ຂ່າວຫຼ້າສຸດ

ປະກາດແຕ່ງຕັ້ງ 5 ສະຫະພັນກີລາກຽມຊຽງຂວາງເກມ

973 27 ພ.ພ. 2019 ວົງຈອນກີລາ
ປະກາດແຕ່ງຕັ້ງ 5 ສະຫະພັນກີລາກຽມຊຽງຂວາງເກມ

    ພິ­ທີ​ປະ­ກາດ​ການ­ຈັດ­ຕັ້ງ​ສະ­ຫະ­ພັນ​ກີ­ລາ​ຊຸດ​ໃໝ່ 5 ປະ­ເພດ​ຈັດ​ຂຶ້ນ​ວັນ​ທີ 24 ພຶດ­ສະ­ພາ 2019 ຢູ່​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ບັນ­ດາ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ 5 ປະ­ເພດ​ກີ­ລາ ນວ ຊຸດ​ໃໝ່ ຕະ­ຫຼອດ​ຮອດ​ພະ­ນັກ­ງານ​ວິ­ຊາ​ການ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ສຳ­ລັບ​ການ​ປະ­ກາດ​ແຕ່ງ­ຕັ້ງ 5 ປະ­ເພດ​ກີ­ລາ​ປະ­ກອບ​ມີ: ທ່ານ ພູ​ວົງ ອິນ​ທະ​ວົງ­ສາ ເປັນ​ປະ­ທານ​ສະ­ຫະ­ພັນ​ກີ­ລາ​ຣັກ​ບີ້ ນວ ທ່ານ ສອນ​ເພັດ ພິ­ລາ​ວົງ ແລະ ທ່ານ ຄອນ​ສະ­ຫວັນ ສິດ­ທິ­ໄຊ ເປັນ​ຮອງ​ປະ­ທານ ທ່ານ ຕຸ້ຍ ບຸນ​ທະ­ລາ ເປັນ​ປະ­ທານ​ສະ­ຫະ­ພັນ​ກີ­ລາ​ເທັນ​ນິດ ນວ ທ່ານ ພຸດ​ທະ​ສັກ ພົມ​ມະ​ຈັກ ທ່ານ ໄຊ​ເງິນ ນະ​ທະ​ວົງ ແລະ ທ່ານ ສົມ​ພອນ ສາຍ​ມະ​ນິ​ວົງ ເປັນ​ຮອງ​ປະ­ທານ ທ່ານ ຄຳ​ເສີມ ມະ​ນິ​ວົງ ເປັນ​ປະ­ທານ​ສະ­ຫະ­ພັນ​ກີ­ລາ​ປິ່ງ​ປ່ອງ ນວ ທ່ານ ບຸນ​ແຍງ ດວງ​ປັນ­ຍາ ທ່ານ ບຸດ​ສາ­ຄອນ ໃສ​ຈັນ​ດີ ແລະ ຂວັນ​ໃຈ ໄຊ​ເກົາ​ທໍ່ ເປັນ​ຮອງ​ປະ­ທານ ທ່ານ ເນົາ­ວະ­ລັດ ພະ​ວໍ­ລະ​ຈິດ ເປັນ​ປະ­ທານ​ສະ­ຫະ­ພັນ​ກີ­ລາ​ມວຍ​ປ້ຳ ນວ ທ່ານ ຈັນ­ທະ​ຄານ ລັດ­ຕະ­ນະ​ວົງ ເປັນ​ຮອງ​ປະ­ທານ ແລະ ທ່ານ ຄຳ​ເສັງ ສູນ​ດາ­ລາ ເປັນ​ປະ­ທານ​ສະ­ຫະ­ພັນ​ມວຍ​ລາວ-ມວຍ​ສາ­ກົນ ແລະ ປັນ​ຈັກ​ສີ​ລັດ ທ່ານ ເສີດ ສູນ​ດາ­ລາ ເປັນ​ຮອງ​ປະ­ທານ.

    ໂອ­ກາດ​ນີ້ ທ່ານ ສົມ​ພອນ ສອນ​ດາ­ລາ ໄດ້​ສະ­ແດງ​ຄວາມ​ເຊື່ອ​ໝັ້ນ​ມາ​ຍັງ​ບັນ­ດາ​ຄະ­ນະ​ບໍ­ລິ­ຫານ​ງານ 5 ສະ­ຫະ­ພັນ​ກີ­ລາ ພ້ອມ​ທັງ​ຮຽກ­ຮ້ອງ​ໃຫ້​ພ້ອມ​ກັນ​ສຸມ​ທຸກ​ກຳ­ລັງ ແລະ ເຫື່ອ­ແຮງ​ຊີ້​ນຳ​ນຳ­ພາ​ຂະ​ບວນ​ການ​ກີ­ລາ​ຂອງ ນວ ໃຫ້​ມີ​ການ­ເຄື່ອນ­ໄຫວ​ຢ່າງ​ມີ​ສີ­ສັນ ແລະ ຟົດ­ຟື້ນ ສາ­ມາດ​ຮັບ­ປະ­ກັນ​ສ້າງ​ນັກ­ກີ­ລາ​ທີ່​ມີ​ພອນ​ສະ­ຫວັນ​ດີ­ເດັ່ນ ແລະ ມີ​ຄຸນ​ນະ​ພາບ​ສູງ ເພື່ອ​ເຂົ້າ​ຮ່ວມ​ແຂ່ງ­ຂັນ​ທວງ​ຕຳ­ແໜ່ງ​ແຊັມ​ເຈົ້າ​ຫຼຽນ​ຄຳ ໃນ​ຊຽງ​ຂວາງ​ເກມ ປີ 2020 ສ້າງ​ກຽດ ແລະ ຊື່​ສຽງ​ມາ­ສູ່​ນະ­ຄອນ­ຫຼວງ​ວຽງ​ຈັນ ໄດ້​ຍິ່ງ​ໃຫຍ່​ອີກ​ຄັ້ງ​ໜຶ່ງ.

ຂ່າວທີ່ກ່ຽວຂ້ອງ