ສຶກສາ-ກີລາ ນວ ຮ່ວມແລກປ່ຽນບົດຮຽນກັບເມືອງໜອງງົວຊໍ ປະເທດໄທ

967 22 ພ.ພ. 2019 ວົງຈອນກີລາ
ສຶກສາ-ກີລາ ນວ ຮ່ວມແລກປ່ຽນບົດຮຽນກັບເມືອງໜອງງົວຊໍ ປະເທດໄທ

    ຄະ­ນະ​ນຳ ແລະ ພະ­ນັກ­ງານ ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ສປປ ລາວ ເດີນ­ທາງ​ເຂົ້າ​ຮ່ວມ​ແລກ­ປ່ຽນ​ບົດ­ຮຽນ​ດ້ານ​ວຽກ​ງານ​ກີ­ລາ-ກາ​ຍະ​ກຳ ກັບ​ເມືອງ​ໜອງ​ງົວ​ຊໍ ແຂວງ​ອຸ­ດອນ​ທາ­ນີ ປະ­ເທດ​ໄທ ໃນ​ລະ­ຫວ່າງ​ວັນ​ທີ 17-18 ພຶດ­ສະ­ພາ 2019 ຜ່ານ​ມາ ຢູ່​ຫ້ອງ​ວ່າ­ການ​ປົກ­ຄອງ​ເມືອງ​ໜອງ​ງົວ​ຊໍ ແຂວງ​ອຸ­ດອນ​ທາ­ນີ ນຳ​ໂດຍ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ພ້ອມ​ດ້ວຍ​ຄະ­ນະ ແລະ ໃຫ້​ກຽດ​ຕ້ອນ­ຮັບ​ຂອງ​ທ່ານ ອຸ­ໄລ​ວັນ ລັດ­ຕະ­ນະ​ເດດ​ອຸ­ດົມ ຮອງ​ເຈົ້າ­ເມືອງ​ໜອງ​ງົວ​ຊໍ ແຂວງ​ອຸ­ດອນ​ທາ­ນີ ປະ­ເທດ​ໄທ ພ້ອມ​ດ້ວຍ​ພາກ­ສ່ວນ​ທີ່​ກ່ຽວ­ຂ້ອງ​ທັງ 2 ຝ່າຍ​ເຂົ້າ​ຮ່ວມ​ຢ່າງ​ພ້ອມ­ພຽງ.

    ໂອ­ກາດ​ນີ້ ທ່ານ ອຸ­ໄລ​ວັນ ລັດ­ຕະ­ນະ​ເດດ​ອຸ­ດົມ ໄດ້​ກ່າວ​ສະ­ແດງ​ຄວາມ​ຕ້ອນ­ຮັບ​ອັນ​ອົບ​ອຸ່ນ ມາ​ຍັງ​ຄະ­ນະ​ນຳ​ຈາກ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ທີ່​ໄດ້​ເສຍ­ສະ­ຫຼະ​ເວ­ລາ​ອັນ​ມີ­ຄ່າ​ເດີນ­ທາງ​ມາ​ຢ້ຽມ­ຢາມ ແລະ ແຂ່ງ­ຂັນ​ກີ­ລາ​ເຕະ­ບານ​ມິດ­ຕະ­ພາບ ເພື່ອ​ເຊື່ອມ​ສາຍ­ສຳ­ພັນ 2 ຝັ່ງ​ຂອງ ເຊິ່ງ​ເປັນ​ນິ­ມິດ​ໝາຍ​ສຳ­ຄັນ ເພື່ອ​ປູ​ທາງ​ໄປ​ສູ່​ການ​ຮ່ວມ​ມື​ໃນ​ຫຼາຍໆ​ດ້ານ​ໃນ​ອະ­ນາ­ຄົດ ລວມ​ທັງ​ແນະ­ນຳ​ໃຫ້​ຮູ້​ກ່ຽວ​ກັບ​ແຫຼ່ງ​ທ່ອງ​ທ່ຽວ​ທີ່​ສຳ­ຄັນ​ຕ່າງໆ​ຂອງ​ເມືອງ ເຊັ່ນ: ວັດ​ພູ​ສຳ ເພົາ​ທອງ ວັດ​ດອຍ​ບັນ​ໄດ​ສະ­ຫວັນ ອຸດ­ທະ­ຍານ​ແຫ່ງ​ຊາດ​ພູ​ເກົ້າ-ພູ​ພານ​ຄຳ ນ້ຳ­ຕົກ​ຫີນ​ຕັ້ງ ນ້ຳ­ຕົກ​ຫ້ວຍ​ຫຼີ​ຜີ ວັດ​ໂນນ​ສະ­ຫວ່າງ ຖ້ຳ​ກົກ​ດູ່ ແລະ ແຫຼ່ງ​ທ່ອງ​ທ່ຽວ​ອື່ນໆ​ອີກ​ຫຼວງ­ຫຼາຍ.

    ທ່ານ ຊົມ​ພູ ແກ້ວ​ປັນ­ຍາ ໄດ້​ຕາງ­ໜ້າ​ຄະ­ນະ​ນຳ​ຈາກ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ກ່າວ​ສະ­ແດງ​ຄວາມ​ຂອບ­ໃຈ​ເປັນ​ຢ່າງ​ສູງ​ຕໍ່​ການ​ນຳ​ເມືອງ​ໜອງ​ງົວ​ຊໍ ທີ່​ໄດ້​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ ແລະ ສົມ​ກຽດ ພ້ອມ​ທັງ​ໄດ້​ແນະ­ນຳ​ໃຫ້​ຮູ້​ກ່ຽວ​ກັບ​ສະ­ຖານ­ທີ່​ທ່ອງ​ທ່ຽວ​ສຳ­ຄັນ​ຕ່າງໆ​ຂອງ​ເມືອງ​ໜອງ​ງົວ​ຊໍ​ອີກ​ດ້ວຍ ແລະ ຫວັງ​ວ່າ­ການ​ມາ​ຢ້ຽມ­ຢາມ​ຄັ້ງ​ນີ້ ຈະ​ເປັນ​ບາດ­ກ້າວ​ທຳ​ອິດ ໃນ​ການ​ສືບ­ຕໍ່​ຮ່ວມ​ມື​ກັນ​ໃນ​ຫຼາຍໆ​ດ້ານ​ລະ­ຫວ່າງ​ສອງ​ພາກ­ສ່ວນ ເວົ້າ​ລວມ​ເວົ້າ​ສະ­ເພາະ​ແມ່ນ​ການ​ຮ່ວມ​ມື​ດ້ານ​ວຽກ​ງານ​ການ​ສຶກ​ສາ ແລະ ກີ­ລາ ໃນ​ອະ­ນາ­ຄົດ.

    ພາຍ­ຫຼັງ​ສຳ­ເລັດ​ພິ­ທີ​ຕ້ອນ­ຮັບ ແລະ ມອບ​ຂອງ​ທີ່​ລະ­ນຶກ​ໃຫ້​ເຊິ່ງ​ກັນ​ແລະ​ກັນ​ແລ້ວ ຫຼັງ​ຈາກ​ນັ້ນ ກໍ​ໄດ້​ມີ​ການ​ແຂ່ງ­ຂັນ​ກີ­ລາ​ເຕະ­ບານ​ມິດ­ຕະ­ພາບ​ນັດ​ພິ­ເສດ ລະ­ຫວ່າງ​ທີມ​ວີ​ໄອ​ພີ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ພົບ​ກັບ​ທີມ​ວີ​ໄອ​ພີ ເມືອງ​ໜອງ​ງົວ​ຊໍ ທີ່​ສະ­ໜາມ­ກິ­ລາ​ບານ­ເຕະ​ໂຮງ­ຮຽນ​ໜອງ​ງົວ​ຊໍ​ພິ­ທະ­ຍາ­ຄົມ ຜ່ານ​ການ​ແຂ່ງ­ຂັນ​ຜົນ​ປະ­ກົດ​ວ່າ ທັງ 2 ທີມ ເຮັດ​ໄດ້​ພຽງ​ສະ­ເໝີ​ກັນ 2-2 ປະ­ຕູ.

ຂ່າວທີ່ກ່ຽວຂ້ອງ