ຂ່າວຫຼ້າສຸດ

ລັດຖະບານ ສຸມໃສ່ປະຕິບັດຫຼາຍໜ້າວຽກສຳຄັນ

1.022 24 ພ.ພ. 2019 ຂ່າວໜ້າ​ໜຶ່ງ
ລັດຖະບານ ສຸມໃສ່ປະຕິບັດຫຼາຍໜ້າວຽກສຳຄັນ

    ກອງ​ປະ­ຊຸມ​ລັດ­ຖະ­ບານ​ສະ­ໄໝ​ສາ­ມັນ ປະ­ຈຳ​ເດືອນ​ພຶດ­ສະ­ພາ ຈັດ​ຂຶ້ນ​ວັນ​ທີ 22-23 ພຶດ­ສະ­ພາ 2019 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໂດຍ​ເປັນ​ປະ­ທານ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ມີ​ບັນ­ດາ​ຮອງ​ນາ­ຍົກ­ລັດ­ຖະ­ມົນ­ຕີ ແລະ ສະ­ມາ­ຊິກ​ລັດ­ຖະ­ບານ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ສຸມ​ໃສ່​ປຶກ­ສາ​ຫາ­ລື ປະ­ກອບ​ຄຳ​ຄິດ​ຄຳ​ເຫັນ ແລະ ພິ­ຈາ­ລະ­ນາ​ຮັບ­ຮອງ​ເອົາ 7 ບົດ​ລາຍ​ງານ​ດັ່ງ­ນີ້: ບົດ​ລາຍ​ງານ​ການ​ຟື້ນ​ຟູ ແລະ ປູກ​ໄມ້ ເພື່ອ​ບັນ­ລຸ​ຄາດ­ໝາຍ​ເນື້ອ­ທີ່​ປ່າ​ປົກ​ຫຸ້ມ​ປີ 2020 ບົດ​ລາຍ​ງານ​ກ່ຽວ​ກັບ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ທີ່​ຕິດ​ພັນ​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ບົດ​ລາຍ​ງານ​ກ່ຽວ​ກັບ​ການ​ສະ­ຫຼຸບ​ຕີ​ລາ­ຄາ ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ວ່າ​ດ້ວຍ​ການ​ປັບ­ປຸງ​ບັນ­ດາ​ລະ­ບຽບ​ການ ແລະ ກົນ​ໄກ​ການ​ປະ­ສານ​ງານ​ໃນ​ການ​ດຳ­ເນີນ​ທຸ­ລະ​ກິດ​ຢູ່​ລາວ ບົດ​ລາຍ​ງານ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ປີ​ທ່ອງ​ທ່ຽວ​ລາວ-ຈີນ 5 ເດືອນ​ຕົ້ນ​ປີ ແລະ ວຽກ​ງານ​ຈຸດ​ສຸມ​ປີ​ທ່ອງ​ທ່ຽວ​ລາວ-ຈີນ 2019 ບົດ​ລາຍ​ງານ​ກ່ຽວ​ກັບ​ການ​ຄຸ້ມ​ຄອງ​ການ​ອອກ​ໃບ​ຕາ­ດິນ​ຊ້ຳ​ຊ້ອນ ໃນ​ໄລ­ຍະ​ຜ່ານ​ມາ ແລະ ມາດ​ຕະ­ການ​ແກ້​ໄຂ​ໃນ­ຕໍ່­ໜ້າ ບົດ​ລາຍ​ງານ​ການ​ປັບ­ປຸງ​ຮ່າງ​ລັດ​ຖະ​ບັນ­ຍັດ​ວ່າ​ດ້ວຍ​ຄ່າ​ທຳ­ນຽມ ແລະ ຄ່າ​ບໍ­ລິ­ການ ບົດ​ລາຍ​ງານ​ກ່ຽວ​ກັບ​ບັນ­ຊີ​ລາຍ­ການ​ໄມ້ ແລະ ຜະ­ລິດ​ຕະ​ພັນ​ໄມ້​ເພື່ອ​ສົ່ງ​ອອກ.

    ກອງ​ປະ­ຊຸມ​ໄດ້​ປຶກ­ສາ​ຫາ­ລື​ດ້ວຍ​ຄວາມ​ຮັບ­ຜິດ­ຊອບ​ສູງ​ມີ​ການ​ວິ­ເຄາະ ວິ­ໄຈ ຍົກ​ໃຫ້​ເຫັນ​ບັນ­ຫາ​ສາ­ເຫດ ແລະ ມີ​ມາດ​ຕະ­ການ​ແກ້​ໄຂ​ໃນ­ຕໍ່­ໜ້າ ແລະ ເຫັນ​ດີ​ດ້ານ​ຫຼັກ­ການ​ຮັບ­ຮອງ​ເອົາ 7 ບົດ​ລາຍ​ງານ​ດັ່ງ­ກ່າວ ພ້ອມ​ທັງ​ຊີ້​ນຳ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ ນຳ­ໄປ​ປັບ­ປຸງ​ຕາມ​ການ​ປະ­ກອບ​ຄຳ​ເຫັນ​ຂອງ​ສະ­ມາ­ຊິກ​ລັດ­ຖະ­ບານ ເພື່ອ​ເຮັດ​ໃຫ້​ມີ​ເນື້ອ​ໃນ​ຮັດ­ກຸມ ເລິກ­ເຊິ່ງ ແລະ ແທດ​ຕົວ​ຈິງ ກ່ອນ​ຈະ​ນຳ​ສະ­ເໜີ​ຕໍ່​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ 8.

    ສຳ­ລັບ​ວຽກ​ງານ​ໃນ​ໜຶ່ງ​ເດືອນ​ຜ່ານ​ມາ ລັດ­ຖະ­ບານ​ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ​ຈຸດ​ສຸມ​ທີ່​ສຳ­ຄັນ​ຈຳ­ນວນ​ໜຶ່ງ​ຄື: ໄດ້​ຕິດ­ຕາມ ແລະ ແກ້​ໄຂ​ບັນ­ດາ​ປາ­ກົດ­ການ​ຫຍໍ້­ທໍ້​ຂອງ​ສັງ­ຄົມ​ເຊັ່ນ: ອຸ­ບັດ­ເຫດ​ຕາມ​ຖະ­ໜົນ ຢາ​ເສບ​ຕິດ ຂີ້­ລັກ​ງັດ​ແງະ ແລະ ອື່ນໆ ກະ­ກຽມ ແລະ ເຂົ້າ​ຮ່ວມ​ກອງ​ປະ­ຊຸມ​ຄົບ​ຄະ­ນະ​ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 8 ສຳ­ເລັດ​ກະ­ກຽມ​ໃຫ້​ສະ­ຫາຍ​ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ​ໄປ​ເຂົ້າ​ຮ່ວມ​ກອງ​ປະ­ຊຸມ ໜຶ່ງ​ແລວ ໜຶ່ງ​ເສັ້ນ­ທາງ ແລະ ຢ້ຽມ­ຢາມ​ລັດ​ຖະ​ກິດ​ຢູ່ ສປ ຈີນ ເອົາ­ໃຈ­ໃສ່​ປະ­ຕິ­ບັດ​ວຽກ​ງານ​ຈຸດ​ສຸມ​ທາງ​ດ້ານ​ເສດ­ຖະ­ກິດ-ສັງ­ຄົມ ການ​ປົກ­ຄອງ ນິ­ຕິ​ກຳ ຕ່າງ­ປະ­ເທດ ແລະ ອື່ນໆ ຄົ້ນ­ຄວ້າ ແລະ ປະ­ສານ​ງານ​ເພື່ອ​ແກ້​ໄຂ​ການ​ສະ­ເໜີ​ຂອງ​ປະ­ຊາ­ຊົນ​ຜ່ານ​ສາຍ​ດ່ວນ 1516 ແລະ ສື່​ສັງ­ຄົມ​ອອນ​ລາຍ ລວມ​ທັງ​ໝົດ 19 ບັນ­ຫາ ແລະ 29 ຄຳ​ສະ­ເໜີ ພິ­ຈາ­ລະ­ນາ ຕົກ­ລົງ ຫຼື ໃຫ້​ທິດ​ຊີ້​ນຳ​ຕໍ່​ຫຼາຍ​ບັນ­ຫາ​ທີ່​ສຳ­ຄັນ​ທາງ​ດ້ານ​ເສດ­ຖະ­ກິດ-ສັງ­ຄົມ ຜ່ານ​ກົນ​ໄກ​ກອງ​ປະ­ຊຸມ​ນາ­ຍົກ-ຮອງ​ນາ­ຍົກ ລວມ​ທັງ​ໝົດ 11 ຫົວ­ຂໍ້ ພ້ອມ​ທັງ​ໄດ້​ພິ­ຈາ­ລະ­ນາ ແລະ ອອກ​ນິ­ຕິ​ກຳ​ລຸ່ມ​ກົດ­ໝາຍ ເຊິ່ງ​ລວມ​ມີ​ດຳ­ລັດ ຂໍ້​ຕົກ­ລົງ ແລະ ແຈ້ງ​ການ​ລວມ​ທັງ​ໝົດ 210 ສະ­ບັບ​ຄຽງ​ຄູ່​ກັບ​ການ​ປະ­ຕິ­ບັດ​ວຽກ​ຈຸດ​ສຸມ​ທີ່​ຜ່ານ​ມາ​ນັ້ນ ກໍ​ມີ​ຫຼາຍ​ວຽກ​ທີ່​ຍັງ​ຄົງ​ຄ້າງ ແລະ ຈະ​ຕ້ອງ​ໄດ້​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໄປ​ເດືອນ​ຕໍ່​ໄປ ໃຫ້​ມີ​ປະ​ສິດ­ທິ​ຜົນ​ກວ່າ​ເກົ່າ ເປັນ­ຕົ້ນ ການ​ເກັບ​ລາຍ​ຮັບ ແລະ ປະ­ຕິ­ບັດ​ລາຍ​ຈ່າຍ​ງົບ­ປະ­ມານ ການ​ແກ້​ໄຂ​ປາ­ກົດ­ການ​ຫຍໍ້­ທໍ້​ທາງ​ສັງ­ຄົມ ແລະ ຄຳ​ສະ­ເໜີ​ຂອງ​ປະ­ຊາ­ຊົນ​ຍັງ​ຊັກ​ຊ້າ ແລະ ອື່ນໆ.

ຂ່າວທີ່ກ່ຽວຂ້ອງ