ຍົກເລີກ​ຊົ່ວຄາວ​ໃນ​ປີ 2012 ເພື່ອ​ສະ​ສາງ​ຂໍ້​ມູນ ຕໍ່​ມາ​ກໍ​ສັ່ງ​ຍົກເລີກ​ຢ່າງ​ເປັນ​ທາງ​ການ​ໃນ​ຕົ້ນ​ປີ 2013 ແລະ ໄດ້​ຖືກ​ຟື້ນ​ຄືນ ໃນ​ທ້າຍ​ປີ 2014.

    ທີ່ ອິນ​ໂດ​ເນ​ເຊຍ: ໃນ​ທີ່​ສຸດ​ກໍ​ມີ​ຂ່າວ​ວ່າ ແຜນ​ກຳຈັດ​ເນື້ອ​ໃນ​ທີ່​ບໍ່​ເພິ່ງ​ປາຖະໜາ​ຢູ່​ຕາມ​ເວັບ​ໄຊ ທີ່​ອິນ​ໂດ​ເນ​ເຊຍ ກໍ​ປະສົບ​ຜົນສຳເລັດ​ເມື່ອ​ກູ​ເກີນ ແລະ ທະ​ວິດ​ເຕີ ຍອມ​ສະໜອງ​ຂໍ້​ມູນ​ອັນ​ຈຳເປັນ​ທີ່​ທາງ​ການ ອິນ​ໂດ​ເນ​ເຊຍ ຕ້ອງການ​ເພື່ອ​ກຳຈັດ​ເນື້ອ​ໃນ​ບໍ່​ດີ​ທີ່​ແຜ່​ລະບາດ​ຢູ່​ຕາມ​ເວັບ​ໄຊ​ຂອງ​ເຄືອ​ຄ່າຍ​ກູ​ເກີນ ແລະ ທະ​ວິດ​ເຕີ ທາງ​ກະຊວງ​ສື່ສານ ແລະ ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ​ອິນ​ໂດ​ເນ​ເຊຍ ໃຫ້​ຮູ້​ກ່ຽວ​ກັບ​ເລື່ອງ​ນີ້​ວ່າ ອິນ​ໂດ​ເນ​ເຊຍ ບໍລິສັດ ກູ​ເກີນ ແລະ ທະ​ວິດ​ເຕີ ປະຈຳ​ພາກ​ພື້ນ ອາຊີ-ປາ​ຊີ​ຟິກ​ໄດ້​ມີ​ໂຄງການ​ຮ່ວມ​ມື​ນຳ​ກັນ ເອີ້ນ​ວ່າ: ທັດ​​ສ​ເຕັດ ຟະ​ແລກ​ເກີ (Trusted Flagger) ທີ່​ມີໜ້າ​ທີ່​ຄຸ້ມ​ຄອງ​ເນື້ອ​ໃນ​ກູ​ເກີນ ໂດຍ​ມອບ​ໃຫ້​ນັກວິຊາການ​ອິດສະຫຼະ​ເຮັດ​ໜ້າທີ່​ກວດແກ້​ເນື້ອ​ໃນ​ແລ້ວ​ໝາຍ​ໄວ້ ຈາກ​ນັ້ນ ກູ​ເກີນ​ກໍ​ຈະ​ກວດກາ​ເນື້ອ​ໃນ​ທີ່​ໝາຍ​ໄວ້​ວ່າ ສອດຄ່ອງ​ກັບ​ພື້ນຖານ​ລະບຽບ​ການ​ຂອງ​ຕົນ ຫຼື ບໍ່ ແລະ ຕໍ່​ໄປ​ກໍ​ພິຈາລະນາ​ວ່າ​ຈະ​ກຳຈັດ​ອາຍຸ​ຂອງ​ຜູ້​ເປີດ​ອ່ານ ຫຼື ລຶບ ເນື້ອ​ໃນ​ອອກ​ເລີຍ ຫຼື ບໍ່ (ຂໍ້​ມູນ​ຈາກ​ໜັງສືພິມ​ລາວ​ພັດທະນາ ວັນ​ທີ 8 ສິງຫາ 2017 ).

ຂ່າວທີ່ກ່ຽວຂ້ອງ