ຂ່າວຫຼ້າສຸດ

ລັດໃຫ້ງົບຫຼາຍຮ້ອຍລ້ານກີບ ປັບປຸງເສັ້ນທາງຮ່ອມບ້ານທົ່ງຂັນຄຳ

497 10 ມິ.ຖ. 2019 ຂ່າວໜ້າ​ໜຶ່ງ
ລັດໃຫ້ງົບຫຼາຍຮ້ອຍລ້ານກີບ ປັບປຸງເສັ້ນທາງຮ່ອມບ້ານທົ່ງຂັນຄຳ

    ການ​ພັດ­ທະ­ນາ​ພື້ນ­ຖານ​ໂຄງ​ລ່າງ ໂດຍ​ສະ­ເພາະ ລະ­ບົບ​ເສັ້ນ­ທາງ​ຄົມ­ມະ­ນາ­ຄົມ​ເປັນ​ບັນ­ຫາ​ສຳ­ຄັນ​ທີ່​ພັກ-ລັດ­ຖະ­ບານ ແລະ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ທຸກ​ຂັ້ນ ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ ເພື່ອ​ເຮັດ​ໃຫ້­ການ​ໄປ​ມາ​ຂອງ​ປະ­ຊາ­ຊົນ ແລະ ການ​ຂົນ­ສົ່ງ​ສິນ­ຄ້າ ມີ​ຄວາມ​ສະ­ດວກ ສະ­ບາຍ ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ບັນ­ດາ­ເຜົ່າ​ນັບ​ມື້​ດີ​ຂຶ້ນ ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ ປັດ­ຈຸ­ບັນ​ມີ​ຫຼາຍ​ບ້ານ​ຢູ່​ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ປັບ­ປຸງ​ລະ­ບົບ​ເສັ້ນ­ທາງ​ຮ່ອມ ຍົກ​ລະ­ດັບ​ຈາກ​ທາງ​ດິນ​ແດງ​ເປັນ​ທາງ​ເບ​ຕົງ ແລະ ທາງ​ປູ­ຢາງ ໂດຍ​ນຳ​ໃຊ້​ງົບ­ປະ­ມານ​ຂອງ​ລັດ ແລະ ປະ­ຊາ­ຊົນ ໃນ​ນັ້ນ ກໍ​ມີ​ບ້ານ​ທົ່ງ​ຂັນ​ຄຳ ເມືອງ​ຈັນ­ທະ​ບູ​ລີ ທີ່​ພວມ​ປັບ­ປຸງ​ເສັ້ນ­ທາງ​ຮ່ອມ​ພາຍ​ໃນ​ບ້ານ​ໃຫ້​ດີ​ຂຶ້ນ.

    ທ່ານ ບຸນ​ຍັງ ສີ​ໂພນ​ໄຊ ນາຍ­ບ້ານ​ທົ່ງ​ຂັນ​ຄຳ ໄດ້​ໃຫ້​ສຳ­ພາດ ວັນ​ທີ 5 ມິ­ຖຸ­ນາ 2019 ວ່າ: ບ້ານ​ທົ່ງ​ຂັນ​ຄຳ ເປັນ​ບ້ານ​ໜຶ່ງ​ທີ່​ຕັ້ງ​ຢູ່​ໃຈ­ກາງ​ຕົວ​ເມືອງ ນະ­ຄອນ­ຫຼວງ​ວຽງ​ຈັນ ມີ​ປະ­ຊາ­ຊົນ​ອາ­ໄສ​ຢູ່​ຢ່າງ​ໜາ​ແໜ້ນ ແລະ ພາຍ​ໃນ​ບ້ານ​ມີ​ເສັ້ນ­ທາງ​ຮ່ອມ​ເຊື່ອມ​ຕໍ່​ໃສ່​ທາງ​ໃຫຍ່​ຫຼາຍ​ເສັ້ນ ເຊິ່ງ​ເສັ້ນ­ທາງ​ຮ່ອມ​ມີ​ທັງ​ໝົດ 5 ເສັ້ນ ມີ​ຄວາມ​ຍາວ 3.000 ກວ່າ​ແມັດ​ທີ່​ເປັນ​ທາງ​ຮ່ອມ​ເຊື່ອມ​ຕໍ່​ຈອດ​ກັນ​ທຸກ​ເສັ້ນ ເມື່ອ​ກ່ອນ​ເປັນ​ທາງ​ຮ່ອມ​ດິນ​ແດງ ຕໍ່​ມາ​ປີ 2000 ໄດ້​ຍົກ​ລະ­ດັບ​ຂຶ້ນ​ເປັນ​ທາງ​ຮ່ອມ​ປູ­ຢາງ ແຕ່​ຍ້ອນ​ການ​ຊົມ­ໃຊ້​ມາ​ຫຼາຍ​ປີ ຈຶ່ງ​ເຮັດ​ໃຫ້​ເສັ້ນ­ທາງ​ຮ່ອມ​ດັ່ງ­ກ່າວ​ມີ​ການ​ຊຸດ­ໂຊມ ແລະ ເປ່​ເພ​ເຮັດ​ໃຫ້­ການ​ໄປ​ມາ​ຂອງ​ປະ­ຊາ­ຊົນ​ພາຍ​ໃນ​ບ້ານ ແລະ ບ້ານ​ອ້ອມ​ຂ້າງ​ພົບ​ຄວາມ​ຫຍຸ້ງ­ຍາກ ດັ່ງ­ນັ້ນ ປີ 2019 ລັດ­ຖະ­ບານ​ຈຶ່ງ​ໄດ້​ໃຫ້​ງົບ 480 ກວ່າ​ລ້ານ​ກີບ ເພື່ອ​ມາ​ປັບ­ປຸງ​ສ້ອມ­ແປງ​ເສັ້ນ­ທາງ​ດັ່ງ­ກ່າວ ດ້ວຍ​ການ​ປູ­ຢາງ​ສອງ​ຊັ້ນ ແລະ ລວງ​ອະ­ນາ­ໄມ​ຮ່ອງ​ລະ­ບາຍ​ນ້ຳ​ເປື້ອນ​ຢູ່​ສອງ​ຂ້າງ​ທາງ ໂດຍ​ມອບ​ໃຫ້​ບໍ­ລິ­ສັດ ວຽງ​ຈັນ​ກໍ່­ສ້າງ​ຂົວ​ທາງ ຈຳ­ກັດ ເປັນ​ຜູ້​ຮັບ​ເໝົາ​ກໍ່­ສ້າງ ເຊິ່ງ​ໂຄງ­ການ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ ແຕ່​ເດືອນ​ກຸມ­ພາ 2019 ເປັນ­ຕົ້ນ​ມາ ມາ​ຮອດ​ປັດ­ຈຸ­ບັນ ໜ້າ​ວຽກ​ມີ​ຄວາມ​ຄືບ​ໜ້າ​ສຳ­ເລັດ 70% ແລະ ຄາດ​ວ່າ​ຈະ​ໃຫ້​ສຳ­ເລັດ 100% ພາຍ​ໃນ​ກາງ​ເດືອນ​ມິ­ຖຸ­ນາ 2019 ໂຄງ­ການ​ດັ່ງ­ກ່າວ​ເປັນ​ໂຄງ­ການ​ໜຶ່ງ​ທີ່​ສຳ­ຄັນ ແລະ ຈຳ­ເປັນ ເພື່ອ​ເປັນ​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ບ້ານ​ທົ່ງ​ຂັນ​ຄຳ​ໃຫ້​ດີ​ຂຶ້ນ ມີ​ຄວາມ​ສະ­ອາດ​ງາມ​ຕາ ທັງ​ເປັນ​ການ​ກະ­ກຽມ​ໃຫ້​ແກ່​ກອງ​ປະ­ຊຸມ​ສາມ​ຂັ້ນ.

ຂ່າວທີ່ກ່ຽວຂ້ອງ