ຫຼາຍແຂວງ ໄດ້ຮັບອຸປະກອນໂຄສະນາຄວາມປອດໄພຕາມຖະໜົນ

1.214 07 ມິ.ຖ. 2019 ຂ່າວໜ້າ​ໜຶ່ງ
ຫຼາຍແຂວງ ໄດ້ຮັບອຸປະກອນໂຄສະນາຄວາມປອດໄພຕາມຖະໜົນ

   ພິ­ທີ​ມອບ​ອຸ­ປະ­ກອນ​ສຳ­ລັບ​ໃຊ້​ວຽກ​ງານ​ໂຄ­ສະ­ນາ​ປູກ​ຈິດ​ສຳ­ນຶກ​ກ່ຽວ​ກັບ​ຄວາມ​ປອດ​ໄພ​ຕາມ​ຖະ­ໜົນ ພາຍ​ໃຕ້​ໂຄງ­ການ​ກອງ​ທຶນ​ພິ­ເສດ ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຈັດ​ຂຶ້ນ​ວັນ​ທີ 5 ມິ­ຖຸ­ນາ 2019 ທີ່​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ກ່າວ​ມອບ​ໂດຍ​ທ່ານ ບຸນ​ຕາ ອ່ອນ​ນາ​ວົງ ຫົວ­ໜ້າ​ກົມ​ຂົນ­ສົ່ງ ກະ­ຊວງ ຍທຂ ແລະ ຕາງ­ໜ້າ​ຮັບ​ໂດຍ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ​ແຂວງ 15 ແຂວງ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເຄື່ອງ​ອຸ­ປະ­ກອນ​ທີ່​ມອບ​ຄັ້ງ​ນີ້ ມີ 55 ຊຸດ ແຕ່​ລະ​ຊຸດ​ປະ­ກອບ​ມີ​ຄອມ​ພິວ​ເຕີ​ໂນດ​ບຸກ 1 ເຄື່ອງ LCD 1 ເຄື່ອງ ຜ້າ​ຈໍ​ສາຍ​ສະ​ໄລ້ 1 ອັນ ແລະ ຕູ້​ລຳ​ໂພງ 1 ໜ່ວຍ ເພື່ອ​ມອບ​ໃຫ້​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ​ແຂວງ 15 ແຂວງ ແຂວງ​ລະ 1 ຊຸດ ແລະ ບັນ­ດາ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ 47 ເມືອງ​ເປົ້າ​ໝາຍ ທີ່​ເປັນ​ເມືອງ​ຢູ່​ລຽບ​ຕາມ​ທາງ​ຫຼວງ​ແຫ່ງ​ຊາດ ແລະ ມີ​ຄວາມ​ສ່ຽງ​ຕໍ່​ການ​ເກີດ​ອຸ­ບັດ­ເຫດ​ສູງ ທັງ​ໝົດ​ນີ້​ເພື່ອ​ຮັບ​ໃຊ້​ໃນ​ການ​ລົງ​ໂຄ­ສະ­ນາ​ເຜີຍ­ແຜ່​ກົດ​ລະ­ບຽບ​ຈະ­ລາ­ຈອນ ແລະ ປູກ​ຈິດ​ສຳ­ນຶກ​ຄວາມ​ປອດ​ໄພ​ທາງ​ຖະ­ໜົນ​ຕາມ​ສຳ­ນັກ­ງານ ອົງ­ການ ໂຮງ­ຮຽນ ໂຮງ­ງານ ແລະ ຕາມ​ບ້ານ ແນ­ໃສ່​ເຮັດ​ໃຫ້​ຜູ້­ນຳ​ໃຊ້​ລົດ​ນຳ​ໃຊ້​ຖະ­ໜົນ​ໄດ້​ຮັບ​ຮູ້​ກົດ​ລະ­ບຽບ​ຈະ­ລາ­ຈອນ ເຕັກ­ນິກ​ການ​ຂັບ​ຂີ່​ປອດ​ໄພ ຄຸນ­ສົມ­ບັດ​ມາ­ລະ­ຍາດ​ໃນ​ການ​ຂັບ​ຂີ່ ແລະ ພ້ອມ​ກັນ​ຈັດ​ຕັ້ງ​ຢ່າງ​ມີ​ປະ​ສິດ­ທິ​ຜົນ ເພື່ອ​ເປັນ​ການ​ປະ­ກອບ­ສ່ວນ​ໃນ​ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ຂອງ​ລັດ­ຖະ­ບານ​ໃນ​ການ​ຫຼຸດ­ຜ່ອນ​ການ​ເກີດ​ອຸ­ບັດ­ເຫດ​ລົງ​ເທື່ອ​ລະ​ກ້າວ.

ຂ່າວທີ່ກ່ຽວຂ້ອງ