ຂ່າວຫຼ້າສຸດ

ສຳເລັດຄັດເລືອກນັກກີລາ ເຂົ້າຮ່ວມແຂ່ງຂັນເຕະບານຊີງແຊັມອາຊຽນ

1.104 24 ພ.ພ. 2019 ວົງຈອນກີລາ
ສຳເລັດຄັດເລືອກນັກກີລາ ເຂົ້າຮ່ວມແຂ່ງຂັນເຕະບານຊີງແຊັມອາຊຽນ

    ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ຄັດ​ເລືອກ​ກິ­ລາ​ຕ່າງ​ແຂວງ 17 ຄົນ ເພື່ອ​ບັນ­ຈຸ​ເຂົ້າ​ທີມ​ຊາດ​ຮຸ່ນ​ອາ­ຍຸ​ບໍ່​ເກີນ 18 ປີ ຫຼື U 18 ກຽມ​ຄວາມ​ພ້ອມ​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ຊີງ​ແຊ້ມ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 18 ປີ ທີ່​ປະ­ເທດ​ຫວຽດ­ນາມ.

    ທ່ານ ວົງ​ມີ​ໄຊ ສຸກ​ບົວ​ຄຳ ຄະ­ນະ​ກຳ­ມະ­ການ​ຄັດ​ເລືອກ​ນັກ­ກີ­ລາ U 18 ຄູ​ເຝິກ​ນັກ­ກີ­ລາ​ທີມ​ຊາດ​ຍິງ​ຮຸ່ນ​ອາ­ຍຸ​ບໍ່​ເກີນ 19 ປີ ໃຫ້​ສຳ­ພາດ​ວ່າ: ການ​ຄັດ​ເລືອກ​ຄັ້ງ​ນີ້​ນັກ­ກີ­ລາ​ຕ່າງ​ແຂວງ​ເຂົ້າ​ຮ່ວມ 200 ກວ່າ​ຄົນ ແຕ່​ຄັດ​ເລືອກ​ໄດ້​ພຽງ​ແຕ່ 17 ຄົນ ເຊິ່ງ​ນັກ­ກີ­ລາ​ເຂົ້າ​ຮ່ວມ​ຄັດ​ເລືອກ​ຄັ້ງ​ນີ້ ມາ​ຈາກ​ແຂວງ​ສາ­ລະ​ວັນ ຫຼວງ​ພະ​ບາງ ບໍ​ລິ​ຄຳ​ໄຊ ສະ­ຫວັນ​ນະ​ເຂດ ຜົ້ງ​ສາ­ລີ ເຊ​ກອງ ຊຽງ​ຂວາງ ວຽງ​ຈັນ ໄຊ​ຍະ​ບູ​ລີ ອັດ​ຕະ​ປື ອຸ­ດົມ​ໄຊ ຄຳ​ມ່ວນ ຈຳ­ປາ​ສັກ ບໍ່​ແກ້ວ ໄຊ​ສົມ­ບູນ ແລະ ນັກ­ກີ­ລາ​ສະ­ໂມ­ສອນ​ຕ່າງໆ​ອ້ອມ​ຂ້າງ​ນະ­ຄອນ­ຫຼວງ​ວຽງ​ຈັນ ເຊິ່ງ​ການ​ຄັດ​ເລືອກ​ຈັດ​ຂຶ້ນ​ວັນ​ທີ 18-19 ພຶດ­ສະ­ພາ 2019 ນອກ​ນີ້ ຄະ­ນະ​ຄັດ​ເລືອກ​ຍັງ​ຈະ​ສືບ­ຕໍ່​ຄັດ​ເລືອກ​ເອົາ​ນັກ­ກີ­ລາ​ແຕ່​ລະ​ສະ­ໂມ­ສອນ ທີ່​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ສາຍ ກ ບັນ­ຈຸ​ເຂົ້າ U 18 ຕາມ​ໂກ​ຕ້າ​ທາງ ສຕລ ມອບ​ໝາຍ​ໃຫ້ ເພື່ອ​ກຽມ​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ຊີງ​ແຊ້ມ​ອາ­ຊີ​ຮຸ່ນ​ອາ­ຍຸ​ບໍ່​ເກີນ 18 ປີ ທີ່​ປະ­ເທດ​ຫວຽດ­ນາມ​ເປັນ​ເຈົ້າ­ພາບ ຈັດ​ຂຶ້ນ​ວັນ​ທີ 4-18 ສິງ­ຫາ 2019.

    ການ​ແຂ່ງ­ຂັນ​ຄັ້ງ​ນີ້​ມີ 12 ທີມ​ເຂົ້າ​ຮ່ວມ ແບ່ງ​ອອກ​ເປັນ 2 ກຸ່ມ​ຄື: ກຸ່ມ A ປະ­ກອບ​ມີ: ມຽນ​ມາ​ອິນ​ໂດ​ເນ​ເຊຍ ລາວ ຕີ​ມໍ​ເລ​ສ​ເຕ ຟີ​ລິບ​ປິນ ແລະ ບຣູ​ໄນ ສ່ວນ​ກຸ່ມ B ປະ­ກອບ​ມີ: ມາ​ເລ​ເຊຍ ໄທ ຫວຽດ­ນາມ ກຳ­ປູ­ເຈຍ ສິງ­ກະ­ໂປ ແລະ ອົດ​ສະ​ຕຣາ​ລີ.

ຂ່າວທີ່ກ່ຽວຂ້ອງ