ລົດແກ້ວ ຄວ້າແຊັມແລ່ນລາຍການ Onesiam Onerun 2019

563 05 ມິ.ຖ. 2019 ວົງຈອນກີລາ
ລົດແກ້ວ ຄວ້າແຊັມແລ່ນລາຍການ Onesiam Onerun 2019

    ນາງ ລົດ​ແກ້ວ ອິນ​ທະ​ກຸມ­ມານ ສາວ​ແລ່ນ​ທົນ​ທີມ​ຊາດ​ລາວ ຄວ້າ​ແຊັມ​ການ​ແຂ່ງ­ຂັນ​ແລ່ນ 10 ກິ­ໂລ­ແມັດ​ຍິງ ລາຍ­ການ Onesiam Onerun 2019 ໃນ​ວັນ​ທີ 2 ມິ­ຖຸ­ນາ 2019 ທີ່​ບາງ­ກອກ ປະ­ເທດ​ໄທ ເປັນ​ເຈົ້າ­ພາບ ແລະ ເປັນ​ແຊັມ​ສະ­ໜາມ​ທີ 5 ໃນ​ປີ​ນີ້.

    ນາງ ລົດ​ແກ້ວ ອິນ​ທະ​ກຸມ­ມານ ສາວ​ແລ່ນ​ທົນ​ທີມ​ຊາດ​ລາວ ເຈົ້າ​ຂອງ​ຫຼຽນ​ທອງ ແລ່ນ 1.500 ແມັດ​ຍິງ ງານ​ກີ­ລາ​ຊີ­ເກມ ຄັ້ງ​ທີ XXlX ທີ່​ປະ­ເທດ​ມາ​ເລ​ເຊຍ ປີ 2017 ໄດ້​ເດີນ­ທາງ​ໄປ​ເຂົ້າ​ຮ່ວມ​ແຂ່ງ­ຂັນ​ແລ່ນ​ລາຍ­ການ​ດັ່ງ­ກ່າວ ໂດຍ​ລົງ​ແຂ່ງ­ຂັນ​ລາຍ­ການ 10 ກິ­ໂລ­ແມັດ​ຍິງ ຮ່ວມ​ກັບ​ນັກ​ແລ່ນ 3.000 ກວ່າ​ຄົນ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ ລົດ​ແກ້ວ ສາ­ມາດ​ເຂົ້າ​ເສັ້ນ​ໄຊ​ເປັນ​ຄົນ​ທຳ​ອິດ ດ້ວຍ​ເວ­ລາ 38 ນາ­ທີ ເອົາ​ຊະ­ນະ ອັນ​ດັບ 2 ແລະ ອັນ​ດັບ 3 ນັກ​ແລ່ນ​ຈາກ​ປະ­ເທດ​ໄທ ເຈົ້າ­ພາບ 1-2 ນາ­ທີ ຕາມ​ລຳ­ດັບ.

    ຈາກ​ຜົນ​ການ​ແຂ່ງ­ຂັນ​ດັ່ງ­ກ່າວ ໄດ້​ເຮັດ​ໃຫ້​ລົດ​ແກ້ວ​ໄດ້​ແຊັມ​ລາຍ­ການ​ນີ້​ເປັນ​ລາຍ­ການ​ທີ 5 ຈາກ​ການ​ລົງ​ແຂ່ງ­ຂັນ 6 ລາຍ­ການ​ໃນ​ປີ​ນີ້ ປະ­ກອບ​ມີ​ລາຍ­ການ SUPERSPORT 10 MILE INTERNATIONAL RUN SERIES THAILAND 2019 ບູ​ຣີ​ຣຳ​ມາ​ຣາ​ທອນ ວຽງ​ຈັນ​ຣາ​ຟ​ມາ​ຣາ​ທອນ ແລ່ນ​ວັນ​ວິ­ສາ­ຂະ­ບູ­ຊາ ທີ່​ແຂວງ​ຂອນ​ແກ່ນ ຊຸບ​ເປີ​ສະ­ປອດ 10 ກິ­ໂລ­ແມັດ ທີ່​ນະ­ຄອນ­ຫຼວງ​ບາງ­ກອກ ແລະ ລາຍ­ການ​ຫຼ້າ​ສຸດ Onesiam Onerun 2019 ທີ່​ນະ­ຄອນ­ຫຼວງ​ບາງ­ກອກ ປະ­ເທດ​ໄທ ສ່ວນ​ລາຍ­ການ​ທີ່​ບໍ່​ໄດ້​ແຊັມ​ນັ້ນ​ລາຍ­ການ AMAZING THAILAND MARATHON 2019 ທີ່​ໄດ້​ອັນ​ດັບ 3 ນອກ​ນັ້ນ ລົດ​ແກ້ວ​ຍັງ​ໄດ້​ເປີດ​ສອນ​ແລ່ນ​ພາຍ​ໃຕ້​ຊື່​ທີມ​ວ່າ ຄູ​ເຝິກ​ລົດ​ແກ້ວ ຫຼື LKCOACHING ແລ່ນ​ທາງ​ອອນ​ໄລ ແລະ ຕົວ​ຈິງ ປັດ­ຈຸ­ບັນ​ມີ​ສະ­ມາ­ຊິກ​ໃນ​ທີມ​ທັງ​ໝົດ 20 ຄົນ ໃນ​ນະ­ຄອນ­ຫຼວງ​ວຽງ​ຈັນ ແລະ ຕ່າງ​ແຂວງ.

ຂ່າວທີ່ກ່ຽວຂ້ອງ