ຂ່າວຫຼ້າສຸດ

ຮ່ວມມືກັນພັດທະນາຜະລິດຕະພັນປະກັນໄພ

541 27 ພ.ພ. 2019 ຂ່າວໜ້າ​ໜຶ່ງ
ຮ່ວມມືກັນພັດທະນາຜະລິດຕະພັນປະກັນໄພ

    ພິທີ​ເຊັນ​ສັນຍາ​ຮ່ວມ​ມື​ລະຫວ່າງ​ບໍລິສັດ ພົງ​ສະຫວັນ ປະກັນ​ໄພ (ເອ​ພີ​ເອ) ຈຳກັດ ແລະ ບໍລິສັດ ເຈ​ແອນ​ຊີ ເຊີ​ວິດ ຈຳກັດ​ຜູ້​ດຽວ ຈັດ​ຂຶ້ນ​ວັນ​ທີ 24 ພຶດສະພາ 2019 ທີ່​ນະຄອນຫຼວງ​ວຽງ​ຈັນ ລົງ​ນາມ​ລະຫວ່າງ​ທ່ານ ໂດ​ມິ​ນິກ ວິນ​ລ້ຽມ ຜູ້ອຳນວຍການ​ໃຫຍ່ ບໍລິສັດ ພົງ​ສະຫວັນ ປະກັນ​ໄພ ຈຳກັດ ແລະ ທ່ານ ສະ​ເຕ​ຟານ ແອັສ​ແບັກ ຜູ້ອຳນວຍການ​ໃຫຍ່​ຂອງ​ບໍລິສັດ ເຈ​ແອນ​ຊີ​ເຊີ​ວິດ ຈຳກັດ​ຜູ້​ດຽວ ມີ​ທ່ານ​ນາງ ແສງ​ດາວ ບຸ​ພະ​ກອນ​ຄຳ ປະທານ​ສະພາ​ບໍລິຫານ ແລະ ທ່ານ ໄພບູນ ພົງ​ສະຫວັນ ປະທານ​ກຸ່ມ​ບໍລິສັດ ພົງ​ສະຫວັນ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ໂດ​ມິ​ນິກ ວິນ​ລ້ຽມ ກ່າວ​ວ່າ: ການ​ຮ່ວມ​ມື​ຄັ້ງ​ນີ້ ບໍລິສັດ ປະກັນ​ໄພ ເອ​ພີ​ເອ ເປັນ​ສ່ວນ​ສຳຄັນ​ຂອງ​ການ​ບໍລິການ​ທີ່​ມີ​ຄຸນ​ນະ​ພາບ ທີ່​ເຈ​ແອນ​ຊີ​ເຊີ​ວິດ ຈະ​ມອບ​ໃຫ້​ແກ່​ລູກ​ຄ້າ ແລະ ພວກ​ເຮົາ​ຈະ​ເຮັດ​ວຽກ​ກັບ​ເຈ​ແອນ​ຊີ ເພື່ອ​ໝັ້ນ​ໃຈ​ໄດ້​ວ່າ​ຈະ​ເກີດ​ປະໂຫຍດ ແລະ ບັນລຸ​ເປົ້າ​ທີ່​ຈະ​ເປັນ​ຜູ້ນຳ​ດ້ານ​ຜະລິດ​ຕະ​ພັນ​ປະກັນ​ໄພ​ຢ່າງ​ທີ່​ໄດ້​ຕັ້ງໃຈ​ໄວ້ ລູກ​ຄ້າ​ທີ່​ເປັນ​ຄົນ​ຕ່າງ​ຊາດ​ຈະ​ມີ​ຄວາມ​ຮຽກຮ້ອງ​ຕ້ອງການ ແລະ ການ​ບໍລິການ​ທີ່​ແຕກ​ຕ່າງ​ຈາກ​ລູກ​ຄ້າ​ທີ່​ເປັນ​ຄົນ​ລາວ ແລະ ນີ້​ແມ່ນ​ເປັນ​ການ​ດີ​ສຳລັບ​ເຈ​ແອນ​ຊີ ທີ່​ໄດ້​ຮ່ວມ​ມື​ກັບ​ປະກັນ​ໄພ​ເອ​ພີ​ເອ​ທີ່​ມີ​ຄວາມ​ເຂົ້າໃຈ​ໃນ​ຈຸດ​ນີ້​ເຊັ່ນ​ດຽວ​ກັນ ທີ່​ສອງ​ບໍລິສັດ​ມາ​ສ້າງຕັ້ງ​ທຸລະ​ກິດ​ເປັນ​ນາຍ​ໜ້າ​ປະກັນ​ໄພ​ມັນ​ຍິ່ງ​ເຮັດ​ໃຫ້​ເອ​ພີ​ເອ ແລະ ເຈ​ແອນ​ຊີ ເປັນ​ຄູ່​ຮ່ວມ​ທຸລະ​ກິດ​ທີ່​ເໝາະ​ສົມ ແລະ ສົມບູນ​ແບບ​ທີ່​ສຸດ ການ​ຮ່ວມ​ມື​ຄັ້ງ​ນີ້​ເປັນ​ບາດກ້າວ​ທີ່​ສຳຄັນ ທີ່​ຈະ​ເສີມ​ສ້າງ​ຄວາມ​ເຂັ້ມແຂງ​ໃນ​ຕະຫຼາດ​ປະກັນ​ໄພ​ຈະ​ສາມາດ​ປົກ​ປ້ອງ ແລະ ຮັກສາ​ສິດຜົນປະໂຫຍດ​ໃຫ້​ລູກ​ຄ້າ.

    ທ່ານ ສະ​ເຕ​ຟານ ແອັສ​ແບັກ ກ່າວ​ວ່າ: ປັດຈຸບັນ​ມີ​ຜູ້​ໃຫ້​ບໍລິການ​ປະກັນ​ໄພ​ຫຼາຍ​ກວ່າ 24 ບໍລິສັດ​ຢູ່​ລາວ ພວກ​ເຂົາ​ສ່ວນ​ຫຼາຍ​ແນໃສ່​ແຕ່​ຮັກສາ​ມາດຕະຖານ ແຕ່​ບໍ່​ໄດ້​ເລັງ​ເຫັນ​ຄວາມ​ສຳຄັນ ໃນ​ການ​ສ້າງ​ຜະລິດ​ຕະ​ພັນ​ປະກັນ​ໄພ​ໃໝ່ ຫຼື ປັບປຸງ​ມາດຕະຖານ​ຂອງ​ຜະລິດ​ຕະ​ພັນ​ທີ່​ມີ​ຢູ່​ແລ້ວ ໃຫ້​ເໝາະ​ກັບ​ສະພາບ​ຄວາມ​ຕ້ອງການ​ໃນ ເອ​ພີ​ເອ ທີ່​ກຳລັງ​ຂຸ້ນຂ້ຽວ​ໃນ​ການ​ສ້າງ​ຜະລິດ​ຕະ​ພັນ​ໃໝ່ ແລະ ປັບປຸງ​ຜະລິດ​ຕະ​ພັນ​ທີ່​ມີ​ຢູ່​ແລ້ວ ໃຫ້​ແທດເໝາະ​ກັບ​ຄວາມ​ຕ້ອງການ​ຕົວ​ຈິງ​ຂອງ​ລູກ​ຄ້າ ຈະ​ສຳເລັດ​ຢ່າງ​ເປັນ​ມື​ອາຊີບ ໃນ​ການ​ໃຫ້​ເຄື່ອງມື​ຕ່າງໆ​ທີ່​ເຈ​ແອນ​ຊີ​ຈະ​ຕ້ອງ​ບໍລິການ ແລະ ຊ່ວຍເຫຼືອ​ລູກ​ຄ້າ​ໃຫ້​ດີ ການ​ຮ່ວມ​ມື​ກັບ​ເອ​ພີ​ເອ​ຄັ້ງ​ນີ້​ເຮັດ​ໃຫ້​ມີ​ການ​ພັດທະນາ​ຜະລິດ​ຕະ​ພັນ​ໃໝ່​ຈຳນວນ​ໜຶ່ງ ທີ່​ບໍ່​ຄື​ໃຜ​ໃນ​ຕະຫຼາດ ແລະ ໜຶ່ງ​ໃນ​ນັ້ນ​ກໍ​ແມ່ນ​ປະກັນ​ໄພ​ລົດ​ທີ່​ມີ​ວົງ​ເງິນ​ຄຸ້ມ​ຄອງ​ສູງ​ທີ່​ສຸດ​ໃນ​ລາວ ແລະ ອີກ​ຜະລິດ​ຕະ​ພັນ​ໜຶ່ງ​ປະກັນ​ໄພ​ຊັບ​ສິນ​ທີ່​ຄຸ້ມ​ຄອງ​ບຸກຄົນ​ພາຍ​ນອກ ສຳລັບ​ຮ້ານ​ອາຫານ ແລະ ໂຮງແຮມ ທີ່​ຄຸ້ມ​ຄອງ​ເຖິງ​ອາຫານ​ທີ່​ເປັນ​ພິດ​ໃຫ້​ລູກ​ຄ້າ​ທີ່​ມາ​ໃຊ້​ບໍລິການ​ຮ້ານ​ອາຫານ ຫຼື ໂຮງແຮມ ແລະ ສຸດ​ທ້າຍ​ແມ່ນ​ປະກັນ​ໄພ​ສຸຂະພາບ ທີ່​ຖື​ໄດ້​ວ່າ​ເປັນ​ສາກົນ​ກຳລັງ​ຈະ​ເປີດ​ໄວໆ​ນີ້ ທີ່​ເໝາະ​ສຳລັບ​ລູກ​ຄ້າ​ຄົນ​ລາວ ແລະ ຄົນ​ຕ່າງປະເທດ​ທີ່​ອາໄສ​ໃນ​ລາວ ແລະ ມີ​ອີກ​ຫຼາຍ​ຜະລິດ​ຕະ​ພັນ​ທີ່​ມີ​ຢູ່​ໃນ​ແຜນ ເຊິ່ງ​ພວກ​ເຮົາ​ຈະ​ຊຸກຍູ້​ເພື່ອ​ຕອບ​ສະໜອງ​ຄວາມ​ຕ້ອງການ ແລະ ຄວາມ​ຄາດ​ຫວັງ​ຂອງ​ລູກ​ຄ້າ.

ຂ່າວທີ່ກ່ຽວຂ້ອງ