ວິສາຂະບູຊາ ຢ່າຫຼົງແຕ່ພິທີກຳ

1.494 27 ພ.ພ. 2019 ນານາສາລະ

    ເຮັດ­ບຸນ​ເອົາ­ໜ້າ ສັດ­ທາ​ຫົວ​ເຕົ່າ ນີ້​ກໍ​ແມ່ນ​ທາງ​ໜຶ່ງ​ເຮັດ​ໃຫ້​ຄົນ​ເຂົ້າ​ບໍ່​ເຖິງ​ຫຼັກ​ທຳ​ມະ ທີ່​ເປັນ​ຄຳ​ສອນ​ໃນ​ການ​ດຳ­ເນີນ​ຊີ­ວິດ ສຳ­ລັບ​ຜູ້​ທີ່​ເປັນ​ຊາວ​ພຸດ​ບໍ່​ຄວນ​ລືມ​ວ່າ: ອົງ­ການ​ສະ­ຫະ​ປະ­ຊາ​ຊາດ ໄດ້​ປະ­ກາດ​ກຳ­ນົດ​ໃຫ້​ວັນ​ວິ­ສາ­ຂະ­ບູ­ຊາ​ໃຫ້​ເປັນ​ວັນ​ສຳ­ຄັນ​ຂອງ​ໂລກ  ປີ 1980 ປີ​ນີ້ ປະ­ເທດ​ຫວຽດ­ນາມ​ເປັນ​ເຈົ້າ­ພາບ​ຈັດ​ປະ­ຊຸມ​ວັນ​ວິ­ສາ­ຂະ​ໂລກ ສຳ­ລັບ​ບ້ານ​ເຮົາ​ທັງ​ພາກ​ລັດ ອົງ­ການ​ພຸດ​ທະ​ສາ­ສະ­ໜາ​ສູນ​ກາງ ກໍ​ໄດ້​ຈັດ​ພິ­ທີ​ສະ­ຫຼອງ​ວັນ​ວິ­ສາ­ຂະ­ບູ­ຊາ ເຮັດ​ໃຫ້​ຄົນ​ລາວ​ຊາວ​ພຸດ​ຕື່ນ​ໂຕ​ຫຼາຍ​ຂຶ້ນ​ຕໍ່​ບຸນ​ດັ່ງ­ກ່າວ.

    ພະ­ພຸດ­ທະ­ເຈົ້າ​ສອນ​ສາ­ວົກ​ຂອງ​ພະ­ສົງ​ບໍ່​ໄດ້​ເນັ້ນ​ພິ­ທີ­ກຳ ແຕ່​ພະ­ສົງ​ພະ­ຍາ­ຍາມ​ສອນ​ທຳ​ມະ​ທີ່​ເປັນ​ຫຼັກ​ທຳ​ມະ​ໃນ​ການ​ດຳ­ເນີນ​ຊີ­ວິດ ເພື່ອ​ໃຫ້​ປະ­ຊາ­ຊົນ​ເກີດ​ປັນ­ຍາ​ຫຼຸດ​ພົ້ນ​ອອກ​ຈາກ​ການ​ເຊື່ອ​ຖື​ງົມ­ງວາຍ ເຊິ່ງ​ມີ​ພຽງ​ການ​ສຶກ​ສາ​ຫຼັກ​ທຳ​ມະ​ໃຫ້​ຮູ້​ແຈ້ງ​ເທົ່າ​ນັ້ນ ທີ່​ສາ­ມາດ​ສ້າງ​ຄວາມ­ສຸກ​ໃຫ້​ເກີດ​ຂຶ້ນ​ໃນ​ຊີ­ວິດ ວິ­ສາ­ຂະ­ບູ­ຊາ​ເປັນ​ວັນ​ສຳ­ຄັນ ເພາະ­ວ່າ​ພະ­ພຸດ­ທະ­ເຈົ້າ​ປະ­ສູດ ຕັດ­ສະ­ຮູ້ ແລະ ປະ​ວິ​ນິບ​ພານ​ໃນ​ມື້​ດຽວ​ກັນ ເຊິ່ງ​ກົງ​ກັບ​ວັນ­ເພັງ​ຂຶ້ນ 15 ຄ່ຳ ເດືອນ 6 ຖ້າ­ວ່າ​ພິ­ທີ­ກຳ​ໃດ​ໜຶ່ງ​ຖືກ​ຈັດ​ຂຶ້ນ ແຕ່​ຜູ້​ເຂົ້າ​ຮ່ວມ​ບໍ່​ໄດ້​ຮຽນ​ຮູ້​ແກ່ນ​ແທ້ ຫຼື ຫຼັກ​ທຳ​ຄຳ​ສອນ ສິ່ງ​ນີ້​ກໍ​ເປັນ​ເລື່ອງ​ທີ່​ໜ້າ​ຄິດ​ຢູ່​ບໍ່​ໜ້ອຍ.

    ຫຼັກ​ທຳ​ມະ​ທີ່​ຊາວ​ພຸດ​ຄວນ​ນຳ​ມາ​ປະ­ຕິ­ບັດ ຫຼື ສຶກ​ສາ​ໃຫ້​ຮູ້​ແຈ້ງ ກໍ​ຄື ຫຼັກ​ຂອງ​ອະ­ລິ­ຍະ​ສັດ 4 ເຊິ່ງ​ເປັນ​ຫຼັກ​ທຳ​ມະ​ແກ້​ບັນ­ຫາ​ຊີ­ວິດ: (1) ທຸກ ຄື​ຄວາມ​ບໍ່​ສະ­ບາຍ​ກາຍ ແລະ ໃຈ (ຮັບ​ຮູ້​ບັນ­ຫາ) (2) ສະ​ມຸ​ໄທ ຄື​ຕົ້ນ​ເຫດ​ຂອງ​ຄວາມ­ທຸກ ໄດ້­ແກ່ ກິ​ເຫຼດ ແລະ ຕັນ­ຫາ (ຕົ້ນ​ເຫດ​ຂອງ​ບັນ­ຫາ) (3) ນິ​ໂຣດ ຄື​ຈຸດ­ໝາຍ​ທີ່​ຈະ​ດັບ​ທຸກ ເຊິ່ງ​ເປັນ​ການ​ວາງ​ເປົ້າ​ໝາຍ​ໃຫ້​ແຈ່ມ​ແຈ້ງ​ຊັດ​ເຈນ (4) ນັກ ຄື ແນວ­ທາງ​ໃນ​ການ​ປະ­ຕິ­ບັດ​ເພື່ອ​ດັບ​ທຸກ (ລົງ­ມື​ແກ້​ໄຂ​ບັນ­ຫາ) ເຊິ່ງ​ມັນ​ຄື​ແນວ­ທາງ​ດັບ​ທຸກ​ນັ້ນ ມີ​ອົງ​ປະ­ກອບ 8 ປະ­ການ ເຊິ່ງ​ຂຶ້ນ​ຕົ້ນ​ດ້ວຍ ສຳ​ມາ​ທິດ​ຖິ ຄື: ຕັ້ງ​ຄວາມ​ຄິດ​ເຫັນ​ໃຫ້​ຖືກ­ຕ້ອງ ໝາຍ​ຄວາມ​ວ່າ: ໃຫ້​ມີ​ປັນ­ຍາ​ທີ່​ຖືກ­ຕ້ອງ​ນັ້ນ​ເອງ ປັນ­ຍາ​ທີ່​ຖືກ­ຕ້ອງ​ນັ້ນ ຕ້ອງ​ແມ່ນ​ປັນ­ຍາ​ແກ້​ໄຂ​ຊີ­ວິດ ຖືກ​ແທ້​ໃນ​ວຽກ​ງານ ຖືກ​ບໍ່​ແມ່ນ​ປັນ­ຍາ​ເອົາ​ມາ​ສໍ້​ໂກງ​ບຽດ­ບຽນ​ມະ­ນຸ​ດ້ວຍ​ກັນ.

    ຫຼັກ​ທຳ​ມະ​ອີກ​ປະ­ການ​ໜຶ່ງ ກໍ​ຄື ເລື່ອງ​ຂອງ​ການ​ຢູ່​ຢ່າງ​ມີ​ສະ­ຕິ​ສຳ​ປະ­ຊັນ​ຍະ​ໃຫ້​ເຮົາ​ຮູ້­ຈັກ​ໜ້າ­ທີ່​ວຽກ​ງານ​ຂອງ​ຕົນ ບໍ່​ຫຼົງ­ໄຫຼ​ເພີດ­ເພີນ​ໃນ​ມານ​ຍາ​ຂອງ​ໂລກ ເພາະ​ກ່ອນ​ທີ່​ພະ­ພຸດ­ທະ­ເຈົ້າ​ຈະ​ຈາກ​ພວກ​ເຮົາ​ໄປ ກໍ​ໄດ້​ສອນ​ໄວ້​ວ່າ ພວກ​ເຮົາ​ທັງ­ຫຼາຍ​ຈົ່ງ​ເປັນ​ຢູ່​ຢ່າງ​ມີ​ສະ­ຕິ ພ້ອມ​ດ້ວຍ​ຄວາມ​ບໍ່່​ປະ­ໝາດ ຜູ້​ຂຽນ​ເຫັນ​ວ່າ ມີ​ແຕ່​ການ​ສຶກ​ສາ​ທຳ​ມະ​ໃຫ້​ຮູ້​ແຈ້ງ ແລ້ວ​ນຳ​ມາ​ປະ­ຕິ­ບັດ​ໃນ​ຊີ­ວິດ ຈຶ່ງ​ຈະ​ພົບ​ຄວາມ­ສຸກ ເຊິ່ງ​ບໍ່​ເນັ້ນ​ພຽງ​ສອນ​ເລື່ອງ​ສັດ­ທາ​ຢ່າງ​ດຽວ.

ດັ້ນກີບເມກ

ຂ່າວທີ່ກ່ຽວຂ້ອງ