ຈີນປະສົບຄວາມສຳເລັດ ສ້າງເດັກເກີດຈາກປັບແຕ່ງ DNA ປ້ອງກັນການຕິດເຊື້ອ HIV

852 04 ມິ.ຖ. 2019 ຫົວຂໍ້ຂ່າວອື່ນໆ

    ສຳ­ນັກ​ຂ່າວ AFP ລາຍ​ງານ​ເມື່ອ​ວັນ​ທີ 26 ພະ­ຈິກ​ທີ່​ຜ່ານ​ມາ​ວ່າ ນັກ­ວິ­ທະ­ຍາ­ສາດ​ຈີນ​ປະ­ສົບ​ຄວາມ​ສຳ­ເລັດ ໃນ​ການ​ສ້າງ​ເດັກ­ນ້ອຍ​ທີ່​ເກີດ​ຈາກ​ການ​ຕັດ​ຕໍ່​ດີ​ເອັນ​ເອ (DNA) ໄດ້​ເປັນ​ແຫ່ງ​ທຳ​ອິດ​ຂອງ​ໂລກ.

    ສາ​ສະ​ດາ​ຈານ ເຫີ ຈ້ຽນ​ຂຸ່ຍ ຈາກ​ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ພາກ​ໃຕ້​ຂອງ​ຈີນ ຊຶ່ງ​ຈົບ​ການ​ສຶກ​ສາ​ຈາກ​ມະ­ຫາ­ວິ­ທະ­ຍາ­ໄລ​ສະ​ແຕນ​ຟອດ ໃນ​ສະ­ຫະ­ລັດ​ອາ​ເມ​ຣິ​ກາ ແລະ ເຮັດ​ວຽກ​ຢູ່​ໃນ​ຫ້ອງ​ປະ­ຕິ­ບັດ​ການ​ທີ່​ເມືອງ​ເສິ່ນ​ເຈິ້ນ ປະ­ເທດ​ຈີນ ໄດ້​ໂພ​ສວິ​ດີ​ໂອ​ຂຶ້ນ​ເທິງ​ຢູ​ທູບ ລະ­ບຸ​ວ່າ ເດັກ­ນ້ອຍ​ເພດ​ຍິງ​ແຝດ 1 ຄູ່ ທີ່​ເກີດ​ເມື່ອ​ມໍ່ໆມານີ້ ມີ DNA ທີ່​ຜ່ານ​ການ​ປັບ​ແຕ່ງ​ໃຫ້​ສາ­ມາດ​ປ້ອງ​ກັນ​ການ​ຕິດ­ເຊື້ອ HIV ໄດ້.

    ໂດຍ​ທ່ານ ສາ​ສະ​ດາ​ຈານ ເຫີ ຈ້ຽນ​ຂຸ່ຍ ກ່າວ​ດ້ວຍ​ວ່າ ການ​ປັບ​ແຕ່ງ DNA ໃຊ້​ເຕັກ­ນິກ​ທີ່​ເອີ້ນ​ວ່າ CRISPR ທີ່​ຈະ​ຊ່ວຍ​ເປິດ​ທາງ​ໃຫ້​ນັກ­ວິ­ທະ­ຍາ­ສາດ​ສາ­ມາດ ໂຍກ​ຍ້າຍ​ສາຍ​ຂອງ DNA ໄປ​ໄວ້​ໃນ​ຈຸດ​ທີ່​ຕ້ອງ­ການ​ໄດ້ ແລະ ວ່າ​ເດັກ­ນ້ອຍ​ທີ່​ເກີດ​ມາ ຊື່ ລູ​ລູ່ ກັບ ໜ່າ​ນາ ເກີດ​ຈາກ​ການ​ສ້າງ​ເດັກ​ຫຼອດ​ແກ້ວ ແຕ່​ຈະ​ໃຊ້​ໄຂ່ 1 ໜ່ວຍ​ທີ່​ຜ່ານ​ການ​ປັບ​ແຕ່ງ​ເປັນ​ພິ­ເສດ​ແລ້ວ ກ່ອນ​ທີ່​ຈະ​ຖືກ​ນຳ​ກັບ​ໄປ​ຝັງ​ໄວ້​ພາຍ​ໃນ​ຮັງ​ໄຂ່ ຫຼັງ​ຈາກ​ນັ້ນ​ຈຶ່ງ​ສີດ​ສະ​ເປິມ​ເຂົ້າ​ໄປ​ພາຍ​ໃນ​ໄຂ່​ຂອງ​ຜູ້­ຍິງ ລວມ​ທັງ​ໂປຣ​ຕີນ CRISPR/Cas9 ແລະ ລະ­ບຸ​ຕຳ­ແໜ່ງ​ຂອງ​ຢີນ​ເພື່ອ​ປ້ອງ​ກັນ​ການ​ຕິດ­ເຊື້ອ HIV ຂອງ​ເດັກ​ເພດ​ຍິງ​ທັງ​ຄູ່​ໃນ​ອະ­ນາ­ຄົດ.

    ທັ້ງ​ນີ້ ຄວາມ​ສຳ­ເລັດ​ດັ່ງ­ກ່າວ ຖືກ​ນຳ​ມາ­ຕີ​ພິມ​ເປັນ​ບົດ​ຄວາມ​ໄວ້​ໃນ​ວາ­ລະ­ສານ MIT Technology Review ທີ່​ໄດ້​ອ້າງ​ອີງ​ເຖິງ​ເອ­ກະ­ສານ​ທາງ​ການ​ແພດ​ທີ່​ທີມ​ວິ­ໄຈ​ຂອງ​ສາ​ສະ​ດາ​ຈານ ເຫີ ຈ້ຽນ​ຂຸ່ຍ ໂພ​ສ​ໄວ້​ເທິງ​ເວັບ​ໄຊ​ຂອງ​ທາງ​ມະ­ຫາ­ວິ­ທະ­ຍາ­ໄລ ເພື່ອ​ເກນ​ຄູ່​ສາ­ມີ-ພັນ​ລະ​ຍາ ທີ່​ຕ້ອງ­ການ​ມີ​ສ່ວນ​ຮ່ວມ​ໃນ​ການ​ທົດ​ລອງ​ຄັ້ງ​ນີ້.

    ຂ່າວ​ລະ­ບຸ​ວ່າ ການ​ເປີດ­ເຜີຍ​ດັ່ງ­ກ່າວ ມີ​ຂຶ້ນ​ກ່ອນ​ໜ້າ­ທີ່​ຈະ​ມີ​ການ​ເປິດ​ເຜີຍ​ລາຍ​ລະ­ອຽດ​ຕ່າງໆ ໃນ​ກອງ​ປະ­ຊຸມ​ຜູ້​ຊ່ຽວ­ຊານ​ລະ­ດັບ​ໂລກ ທີ່​ຮົງ​ກົງ ໃນ​ວັນ​ທີ 27 ພະ­ຈິກ​ນີ້ ແລະ ຂະ­ນະ​ນີ້ ກໍ​ຍັງ​ບໍ່​ມີ​ຫຼັກ​ຖານ​ໃດໆ ທີ່​ຈະ​ອ້າງ​ຄວາມ​ສຳ­ເລັດ​ດັ່ງ­ກ່າວ​ວ່າ​ເກີດ​ຂຶ້ນ​ຈິງ​ຫຼື​ບໍ່.

ຂ່າວທີ່ກ່ຽວຂ້ອງ