ເລືອກນັກກີລາກະຕໍ້ນັກຮຽນ ເຂົ້າແຂ່ງຂັນທີ່ອິນໂດເນເຊຍ

701 22 ພ.ພ. 2019 ວົງຈອນກີລາ
ເລືອກນັກກີລາກະຕໍ້ນັກຮຽນ ເຂົ້າແຂ່ງຂັນທີ່ອິນໂດເນເຊຍ

    ສະ­ຫະ­ພັນ​ກີ­ລາ​ກະ­ຕໍ້​ແຫ່ງ​ຊາດ​ລາວ ໄດ້​ສຳ­ເລັດ​ຄັດ​ເລືອກ​ນັກ­ກີ­ລາ​ກະ­ຕໍ້​ຕົວ​ແທນ​ນັກ­ກີ­ລາ​ນັກ­ຮຽນ​ທີມ​ຊາດ​ລາວ ຈຳ­ນວນ 12 ຄົນ ເພື່ອ​ກຽມ​ເຂົ້າ​ຮ່ວມ​ການ​ແຂ່ງ­ຂັນ​ງານ​ກີ­ລາ​ມັດ­ທະ­ຍົມ​ອາ​ຊຽນ ທີ່​ຈະ​ຈັດ​ຂຶ້ນ​ໃນ​ເດືອນ​ກໍ­ລະ­ກົດ 2019 ທີ່​ປະ­ເທດ​ອິນ​ໂດ​ເນ​ເຊຍ.

    ທ່ານ​ນາງ ໂນ​ລີ ຊາ​ມົນ­ຕີ ຄູ​ເຝິກ​ນັກ­ກີ­ລາ​ກະ­ຕໍ້​ທີມ​ຊາດ​ລາວ ໃຫ້​ສຳ­ພາດ​ວັນ​ທີ 15 ພຶດ­ສະ­ພາ 2019 ວ່າ: ພາຍ­ຫຼັງ​ໄດ້​ຮັບ​ແຈ້ງ​ການ​ຈາກ​ສະ­ຫະ­ພັນ​ກີ­ລາ​ກະ­ຕໍ້​ແຫ່ງ​ຊາດ​ລາວ ທາງ​ຄະ­ນະ​ຄູ​ເຝິກ​ໄດ້​ຮີບ​ຮ້ອນ​ຄັດ​ເລືອກ​ນັກ​ກິ­ລາ ເພື່ອ​ກຽມ​ຄວາມ​ພ້ອມ​ເຂົ້າ​ຮ່ວມ​ການ​ແຂ່ງ­ຂັນ​ງານ​ກີ­ລາ​ມັດ­ທະ­ຍົມ​ອາ​ຊຽນ ທີ່​ຈະ​ຈັດ​ຂຶ້ນ​ວັນ​ທີ 17-25 ກໍ­ລະ­ກົດ 2019 ມາ​ຮອດ​ປັດ­ຈຸ­ບັນ ຄະ­ນະ​ຄູ​ເຝິກ​ສາ­ມາດ​ຄັດ​ເລືອກ​ນັກ­ກີ­ລາ​ກະ­ຕໍ້​ນັກ­ຮຽນ​ຊາຍ​ໄດ້ 12 ຄົນ ໂດຍ​ຈະ​ສົ່ງ​ເຂົ້າ​ຮ່ວມ 3 ລາຍ­ການ​ຄື: ທີມ​ຊຸດ ທີມ​ດ່ຽວ ແລະ ທີມ​ຄູ່.

    ການ​ແຂ່ງ­ຂັນ​ຄັ້ງ​ນີ້ ຄະ­ນະ​ຄູ​ເຝິກ​ພວກ​ເຮົາ​ໝັ້ນ​ໃຈ ຈະ​ຕ້ອງ​ສ້າງ​ຜົນ­ງານ​ໃຫ້​ໂດດ​ເດັ່ນ​ອີກ​ຄັ້ງ ເຖິງ​ວ່າ​ນັກ­ກີ­ລາ​ຊຸດ​ນີ້ ຈະ​ເປັນ​ນັກ­ກີ­ລາ​ໃໝ່​ກໍ​ຕາມ​ແຕ່​ກໍ​ຈະ​ເຮັດ​ໃຫ້​ສຸດ​ຄວາມ​ສາ­ມາດ ສຳ­ລັບ​ນັກ­ກີ­ລາ​ທີ່​ເຂົ້າ​ຮ່ວມ​ຄັດ​ເລືອກ​ເປັນ​ຕົວ​ແທນ​ຂອງ​ປະ­ເທດ​ລາວ​ເຮົາ​ຄັ້ງ​ນີ້​ມາ​ຈາກ 3 ແຂວງ​ຄື: ແຂວງ​ຄຳ​ມ່ວນ ສະ­ຫວັນ​ນະ​ເຂດ ແລະ ນະ­ຄອນ­ຫຼວງ​ວຽງ​ຈັນ ສ່ວນ​ເຂົ້າ​ສູນ​ເຝິກ­ຊ້ອມ​ຈະ​ເລີ່ມ​ແຕ່​ຕົ້ນ​ເດືອນ​ມິ­ຖຸ­ນາ​ເປັນ­ຕົ້ນ​ໄປ.

ຂ່າວທີ່ກ່ຽວຂ້ອງ