ນັກກີລາເພາະກາຍສາວລາວ ຍາດໄດ້ທີ 5 ຊີງແຊັມອາຊຽນ

1.159 24 ພ.ພ. 2019 ວົງຈອນກີລາ
ນັກກີລາເພາະກາຍສາວລາວ ຍາດໄດ້ທີ 5 ຊີງແຊັມອາຊຽນ

    ສະ­ຫະ­ພັນ​ກີ­ລາ​ເພາະ​ກາຍ​ແຫ່ງ​ຊາດ​ລາວ ສົ່ງ​ນັກ­ກີ­ລາ 2 ຄົນ (ຍິງ 1 ຊາຍ 1) ພ້ອມ​ດ້ວຍ​ກຳ­ມະ­ການ​ຕັດ­ສິນ 2 ທ່ານ ແລະ ຄະ­ນະ​ພ້ອມ​ດ້ວຍ​ຜູ້​ຕິດ­ຕາມ 5 ຄົນ ລວມ 9 ຄົນ ເຂົ້າ​ຮ່ວມ​ແຂ່ງ­ຂັນ​ເພາະ​ກາຍ ລາຍ­ການ​ຊີງ​ແຊັມ​ອາ​ຊຽນ ຄັ້ງ​ທີ 16 ທີ່​ປະ­ເທດ​ມຽນ​ມາ ໃນ​ລະ­ຫວ່າງ 16-21 ພຶດ­ສະ­ພາ 2019 ຜ່ານ​ມາ.

    ສຳ­ລັບ​ນັກ­ກີ­ລາ 2 ຄົນ ໃນ​ປະ­ເພດ​ຊາຍ-ຍິງ ລົງ​ແຂ່ງ­ຂັນ​ໃນ​ປະ­ເພດ​ຫຸ່ນ​ງາມ ປະ­ກອບ​ມີ ທ້າວ ນັນ­ທະ​ລັກ ສຸ​ນາ​ເຄນ ຈາກ happyness fitnesses ລົງ​ທຳ​ການ​ແຂ່ງ­ຂັນ​ໃນ​ລຸ້ນ men sport physique ຮຸ່ນ​ຄວາມ​ສູງ​ບໍ່​ເກີນ 170 ຊັງ​ຕີ​ແມັດ ໃນ​ວັນ​ທີ 18 ພຶດ­ສະ­ພາ 2019 ບໍ່​ຜ່ານ​ການ​ແຂ່ງ­ຂັນ​ໃນ​ຮອບ​ຄັດ​ເລືອກ ສ່ວນ​ນາງ ກອງ​ແພງ ຂຸນ​ວິ­ໄນ ຈາກ up2u fitnesses ລົງ​ທຳ​ການ​ແຂ່ງ­ຂັນ​ໃນ​ລຸ້ນ model physique ຮຸ່ນ​ຄວາມ​ສູງ​ບໍ່​ເກີນ 160 ຊັງ​ຕີ​ແມັດ ຜ່ານ​ການ​ແຂ່ງ­ຂັນ​ສາ­ມາດ​ຍາດ​ໄດ້​ອັນ​ດັບ​ທີ 5 ມາ​ຄອງ.

    ນອກ­ຈາກ​ນີ້ ສະ­ຫະ­ພັນ​ກີ­ລາ​ເພາະ​ກາຍ​ແຫ່ງ​ຊາດ ຍັງ​ໄດ້​ສົ່ງ​ກຳ­ມະ­ການ​ຕັດ­ສິນ 2 ທ່ານ ຄື: ທ່ານ ອາ​ພິ​ຊາດ ພັນ­ທະ​ລີ ແລະ ທ່ານ​ນາງ ພອຍ​ໄພ­ລິນ ພັນ­ທະ​ລີ ເຂົ້າ​ຮ່ວມ​ເຝິກ­ອົບ­ຮົມ ແລະ ໄດ້​ຮັບ​ຕຳ­ແໜ່ງ​ເປັນ​ກຳ­ມະ­ການ​ຕັດ­ສິນ​ຂອງ​ສະ­ຫະ­ພັນ​ກີ­ລາ​ເພາະ​ກາຍ​ອາ​ຊຽນ ແນວ­ໃດ​ກໍ​ດີ ທ່ານ​ນາງ ພອຍ​ໄພ­ລິນ ພັນ­ທະ​ລີ ກໍ​ແມ່ນ​ນັກ­ກີ­ລາ​ທີມ​ຊາດ​ລາວ ແລະ ກໍ​ເປັນ​ທັງ​ກຳ­ມະ­ການ​ຜູ້­ຍິງ​ຄົນ​ທຳ​ອິດ​ຈາກ ສປປ ລາວ ທີ່​ເຂົ້າ​ຮ່ວມ​ຕັດ­ສິນ​ໃນ​ການ​ແຂ່ງ­ຂັນ​ກີ­ລາ​ເພາະ​ກາຍ​ແຫ່ງ​ອາ­ຊີ​ຕາ­ເວັນ​ອອກ­ສຽງ​ໃຕ້ ຄັ້ງ​ທີ 16 ທີ່​ຢາງ​ກຸ້ງ ປະ­ເທດ​ມຽນ​ມາ ໃນ​ລະ­ຫວ່າງ​ວັນ​ທີ 16-21 ພຶດ­ສະ­ພາ 2019 ປັດ­ຈຸ­ບັນ ສະ­ຫະ­ພັນ​ເພາະ​ກາຍ​ແຫ່ງ​ຊາດ​ລາວ ມີ​ກຳ­ມະ­ການ​ທັງ​ໝົດ 3 ທ່ານ ຄື: ທ່ານ ກົງ​ປະ­ເສີດ ແພງ​ແສນ ກຳ­ມະ­ການ​ສະ­ຫະ­ພັນ​ເພາະ​ກາຍ​ໂລກ ແລະ 2 ທ່ານ ແມ່ນ​ກຳ­ມະ­ການ​ສະ­ຫະ­ພັນ​ເພາະ​ກາຍ​ອາ​ຊຽນ.

ຂ່າວທີ່ກ່ຽວຂ້ອງ