ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 05-06-2019

994 05 ມິ.ຖ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ເລີ່ມ​ດ້ວຍ​ເລື່ອງ​ກົດ​ລະ­ບຽບ​ຂອງ ສປ ຈີນ ທີ່​ບັງ­ຄັບ​ໃຫ້​ຜູ້­ໂດຍ­ສານ​ນັ່ງ​ຕາມ​ບ່ອນ​ນັ່ງ​ຂອງ​ຕົນ ຕໍ່​ໃສ່​ເລື່ອງ​ສິງ­ກະ­ໂປ ເອົາ​ຜິດ​ຜູ້​ສົ່ງ​ຮູບ​ໂປ້​ຜ່ານ​ສື່​ອອນ​ລາຍ ແລະ ສຸດ​ທ້າຍ​ແມ່ນ​ຂ່າວ​ທາງ​ການ​ກຳ­ປູ­ເຈຍ ປະ­ຕິ­ເສດ​ຂ່າວ​ໜັງ­ສື­ພິມ ດິ ເອ​ເຊຍ ທາມ.

    ທີ່ ສປ ຈີນ: ນັບ​ແຕ່​ວັນ​ທີ 1 ເດືອນ​ທັນ­ວາ ປີ 2018 ເປັນ­ຕົ້ນ​ມາ ກົດ​ລະ­ບຽບ​ວ່າ​ດ້ວຍ​ການ​ປັບ​ໃໝ​ຄົນ​ໂດຍ­ສານ​ທາງ​ລົດ­ໄຟ​ຄວາມ​ໄວ​ສູງ ທີ່​ໂກງ​ບ່ອນ​ນັ່ງ​ຂອງ​ຄົນ​ອື່ນ ໄດ້​ເລີ່ມ​ມີ​ຜົນ​ສັກ­ສິດ ກົດ​ລະ­ບຽບ​ນີ້​ມີ​ເປົ້າ​ໝາຍ​ເພື່ອ​ບັງ­ຄັບ​ໃຫ້​ຜູ້­ໂດຍ­ສານ​ທຸກ​ຄົນ​ນັ່ງ​ຕາມ​ບ່ອນ​ຂອງ​ຕົນ ທີ່​ກຳ­ນົດ​ໄວ້​ຢູ່​ໃນ​ປີ້​ໂດຍ­ສານ ຖ້າ​ຜູ້­ໂດຍ­ສານ​ຄົນ​ໃດ​ຍາດ​ນັ່ງ​ບ່ອນ​ນັ່ງ​ຂອງ​ຄົນ​ອື່ນ ແລະ ບໍ່​ຍອມ​ຍ້າຍ​ອອກ ກໍ​ຈະ​ຖືກ​ປັບ​ໃໝ​ເປັນ​ເງິນ​ແຕ່ 500 ຫາ 2.000 ຢວນ (ລະ­ຫວ່າງ 72-295 ໂດ​ລາ​ສະ­ຫະ­ລັດ) ກົດ​ລະ­ບຽບ​ດັ່ງ­ກ່າວ​ໄດ້​ໃຫ້​ສິດ​ພະ­ນັກ­ງານ ແລະ ເຈົ້າ​ໜ້າ­ທີ່​ຕຳ­ຫຼວດ​ປະ­ຈຳ​ລົດ­ໄຟ​ຄວາມ​ໄວ​ສູງ ເຮັດ​ການ​ປັບ​ໃໝ ແລະ ລົງ­ໂທດ​ຜູ້­ໂດຍ­ສານ​ທີ່​ຍາດ​ນັ່ງ​ທີ່​ນັ່ງ​ຂອງ​ຄົນ​ອື່ນ ແລະ ບໍ່​ຍອມ​ຍ້າຍ​ອອກ ກົດ​ລະ­ບຽບ​ນີ້​ໄດ້​ຖືກ​ຮັບ­ຮອງ​ໂດຍ​ສະ­ພາ​ປະ­ຊາ­ຊົນ​ແຂວງ​ກວາງ​ຕົງ ບ່ອນ​ທີ່​ມີ​ກໍ­ລະ­ນີ​ຄົນ​ໂດຍ­ສານ​ລົດ­ໄຟ​ຄວາມ​ໄວ​ສູງ ບໍ່​ນັ່ງ​ຕາມ​ບ່ອນ​ເບີ​ກຳ­ນົດ​ໄວ້​ໃນ​ປີ້​ໂດຍ­ສານ.

    ທີ່ ສິງ­ກະ­ໂປ: ໃນ​ໄລ­ຍະ​ຫຼັງໆ​ມາ​ນີ້ ທາງ​ການ​ສິງ­ກະ­ໂປ ໄດ້​ເຄັ່ງ​ມາດ​ຕະ­ການ​ຄວບ​ຄຸມ​ການ​ເຜີຍ­ແຜ່​ຂ່າວ ຮູບ ກໍ​ຄື ເນື້ອ​ໃນ​ຜ່ານ​ສື່​ສັງ­ຄົມ​ອອນ​ລາຍ​ທີ່​ບໍ່​ເປັນ­ຄວາມ​ຈິງ ພາ­ໃຫ້​ມີ​ການ​ແຕກ​ຕື່ນ ທຳ­ລາຍ​ຄວາມ​ສະ­ຫງົບ​ໃນ​ສັງ­ຄົມ ໂດຍ​ໄດ້​ມີ​ການ​ອອກ​ກົດ­ໝາຍ​ປາບ​ປາມ​ຂ່າວ​ປອມ​ຜ່ານ​ສື່​ເຟ​ສ​ບຸກ ກູ​ເກິນ ແລະ ອື່ນໆ ຊຶ່ງ​ຜູ້​ລະ­ເມີດ​ຈະ​ຕ້ອງ​ຖືກ​ປັບ​ໃໝ ແລະ ໃນ​ຕົ້ນ​ເດືອນ​ພຶດ­ສະ­ພາ​ປີ​ນີ້ ກໍ​ມີ​ຂ່າວ​ວ່າ ລັດ​ຖະ​ສະ­ພາ​ສິງ­ກະ­ໂປ ໄດ້​ຮັບ­ຮອງ​ເອົາ​ກົດ­ໝາຍ​ອາ­ຍາ​ສະ­ບັບ​ປັບ­ປຸງ ທີ່​ກຳ­ນົດ​ຄວາມ​ຜິດ​ຕໍ່​ຜູ້​ສົ່ງ​ຮູບ​ໂປ້​ຜ່ານ​ສື່​ອອນ​ລາຍ ເຊັ່ນ: ຮູບ​ໂປ້​ທີ່​ລັກ­ລອບ​ຖ່າຍ​ກ້ອງ​ກະ​ໂປ່ງ​ແມ່­ຍິງ ການ​ແຊ ຫຼື ການ​ຂູ່​ວ່າ​ຈະ​ແຊ​ຮູບ​ພາບ​ຂອງ​ຄົນ​ອື່ນ ຫຼື ການ​ແກ້­ແຄ້ນ​ດ້ວຍ​ການ​ເຜີຍ­ແຜ່​ຮູບ​ໂປ້ ຜູ້​ທີ່​ຖືກ​ສານ​ຕັດ­ສິນ​ວ່າ​ມີ​ຄວາມ​ຜິດ​ໃນ​ເລື່ອງ​ນີ້ ຈະ​ຖືກ​ຄວບ​ຄຸມ​ຕົວ​ເປັນ​ເວ­ລາ 2 ປີ ການ​ລັກ​ຖ່າຍ­ຮູບ​ກ້ອງ​ກະ​ໂປ່ງ​ອາດ​ຖືກ​ໂທດ​ຕິດ​ຄຸກ​ເປັນ​ເວ­ລາ 2 ປີ ສ່ວນ​ການ​ແຊ​ຮູບ ຫຼື ວີ​ດີ​ໂອ​ໂປ້​ນັ້ນ ອາດ​ຖືກ​ໂທດ​ຕິດ​ຄຸກ​ເປັນ​ເວ­ລາ 5 ປີ ຫຼື ອາດ​ຖືກ​ປັບ​ໃໝ ແລະ ຖືກ​ຂ້ຽນ ຂ່າວ​ບອກ​ວ່າ ຢູ່​ສິງ­ກະ­ໂປ ໃນ​ປັດ­ຈຸ­ບັນ ມີ​ບັນ­ຫາ​ຄົນ​ເຜີຍ­ແຜ່​ຮູບ​ອະ​ໄວ​ຍະ​ວະ​ເພດ​ຂອງ​ຕົນ​ເອງ ຜ່ານ​ສື່​ອອນ​ລາຍ​ຫຼາຍ ເຂົ້າ​ຂັ້ນ​ລະ­ບາດ ດັ່ງ­ນັ້ນ ຈຶ່ງ​ຕ້ອງ​ໄດ້​ກຳ­ນົດ​ເຂົ້າ​ເປັນ­ຄວາມ​ຜິດ​ທາງ​ອາ­ຍາ ສຳ­ລັບ​ຜູ້​ທີ່​ເຜີຍ­ແຜ່​ຮູບ​ໂປ້​ໃຫ້​ເດັກ​ອາ­ຍຸ​ຕ່ຳ​ກວ່າ 14 ປີ​ນັ້ນ ຈະ​ໄດ້​ຮັບ​ໂທດ​ເພີ່ມ​ຂຶ້ນ​ຫຼາຍ​ທົບ​ເທົ່າ.

    ທີ່ ກຳ­ປູ­ເຈຍ: ໃນ​ເດືອນ​ພະ­ຈິກ ປີ 2018 ໜັງ­ສື­ພິມ ດິ ເອ​ເຊຍ ທາມ (The Asia Times) ໄດ້​ລາຍ​ງານ​ວ່າ ສປ ຈີນ ມີ​ແຜນ​ເຈລະ­ຈາ​ກັບ​ກຳ­ປູ­ເຈຍ ເພື່ອ​ຂໍ​ເຊົ່າ​ພື້ນ​ທີ່​ບາງ​ສ່ວນ​ຢູ່​ແຄມ​ຝັ່ງ​ແຂວງ​ເກາະ​ກັງ ເພື່ອ​ສ້າງ​ເປັນ​ຖານ​ທັບ​ເຮືອ ພໍ​ຂ່າວ​ນີ້​ອອກ​ມາ ທ່ານ ຮຸນ​ເຊນ ນາ­ຍົກ­ລັດ­ຖະ­ມົນ­ຕີ​ກຳ­ປູ­ເຈຍ ກໍ​ອອກ​ມາ​ປະ­ຕິ­ເສດ​ຢ່າງ​ແຂງ​ຂັນ​ວ່າ ບໍ່​ມີ​ທາງ​ໃຫ້​ຕ່າງ­ປະ­ເທດ​ໃຊ້​ພື້ນ​ທີ່​ແຫ່ງ​ໃດ​ກໍ​ຕາມ​ໃນ​ກຳ­ປູ­ເຈຍ ເພື່ອ​ສ້າງ​ເປັນ​ຖານ​ທັບ​ເດັດ­ຂາດ ເພາະ​ມັນ​ຂັດ​ກັບ​ລັດ​ຖະ​ທຳ​ມະ­ນູນ​ແຫ່ງ​ຊາດ ແລະ ກ່າວ​ເພີ່ມ​ວ່າ ລັດ­ຖະ­ບານ​ກຳ­ປູ­ເຈຍ ຈະ​ບໍ່​ມີ​ທາງ​ອະ­ນຸ­ຍາດ​ໃຫ້​ປະ­ເທດ​ໃດ​ກໍ​ຕາມ ໃຊ້​ສະ­ຖານ­ທີ່​ໃນ​ກຳ­ປູ­ເຈຍ​ເປັນ​ແຫຼ່ງ​ຜະ­ລິດ ແລະ ທົດ​ລອງ​ອາ­ວຸດ (ແຫຼ່ງ​ຂ່າວ​ຈາກ​ໜັງ­ສື­ພິມ ລາວ​ພັດ­ທະ­ນາ 20/11/2018).

ຂ່າວທີ່ກ່ຽວຂ້ອງ