ເປີດນຳໃຊ້ໂຮງສາຍຮູບເງົາຊິດຕີເພຼກຊ໌ ແຫ່ງໃໝ່

993 07 ມິ.ຖ. 2019 ຂ່າວໜ້າ​ໜຶ່ງ

    ພິ­ທີ​ເປີດ​ນຳ​ໃຊ້​ໂຮງ​ສາຍ­ຮູບ­ເງົາ​ຊິດ​ຕີ​ເພຼກຊ໌ (City Plex) ແຫ່ງ​ໃໝ່ ຕັ້ງ​ຢູ່​ບ້ານ​ຄຳ​ຮຸ່ງ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 5 ມິ­ຖຸ­ນາ 2019 ມີ​ທ່ານ ວິ­ທູນ ສູນ​ດາ­ລາ ຫົວ­ໜ້າ​ກົມ​ຮູບ­ເງົາ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ​ນາງ ລະ­ອຽດ ຈຸນ​ລະ​ມະ­ນີ ຜູ້­ອຳ­ນວຍ­ການ​ໂຮງ​ສາຍ­ຮູບ­ເງົາ​ຊິດ​ຕີ​ເພຼກຊ໌ ກ່າວ​ວ່າ: ການ​ສ້າງ​ໂຮງ​ສາຍ­ຮູບ­ເງົາ​ນີ້​ຂຶ້ນ ເພື່ອ​ເປັນ​ການ​ສົ່ງ­ເສີມ​ທາງ​ດ້ານ​ວັດ­ທະ­ນະ­ທຳ​ທີ່​ເຊື່ອມ​ໂຍງ​ກັບ​ພາກ​ພື້ນ ແລະ ສາ­ກົນ ຂອງ​ຍຸກ​ສະ ໄໝ ມັນ​ຊ່ວຍ​ໃຫ້​ຊາວ​ໜຸ່ມ​ໄດ້​ຮັບ​ຄວາມ​ຮູ້​ຫຼາຍ​ດ້ານ​ທາງ​ວັດ­ທະ­ນະ­ທຳ​ຂອງ​ນາໆ​ປະ­ເທດ ເພື່ອ​ໄປ​ວິ­ເຄາະ​ວິ­ໄຈ ທັງ​ເປັນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ເມືອງ​ໄຊ​ທາ­ນີ ກໍ​ຄື ນະ­ຄອນ­ຫຼວງ​ວຽງ​ຈັນ​ໃຫ້​ໄດ້​ມາດ­ຕະ­ຖານ​ທຽບ­ໃສ່​ສາ­ກົນ ແລະ ສ້າງ​ຄວາມ​ບັນ­ເທີງ ເຊິ່ງ​ອາ­ຄານ​ໂຮງ​ສາຍ­ຮູບ­ເງົາ​ແຫ່ງ​ນີ້​ປະ­ກອບ​ມີ 3 ຊັ້ນ ຄື: ຊັ້ນ 1 ເປັນ​ບ່ອນ​ຈອດ​ລົດ ຊັ້ນ 2 ບ່ອນ​ບໍ­ລິ­ການ​ຂາຍ​ປີ້​ເຂົ້າ​ຊົມ ແລະ ຮ້ານ​ອາ­ຫານ-ເຄື່ອງ​ດື່ມ​ຕ່າງໆ ແລະ ຊັ້ນ 3 ຫ້ອງ​ສາຍ­ຮູບ­ເງົາ ໃນ​ນັ້ນ ມີ 3 ຫ້ອງ ແຕ່​ລະ​ຫ້ອງ​ສາ­ມາດ​ບັນ­ຈຸ​ຜູ້​ເຂົ້າ​ຊົມ​ໄດ້ 100-180 ຄົນ ເຊິ່ງ​ທຸກ​ຫ້ອງ​ຮັບ­ປະ­ກັນ​ຄວາມ​ສະ­ອາດ ມີ​ອາ­ກາດ​ປອດ­ໂປ່ງ​ດີ ປອດ​ໄພ ແລະ ໄດ້​ມາດ­ຕະ­ຖານ​ສາ­ກົນ 100% ຊິດ​ຕີ​ເພຼັກຊ໌ ແມ່ນ​ອົງ​ປະ­ກອບ​ໜຶ່ງ​ຂອງ​ບໍ­ລິ­ສັດ ຄ່າຍ​ເຊັນ ໂດຍ​ການ​ຮ່ວມ​ມື​ຂອງ​ຄົນ​ລາວ 100% ແລະ ໂຮງ​ສາຍ­ຮູບ­ເງົາ​ແຫ່ງ​ນີ້​ຈະ​ສາຍ­ຮູບ­ເງົາ​ທຸກ​ວັນ ແລະ ວັນ​ລະ 4 ຮອບ ຮອບ​ທຳ​ອິດ 10:30 ໂມງ ແລະ ຮອບ​ສຸດ​ທ້າຍ 21:00 ໂມງ ລາ­ຄາ​ເລີ່ມ​ຕົ້ນ 20.000 ກີບ​ຕໍ່​ຄົນ​ຂຶ້ນ​ໄປ ແລະ ມີ​ຮູບ­ເງົາ​ທຸກ​ປະ­ເພດ​ເຂົ້າ​ສາຍ​ໃນ​ແຕ່​ລະ​ວັນ.

ຂ່າວທີ່ກ່ຽວຂ້ອງ