ຂ່າວຫຼ້າສຸດ

ເສັ້ນ ແລະ ສາຍ

2.807 22 ພ.ພ. 2019 ນານາສາລະ

    ເມື່ອ​ໄປ​ມາ​ທາງ​ໃດ​ໃນ​ຕົວ​ເມືອງ ມັກ​ຈະ​ເຫັນ​ທັງ​ເສັ້ນ ແລະ ສາຍ ຢັງ​ຢາຍ​ກັນ​ໃນ​ແຕ່​ລະ​ບ່ອນ ເສັ້ນ​ສາຍ​ດັ່ງ­ກ່າວ ທາວ­ໃຍ​ໄປ​ເລື້ອຍໆ​ຕາມ​ຄວາມ​ຕ້ອງ­ການ ເປັນ​ສັນ­ຍາ​ລັກ​ຂອງ​ການ​ເຂົ້າ​ເຖິງ​ສິ່ງ​ອຳ­ນວຍ​ຄວາມ​ສະ­ດວກ ເວົ້າ​ມາ​ຮອດ​ນີ້ ຜູ້​ອ່ານ​ຫຼາຍ​ຄົນ​ຄົງ​ຈະ​ແປກ​ໃຈ ບາງ​ຄົນ​ກໍ​ອາດ​ຈະ​ເຮັດ​ຕາ​ມົນ​ມຶ້ງ​ຄຶ້ງ​ວ່າ ທ້າວ​ຊຽງ​ນີ້​ເອົາ​ຫຍັງ​ມາ​ເວົ້າ.

    ເມື່ອ​ເວົ້າ​ເຖິງ​ເສັ້ນ​ສາຍ​ແລ້ວ ຢ່າ​ຕົກ­ໃຈ​ຢ່າ​ນ້ອຍ​ໃຈ​ເທາະ ເພາະ​ທີ່​ຈະ​ເວົ້າ​ຕໍ່​ໄປ​ນີ້​ບໍ່​ກ່ຽວ​ກັບ​ເສັ້ນ​ສາຍ​ທີ່​ເປັນ​ກຸ່ມ​ຄົນ ສ້າງ​ໃຫ້​ມີ​ຄຳ​ວ່າ “ຄົນ​ເຈົ້າ ຄົນ​ຂ້ອຍ” ແຕ່​ປະ­ການ​ໃດ ພາຍ​ໃຕ້​ລະ­ບອບ​ໃໝ່ ເສັ້ນ​ສາຍ​ທີ່​ບາງ​ຄົນ​ມະ­ໂນ​ເອົາ​ເອງ​ນັ້ນ ບາງ­ທີ​ກໍ​ບໍ່​ມີ​ເພາະ​ໃຜໆ​ກໍ​ເຮັດ​ວຽກ​ຢ່າງ​ຕັ້ງ­ໜ້າ ມີ​ລະ­ບຽບ​ກົດ­ໝາຍ​ຄຸ້ມ​ຄອງ ບໍ່​ແມ່ນ​ຊິ​ດຶງ​ຈ່ອງ​ກັນ​ຂື້ນ​ພໍ​ປານ​ຂຶ້ນ​ຕາ­ຝັ່ງ ແຕ່​ຖ້າ​ບ່ອນ​ຈ່ອງ​ບໍ່​ດີ​ແດ່ ກໍ​ຄົງ​ຕົກ​ນ້ຳ​ກັນ​ໄປ​ເປັນ​ແຖວໆ​ກໍ​ໄດ້.

    ເສັ້ນ​ສາຍ​ທີ່​ຜູ້​ຂຽນ​ຍົກ​ມາ​ແລກ­ປ່ຽນ​ສົນ­ທະ­ນາ​ນຳ​ກັນ​ນີ້ ມັນ​ແມ່ນ​ເສັ້ນ​ສາຍ​ທີ່​ປາ­ກົດ​ເຫັນ​ເທີງ​ຫົວ ຕາມ​ເສົາ​ແຄມ​ທາງ ຕາມ​ເສັ້ນ­ທາງ​ຕ່າງໆ​ໃນ​ຕົວ​ເມືອງ ເປັນ​ບ່ອນ​ຈ່ອງ​ອຳ­ນວຍ​ຄວາມ​ສະ­ດວກ​ໃຫ້ ສາຍ​ໂທລະ­ສັບ​ຕັ້ງ​ໂຕະ ສາຍ​ເຄ​ເບີນ​ໂທລະ­ພາບ ຫຼື ສາຍ​ອື່ນໆ​ເປັນ​ສື່​ເພື່ອ​ບໍ­ລິ­ການ​ໃຫ້​ຜູ້​ຊົມ­ໃຊ້​ສະ­ດວກ​ເຂົ້າ​ເຖິງ​ຂໍ້​ມູນ​ຂ່າວ­ສານ. ສ່ວນ​ໃຫຍ່​ກໍ​ຫາກ​ແມ່ນ​ເຝືອ​ຝັ້ນ​ນຳ​ເສົາ​ໄຟ­ຟ້າ ບາງ​ບ່ອນ​ກໍ​ຈັດ​ສັນ​ດີ​ເປັນ​ລະ­ບຽບ ແຕ່​ບາງ​ບ່ອນ ກໍ​ຫ້ອຍ​ໂຕ້ນ​ເຕັ້ນ​ເປັນ​ພວງ​ພະ­ນັງ​ໄປ​ຕາມ​ເສົາ ຕາມ​ຕົ້ນ­ໄມ້ ກາຍ­ເປັນ​ຕົວ​ການ​ບົດ​ບັງ​ທັດ­ສະ­ນີ​ຍະ​ພາບ​ອາ­ຄານ​ບ້ານ​ເຮືອນ ສຳ­ນັກ­ງານ​ອົງ­ການ​ເປັນ​ອັນ​ບໍ່​ສະ­ດຸດ​ຕາ​ສະ­ດຸດ​ໃຈ​ໄປ ຍິ່ງ​ໄປ​ກວ່າ​ນັ້ນ ເມື່ອ​ຟ້າ​ລົມ​ຝົນ­ຕົກ ບາງ​ສາຍ​ທີ່​ຕິດ​ຕັ້ງ​ເກາະ​ກັນ​ບໍ່​ແໜ້ນ​ກໍ​ຢ່ອນ​ລົງ​ເຕະ​ເຊະ ກີດ​ກັນ​ການ​ເດີນ­ທາງ​ຂອງ​ພາ­ຫະ­ນະ ສະ­ເພາະ​ປະ­ເພດ​ລົດ­ຈັກ​ອາດ​ຈະ​ມີ​ບັນ­ຫາ ອາດ​ເກີດ​ອຸ­ບັດ­ເຫດ​ກໍ​ໄດ້.

    ຍາມ​ນີ້​ແມ່ນ​ຍາມ​ຕົ້ນ​ລະ­ດູ­ຝົນ ບາງ​ມື້​ມີ​ລົມ​ແຮງ ຟ້າ​ຝົນ​ຊົນ­ລະ­ທາ​ຫົວ­ປີ​ມັກ​ຮ້າຍ ພັດ​ເອົາ​ເສັ້ນ​ສາຍ​ດັ່ງ­ກ່າວ​ໃຫ້​ເກີດ​ບໍ່​ເປັນ​ລະ­ບຽບ ສ້າງ​ອຸ­ປະ­ສັກ​ແກ່​ການ​ເດີນ­ທາງ ດັ່ງ­ນັ້ນ ອົງ­ການ​ທີ່​ເປັນ​ເຈົ້າ​ຂອງ ຄວນ​ມີ​ສະ­ຕິ​ສອດ­ສ່ອງ​ດູ​ແລ ສິ່ງ​ທີ່​ຕົນ​ໄດ້​ຕິດ​ຕັ້ງ​ໄປ​ແລ້ວ​ນັ້ນ​ວ່າ ມັນ​ຍັງ​ຄົງ​ແໜ້ນ­ໜາ​ຖາ­ວອນ​ຢູ່​ບໍ ? ສຳ­ຄັນ​ແມ່ນ​ບໍ່​ໃຫ້​ສິ່ງ​ດັ່ງ­ກ່າວ​ຕົກ­ລົງ​ມາ​ໃສ່​ທາງ ໃສ່​ບ້ານ​ເຮືອນ ໂດຍ​ສະ­ເພາະ ຕ້ອງ​ຕັດ​ງ່າ­ໄມ້ ຫຼື ຕົ້ນ­ໄມ້​ທີ່​ເຫັນ​ວ່າ​ອາດ​ຈະ​ສ້າງ​ບັນ­ຫາ​ນັ້ນ​ອອກ​ຈາກ​ສາຍ​ໄຟ­ຟ້າ ສາຍ​ໂທລະ­ສັບ ແລະ ສາຍ​ອື່ນໆ ເຊິ່ງ​ເສັ້ນ​ສາຍ​ດັ່ງ­ກ່າວ ມີ​ທັງ​ບ່ອນ​ເຮັດ​ດີ ແລະ ບ່ອນ​ອີ່​ລຸງ​ຕຸງ​ນັງ​ຄ້າຍ­ຄື​ບໍ່​ເອົາ­ໃຈ­ໃສ່​ກໍ​ມີ. ຄາດ​ວ່າ​ຖ້າ​ແກ້​ໄດ້ ກໍ​ອາດ​ຄ້າຍ­ຄື​ຍົກ​ພູ­ເຂົາ​ອອກ​ຈາກ​ໜ້າ​ອົກ​ຄົນ​ຢູ່​ມໍ່​ໄດ້​ຫຼາຍໆ​ຄົນ.

ຂ່າວທີ່ກ່ຽວຂ້ອງ