ຂ່າວຫຼ້າສຸດ

ອາຊຽນ ຫາລືບຸລິມະສິດການເຄື່ອນໄຫວດ້ານສິດທິມະນຸດ

1.351 23 ພ.ພ. 2019 ຂ່າວໜ້າ​ໜຶ່ງ

    ກຳ­ມາ​ທິ​ການ​ສິດ­ທິ​ມະ­ນຸດ ລະ­ຫວ່າງ​ລັດ­ຖະ­ບານ​ອາ​ຊຽນ (AICHR) ຈັດ​ກອງ​ປະ­ຊຸມ​ປະ­ຈຳ​ປີ ຄັ້ງ​ທີ 29 ຂຶ້ນ​ວັນ​ທີ 12-15 ພຶດ­ສະ­ພາ 2019 ຢູ່​ຈາ​ກາ​ຕາ ປະ­ເທດ​ອິນ​ໂດ​ເນ​ເຊຍ ເປັນ​ປະ­ທານ​ຂອງ​ທ່ານ ອາ​ມາ​ຣາ​ພົງ​ສະ​ພິດ ຜູ້­ຕາງ­ໜ້າ AICHR ໄທ ໃນ​ນາມ​ປະ­ທານ​ກຳ­ມາ​ທິ​ການ​ດັ່ງ­ກ່າວ ຕາມ​ຮອບ​ໝູ­ນວຽນ​ການ​ເປັນ​ປະ­ທານ​ອາ​ຊຽນ​ຂອງ​ປະ­ເທດ​ໄທ ມີ​ຜູ້​ແທນ​ຈາກ​ປະ­ເທດ​ສະ­ມາ­ຊິກ​ອາ​ຊຽນ​ເຂົ້າ​ຮ່ວມ ລາວ​ເຮົາ​ນຳ​ໂດຍ​ທ່ານ​ນາງ ມະ​ໄລ​ວຽງ ສາ­ກົນ​ນິ­ຍົມ ຜູ້­ຕາງ­ໜ້າ AICHR ຂອງ​ລາວ.

    ກອງ​ປະ­ຊຸມ​ໄດ້​ພົບ​ປະ​ກັບ​ທ່ານ Hoang Anh Tuan ຮອງ​ເລ­ຂາ­ທິ­ການ​ໃຫຍ່​ອາ​ຊຽນ ເພື່ອ​ປຶກ­ສາ​ຫາ­ລື​ກ່ຽວ​ກັບ​ບຸ­ລິ­ມະ­ສິດ​ການ­ເຄື່ອນ­ໄຫວ​ດ້ານ​ສິດ­ທິ​ມະ­ນຸດ​ຂອງ​ກຳ­ມາ​ທິ​ການ ສຳ­ລັບ​ປີ 2019 ໃນ 3 ເສົາ­ຄ້ຳ​ອາ​ຊຽນ​ເພື່ອ​ປະ­ກອບ­ສ່ວນ​ເຂົ້າ​ໃສ່​ວິ­ໄສ​ທັດ​ການ​ສ້າງ​ປະ­ຊາ​ຄົມ​ອາ​ຊຽນ​ທີ່​ອີງ­ໃສ່​ປະ­ຊາ­ຊົນ ແລະ ເອົາ​ປະ­ຊາ­ຊົນ​ເປັນ­ໃຈ​ກາງ ໄດ້​ພົບ​ປະ​ປະ­ຈຳ​ປີ​ກັບ​ກຳ­ມະ­ການ​ຜູ້­ຕາງ­ໜ້າ​ຖາ­ວອນ 10 ປະ­ເທດ​ສະ­ມາ­ຊິກ​ອາ​ຊຽນ (CPR) ເຊິ່ງ​ໄດ້​ແລກ­ປ່ຽນ​ຄຳ​ຄິດ​ເຫັນ​ເປັນ​ການ​ຮັດ​ແໜ້ນ​ການ​ຮ່ວມ​ມື ແລະ ຊຸກ­ຍູ້​ການ​ປະ­ຕິ­ບັດ​ລະ­ບຽບ​ວາ­ລະ​ຂອງ​ອາ​ຊຽນ​ໃນ​ການ​ສົ່ງ­ເສີມ ແລະ ປົກ​ປ້ອງ​ສິດ­ທິ​ມະ­ນຸດ ໂດຍ​ສອດ­ຄ່ອງ​ກັບ​ຫຼັກ­ການ​ຂອງ​ອາ​ຊຽນ ນອກ​ນີ້ ຍັງ​ໄດ້​ປຶກ­ສາ​ຫາ­ລື​ຫົວ­ຂໍ້​ຕ່າງໆ​ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ ແລະ ກິດ­ຈະ­ກຳ​ບຸ­ລິ­ມະ­ສິດ​ຂອງ​ກຳ­ມາ​ທິ​ການ​ສິດ­ທິ​ມະ­ນຸດ​ອາ​ຊຽນ ກໍ​ຄື ການ​ປຶກ­ສາ​ຫາ­ລື​ເນື້ອ​ໃນ​ລະ­ບົບ​ຂອງ​ກຳ­ມາ​ທິ​ການ ແນ­ໃສ່​ຮັດ​ແໜ້ນ​ການ​ຮ່ວມ​ມື​ຂອງ​ກຳ­ມາ​ທິ​ການ​ກັບ​ອົງ​ກອນ ແລະ ຫົວ­ໜ່ວຍ​ຂະ­ແໜງ­ການ​ຂອງ​ອາ​ຊຽນ.

    ດ້ານ​ການ​ຮ່ວມ​ມື​ກັບ​ຄູ່​ຮ່ວມ​ເຈລະ­ຈາ​ຂອງ​ອາ​ຊຽນ ກຳ­ມາ​ທິ​ການ​ສິດ­ທິ​ມະ­ນຸດ​ອາ​ຊຽນ ຍັງ​ໄດ້​ພົບ​ປະ​ກັບ​ປະ­ເທດ​ອົດ​ສະ​ຕຣາ​ລີ ອາ​ເມ​ຣິ​ກາ ແລະ ສະ­ຫະ­ພາບ​ເອີ​ຣົບ ເພື່ອ​ປຶກ­ສາ​ຫາ­ລື​ຄວາມ​ເປັນ​ໄປ​ໄດ້​ດ້ານ​ຕ່າງໆ ເພື່ອ​ການ​ຮ່ວມ​ມື​ໃນ​ອະ­ນາ­ຄົດ​ດ້ານ​ສິດ­ທິ​ມະ­ນຸດ ເຊິ່ງ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ­ໂຫຍດ ພ້ອມ​ນີ້ ກຳ­ມາ​ທິ​ການ​ສິດ­ທິ​ມະ­ນຸດ​ອາ​ຊຽນ ຍັງ​ໄດ້​ພົບ​ປະ​ກັບ​ຄະ­ນະ​ຜູ້​ແທນ​ຈາກ​ອົງ­ການ​ຂ້າ​ຫຼວງ​ໃຫຍ່​ຂອງ​ສະ­ຫະ​ປະ­ຊາ​ຊາດ ເພື່ອ​ແຈ້ງ​ສະ­ພາບ​ການ​ປະ­ຕິ­ບັດ​ງານ​ຂອງ​ຕົນ​ໃນ​ພາກ​ພື້ນ ເຊິ່ງ​ກອງ​ປະ­ຊຸມ​ຄັ້ງ​ຕໍ່​ໄປ​ຈັດ​ຂຶ້ນ​ເດືອນ​ກໍ­ລະ­ກົດ 2019 ຢູ່​ບາງ­ກອກ​ປະ­ເທດ​ໄທ.

ຂ່າວທີ່ກ່ຽວຂ້ອງ