ຂ່າວຫຼ້າສຸດ

ເຢຍລະມັນຈ່າຍເງິນຫຼາຍເປັນປະຫວັດການ ໃຫ້ແກ່ບັນດາຜູ້ລີ້ໄພໃນປີ 2018

1.093 24 ພ.ພ. 2019 ຂ່າວຕ່າງປະເທດ
ເຢຍລະມັນຈ່າຍເງິນຫຼາຍເປັນປະຫວັດການ ໃຫ້ແກ່ບັນດາຜູ້ລີ້ໄພໃນປີ 2018

   ລັດຖະບານ​ເຢຍ​ລະ​ມັນ ແຈ້ງ​ໃຫ້​ຮູ້ເມື່ອ​ວັນ​ທີ 20 ພຶດສະພາ​ທີ່​ຜ່ານ​ມາ​ວ່າ ໃນ​ປີ 2018 ເຢຍ​ລະ​ມັນ ໄດ້​ຈ່າຍ​ເງິນ​ຫຼາຍ​ເປັນ​ປະຫວັດ​ການ​ທີ່ 23 ຕື້​ເອີ​ໂຣ (ເທົ່າ​ກັບ​ປະມານ 25,6 ຕື້​ໂດ​ລາ​ສະຫະລັດ) ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ຜູ້​ລີ້​ໄພ 1 ລ້ານ​ກວ່າ​ຄົນ ເຊື່ອມ​ໂຍງ​ຢູ່​ໃນ​ປະເທດ​ບ້ານ​ເກີດ ແລະ​ສະກັດ​ກັ້ນ​ກະແສ​ຜູ້​ຍ້າຍ​ຖິ່ນ​ຖານ​ອອກ​ໄປ​ຕ່າງປະເທດ. ຕົວ​ເລກ​ຈາກ​ກະຊວງ​ການ​ເງິນ​ເຢຍ​ລະ​ມັນ ໃຫ້​ຮູ້​ວ່າ ບ້ວງ​ເງິນ​ຈ່າຍ​ງົບປະມານ​ດັ່ງກ່າວ ເພີ່ມ​ຂຶ້ນ​ເກືອບ 11% ເມື່ອ​ທຽບໃສ່ 20,8 ຕື້​ເອີ​ໂຣ ທີ່​ໄດ້​ຈ່າຍ​ໄປ​ໃນ​ປີ 2017.

   ລະດັບ​ເພີ່ມ​ຂຶ້ນ​ນັ້ນ ຕົ້ນຕໍ​ແມ່ນ​ເປັນ​ຍ້ອນ​ລັດຖະບານ​ເຢຍ​ລະ​ມັນ ສຸມ​ໃສ່ ແລະ​ໃຫ້​ບຸລິມະສິດ​ຫຼາຍ​ຂຶ້ນ ໃຫ້​ແກ່​ບັນດາ​ມາດ​ຕະການ ເພື່ອ​ສະກັດ​ກັ້ນ​ກະແສ​ຜູ້​ຍ້າຍ​ຖິ່ນ​ຖານ ເຂົ້າ​ໄປ​ໃນ​ສະຫະພາບ​ເອີ​ຣົບ (EU) ກໍ​ຄື​ການ​ແກ້​ໄຂ​ການ​ເງື່ອນໄຂ​ການ​ດຳລົງ​ຊີວິດ ຂອງ​ຜູ້​ຍ້າຍ​ຖິ່ນ​ຖານ​ເຫຼົ່ານັ້ນ ຢູ່​ໃນ​ປະເທດ​ທີ່​ເປັນ​ບ້ານ​ເກີດ​ເມືອງ​ນອນ​ຂອງ​ເຂົາເຈົ້າ.

    ລວມ​ແລ້ວ ລັດຖະບານ​ເຢຍ​ລະ​ມັນ​ໄດ້​ຈ່າຍ 7,9 ຕື້​ເອີ​ໂຣ (ເພີ່ມ​ຂຶ້ນ​ປະມານ 16%) ພາຍ​ໃນ​ປີ 2018 ໃຫ້​ແກ່​ບັນດາ​ມາດ​ຕະການ​ຄື​ດັ່ງກ່າວ ເພື່ອ​ຮອງ​ຮັບ ແລະ​ແກ້​ໄຂ​ບັນດາ​ສາເຫດ​ທີ່​ເປັນ “ຮາກ​ເຫງົ້າ” ນຳໄປ​ສູ່​ສະພາບ​ການ​ຍ້າຍ​ຖິ່ນ​ຖານ​ໄປ​ຍັງ​ຕ່າງປະເທດ.

    ນະໂຍບາຍ​ທີ່​ເປີດ​ອົກ​ເປີດ​ໃຈ ຂອງ​ນາຍົກລັດຖະມົນຕີ​ເຢຍ​ລະ​ມັນ ແອນ​ເຈີ ເມີ​ເກລ ໃນ​ວິ​ກິດ​ການ​ຜູ້​ຍ້າຍ​ຖິ່ນ​ຖານ ເລີ່ມ​ແຕ່​ປີ 2015 ເປັນຕົ້ນ​ມາ ໄດ້​ຊ່ວຍ​ໃຫ້​ຜູ້​ລີ້​ໄພ 1 ລ້ານ​ກວ່າ​ຄົນ​ເຂົ້າ​ໄປ​ອາ​ໃສ​ຢູ່​ໃນ​ເຢຍ​ລະ​ມັນ. ໃນ​ຊຸມ​ປີ​ທີ່​ຜ່ານ​ມາ ຈຳນວນ​ຜູ້​ລີ້​ໄພ​ທີ່​ເຂົ້າ​ໄປ​ໃນ​ເຢຍ​ລະ​ມັນ​ໄດ້​ຫຼຸດ​ລົງ​ຢ່າງ​ແຮງ ແຕ່​ວ່າ​ໃນ​ແຕ່​ລະ​ເດືອນ ເຢຍ​ລະ​ມັນ​ຍັງ​ຕ້ອງ​ໄດ້​ຮັບ​ເອົາ​ຜູ້​ຂໍ​ລີ້​ໄພ​ໃໝ່ ປະມານ 11.000 ຄົນ.

ຂ່າວທີ່ກ່ຽວຂ້ອງ