ການກວດ ແລະ ຮັກສາສຸຂະພາບແຂ້ວໃຫ້ພະສົງ

503 10 ມິ.ຖ. 2019 ຂ່າວໜ້າ​ໜຶ່ງ
ການກວດ ແລະ ຮັກສາສຸຂະພາບແຂ້ວໃຫ້ພະສົງ

    ສະ­ຖານ­ທູດ​ໄທ ປະ­ຈຳ​ລາວ ຮ່ວມ​ກັບ​ເອັດ​ສ​ຊີ​ຈີ ອົງ​ກອນ​ຊັ້ນ​ນຳ​ທີ່​ມຸ່ງ​ສ້າງ​ຄວາມ​ຍືນ​ຍົງ​ໃນ​ອາ​ຊຽນ ພ້ອມ​ດ້ວຍ​ຜູ້​ປະ­ກອບ​ການ​ໄທ​ໃນ​ລາວ ຈັດ​ກິດ­ຈະ­ກຳ​ກວດ​ສຸ­ຂະ­ພາບ​ແລະ ຮັກ­ສາ​ແຂ້ວ​ໃຫ້​ພະ­ສົງ-ສຳ​ມະ​ເນນ 999 ອົງ ວັນ​ທີ 5-6 ມິ­ຖຸ­ນາ 2019 ຢູ່​ວັດ​ອົງ​ຕື້ ນະ­ຄອນ­ຫຼວງ​ວຽງ​ຈັນ (ນວ) ເພື່ອ​ຖວາຍ​ເປັນ​ພະ​ຣາ​ຊະ​ກຸ­ສົນ ເນື່ອງ​ໃນ​ພະ​ຣາ​ຊະ​ພິ­ທີ​ບໍ​ຣົມ​ຣາ​ຊາ​ພິ​ເສກ​ພະ​ບາດ​ສົມ­ເດັດ ພະ​ປະ​ຣະ​ເມນ​ທະ​ຣະ​ຣາ​ມາ​ທິ​ບໍ­ດີ​ສີ​ສິນ​ມະ­ຫາ​ວະ​ຊິ​ຣາ​ລົງ​ກອນ ພະ­ວະ​ຊິ​ຣະ​ເກົ້າ​ເຈົ້າ​ຢູ່​ຫົວ​ຣາ​ຊະ​ການ​ທີ 10 ແລະ ສະ­ເຫຼີມ­ສະ­ຫຼອງ​ວັນ​ຄ້າຍ​ວັນ​ເກີດ​ຂອງ​ພະ​ຣາ​ຊີ​ນີ​ປະ­ຈຳ​ປີ 2019 ມີ​ຄະ­ນະ​ທັນ​ຕະ​ແພດ​ຈາກ​ໜ່ວຍ​ທັນ​ຕະ​ກຳ ພະ​ຣາ​ຊະ​ທານ ຄະ­ນະ​ແພດ­ສາດ​ຈຸ­ລາ​ລົງ​ກອນ​ມະ­ຫາ­ວິ­ທະ­ຍາ­ໄລ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ກຽດ​ຕິ​ຄຸນ ຊາດ​ປະ­ເສີດ ທູດ​ໄທ ປະ­ຈຳ​ລາວ ກ່າວ​ວ່າ: ການ​ບໍ­ລິ­ການ​ທັນ​ຕະ​ກຳ​ຄັ້ງ​ນີ້ ຈັດ​ຂຶ້ນ​ໃນ​ໂອ­ກາດ​ພະ​ຣາ​ຊະ​ພິ­ທີ​ບໍ​ຣົມ​ຣາ​ຊາ​ພິ​ເສກ 2019 ແລະ ສະ­ເຫຼີມ­ສະ­ຫຼອງ​ວັນ​ຄ້າຍ​ວັນ​ເກີດ​ຂອງ​ພະ​ຣາ​ຊິ​ນີ​ປະ­ຈຳ​ປີ 2019 ເຊິ່ງ​ເປັນ​ການ​ຮ່ວມ​ມື​ລະ­ຫວ່າງ​ສະ­ຖານ­ທູດ​ໄທ ປະ­ຈຳ​ລາວ ຄະ­ນະ​ທັນ​ຕະ​ແພດ­ສາດ​ຈຸ­ລາ​ລົງ​ກອນ​ມະ­ຫາ­ວິ­ທະ­ຍາ­ໄລ ແລະ ວິ­ທະ­ຍາ­ໄລ​ສົງ​ອົງ​ຕື້ (ວັດ​ອົງ​ຕື້​ມະ­ຫາ​ວິ­ຫານ) ເຊິ່ງ​ເປັນ​ຄັ້ງ​ທຳ​ອິດ​ທີ່​ມີ​ການ​ອອກ​ໜ່ວຍ​ທັນ​ຕະ​ກຳ​ເຄື່ອນ​ທີ່​ຂອງ​ໄທ​ຖວາຍ​ແກ່​ພະ­ສົງ-ສຳ​ມະ​ເນນ​ລາວ ທັງ​ເປັນ​ການ​ສົ່ງ­ເສີມ​ການ​ຮ່ວມ​ມື​ດ້ານ​ສາ­ທາ­ລະ­ນະ​ສຸກ​ໄທ-ລາວ ລວມ​ທັງ​ການ​ເຮັດ­ບຸນ​ທະ­ນຸ​ບຳ­ລຸງ​ພະ​ພຸດ​ທະ​ສາ­ສະ­ໜາ​ຕື່ມ​ອີກ.

    ທ່ານ ນິ­ທິ​ພັດ ທະ​ຣະ​ໂຊກ ປະ­ທານ​ທຸ­ລະ​ກິດ​ຊີ­ມັງ ແລະ ຜະ­ລິດ​ຕະ​ພັນ​ກໍ່­ສ້າງ​ເອັດ​ສ​ຊີ​ຈີ ກ່າວ​ວ່າ: ການ​ມີ​ສຸ­ຂະ­ພາບ​ທີ່​ດີ​ເປັນ​ປັດ​ໄຈ​ພື້ນ­ຖານ​ໃນ​ການ​ດຳ­ລົງ​ຊີ­ວິດ ເອັດ​ສ​ຊີ​ຈີ​ເຫັນ​ຄວາມ​ສຳ­ຄັນ​ໃນ​ການ​ພັດ­ທະ­ນາ​ຄຸນ​ນະ​ພາບ​ຊີ­ວິດ ເພື່ອ​ນຳ­ໄປ​ສູ່​ການ​ພັດ­ທະ­ນາ​ຢ່າງ​ຍືນ​ຍົງ​ທາງ​ສັງ­ຄົມ ແລະ ວັດ­ທະ­ນະ­ທຳ ກິດ­ຈະ­ກຳ​ຄັ້ງ​ນີ້ ຈະ​ຊ່ວຍ​ຫຼຸດ​ບັນ­ຫາ​ສຸ­ຂະ­ພາບ​ທີ່​ເກີດ​ຂຶ້ນ​ແກ່​ພະ­ສົງ ຊ່ວຍ​ໃຫ້​ພະ­ສົງ​ສາ­ມາດ​ປະ­ຕິ­ບັດ​ກິດ ແລະ ສືບ​ທອດ​ພຸດ​ທະ​ສາ­ສະ­ໜາ​ຕໍ່​ໄປ​ໄດ້​ແບບ​ຍືນ​ຍົງ ກິດ­ຈະ­ກຳ​ຄັ້ງ​ນີ້​ເກີດ​ຂຶ້ນ ໄດ້​ດ້ວຍ​ການ​ຮ່ວມ​ມື​ຂອງ​ຫຼາຍ​ພາກ­ສ່ວນ​ຕາມ​ແນວ­ທາງ​ພະ​ຣາດ​ຊະ​ດຳ​ຣິ ເພື່ອ​ປະ­ໂຫຍດ​ຂອງ​ສ່ວນ​ລວມ ໂດຍ​ບໍ່​ຫວັງ​ສິ່ງ​ຕອບ​ແທນ ແລະ ຍັງ​ມີ​ນັກ​ສຶກ​ສາ​ທີ່​ໄດ້​ຮັບ​ທຶນ​ຈາກ​ໂຄງ­ການ SCG Sharing the Dream ມາ​ເປັນ​ອາ­ສາ​ສະ­ໝັກ​ຮ່ວມ​ກິດ­ຈະ­ກຳ​ອີກ​ດ້ວຍ.

ຂ່າວທີ່ກ່ຽວຂ້ອງ