ຂ່າວຫຼ້າສຸດ

ພະນັກງານໃນພິພິທະພັນ ລຸບ ນັດຢຸດງານ

470 29 ພ.ພ. 2019 ຂ່າວຕ່າງປະເທດ
ພະນັກງານໃນພິພິທະພັນ ລຸບ ນັດຢຸດງານ

      ໃນ​ແຈ້ງ​ການ​ຜ່ານ​ສື່​ສັງຄົມ Twitter ນັ້ນ ຕົວ​ແທນ​ຂອງ​ພິ​ພິ​ທະ​ພັນ ລຸບ (Louvre) ໃນ​ນະຄອນຫຼວງ​ປາ​ຣີ (ປະເທດ​ຝຣັ່ງ) ໃຫ້​ຮູ້​ວ່າ ພະນັກງານ​ຮັບ​ຕ້ອນ ແລະ ​ພະນັກງານ​ຮັກ ສາ​ຄວາມ​ສະຫງົບ ພາກັນ​ນັດ​ຢຸດ​ງານ ເພື່ອ​ຄັດຄ້ານ​ຕໍ່​ການ​ມີ​ປະລິມານ​ຜູ້​ເຂົ້າ​ຊົມ​ຊົມ​ພິ​ພິ​ທະ​ພັນ ຫຼາຍ​ເກີນ​ໄປ  ຈຶ່ງ​ເຮັດ​ໃຫ້​ຕ້ອງ​ຢຸດ​ການເຄື່ອນໄຫວ​ເປັນ​ການ​ຊົ່ວຄາວ ໃນ​ວັນ​ທີ 27 ພຶດສະພາ​ນີ້. ພິ​ພິ​ທະ​ພັນ​ດັ່ງກ່າວ ຈະ​ສົ່ງ​ເງິນ​ຄ່າ​ປີ້​ຄືນ​ໃຫ້​ແກ່​ຜູ້​ທີ່​ໄດ້​ຊື້​ປີ້​ເຂົ້າ​ຊົມ​ພິ​ພິ​ທະ​ພັນ​ໃນ​ວັນ​ທີ 27 ພຶດສະພາ.

    ກຳມະບານ​ດ້ານ​ວັດທະນະທຳ Sud ມີ​ແຈ້ງ​ການ​ອອກ​ມາ ໃຫ້​ຮູ້​ວ່າ ບັນດາ​ພະນັກງານ ຢູ່​ໃນ​ພິ​ພິ​ທະ​ພັນ ລຸບ ຕ້ອງ​ເຮັດ​ວຽກ​ຢູ່​ໃນ​ສະພາບ​ເກີນ​ການ​ຮອງ​ຮັບ​ໄດ້ ເມື່ອ​ມີ​ປະລິມານ ຜູ້​ເຂົ້າ​ຊົມ​ຫຼາຍ​ເກີນ​ໄປ. ກຳມະບານ​ວັດທະນະທຳ Sud ໃຫ້​ຮູ້​ວ່າ ໃນ​ປີ 2018 ໃນ​ພິ​ພິ​ທະ​ພັນ ລຸບ ໄດ້​ຕ້ອນຮັບ​ແຂກ​ເຂົ້າ​ຊົມ​ກວ່າ 10 ລ້ານ​ເທື່ອ​ຄົນ ແລະ ເຖິງ​ວ່າ​ປະລິມານ​ແຂກ​ເຂົ້າ​ຊົມ​ເພີ່ມ​ຂຶ້ນ 20% ນັບ​ແຕ່​ປີ 2009 ເປັນຕົ້ນ​ມາ​ກໍ​ຕາມ ແຕ່​ກົງກັນຂ້າມ ພະນັກງານ​ເຮັດ​ວຽກ​ຢູ່​ທີ່​ນັ້ນ​ພັດ​ຫຼຸດ​ລົງ.

    ໃນ​ຂະນະ​ດຽວ​ກັນ ກຳມະບານ​ວັດທະນະທຳ CGT ກໍ​ໃຫ້​ຮູ້​ວ່າ ພະນັກງານ​ໃນ ພິ​ພິ​ທະ​ພັນ​ດັ່ງກ່າວ ຈຳນວນ 150 ໄດ້​ພາກັນ​ໄປ​ເຕົ້າໂຮມ​ຢູ່​ດ້ານ​ນອກ​ກະຊວງ​ວັດທະນະທຳ​ຝຣັ່ງ ໃນ​ນະຄອນຫຼວງ​ປາ​ຣີ ເພື່ອ​ສະແດງ​ຄວາມ​ຄັດຄ້ານ​ຕໍ່​ສະພາບ​ຂາດແຄນ​ພະນັກງານ.

    ເມື່ອ​ເດືອນ​ເມສາ ປີ 2013 ພະນັກງານ​ຢູ່​ໃນ​ໃນ​ພິ​ພິ​ທະ​ພັນ ລຸບ ກໍ​ໄດ້​ນັດ​ຢຸດ​ງານ​ມາ​ແລ້ວ ເພາະ​ສະພາບ​ການ​ຮັກສາ​ຄວາມ​ສະຫງົບ​ອ່ອນແອ ຍ້ອນ​ເກີດ​ການ​ລ່ວງ​ກະເປົາ​ຂອງ​ນັກ​ທ່ອງ​ທ່ຽວ ເພີ່ມ​ຂຶ້ນ.

ຂ່າວທີ່ກ່ຽວຂ້ອງ