ສົ່ງເສີມຂໍ້ມູນຂ່າວສານ ດ້ານສຸຂະພາບຈະເລີນພັນໃຫ້ໄວໜຸ່ມ

592 10 ມິ.ຖ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ປຶກ­ສາ​ຫາ­ລື​ກິດ­ຈະ­ກຳ​ສົ່ງ­ເສີມ​ຂໍ້​ມູນ​ຂ່າວ­ສານ ດ້ານ​ສຸ­ຂະ­ພາບ​ຈະ­ເລີນ​ພັນ​ໃຫ້​ໄວ​ໜຸ່ມ ຍິງ-ຊາຍ ໃນ​ໂຮງ­ງານ​ທົ່ວ​ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 7 ມິ­ຖຸ­ນາ 2019 ຢູ່​ຫ້ອງ​ວ່າ­ການ​ປົກ ຄອງ ນວ ໂດຍ​ເປັນ​ປະ­ທານ​ຂອງ​ທ່ານ​ນາງ ຄຳ​ໄພ ລັດ­ສະ­ໝີ ປະ­ທານ​ສະ­ຫະ­ພັນ​ແມ່­ຍິງ ນວ ແລະ ທ່ານ​ນາງ ມາ​ຣຽມ ຄານ ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ ກອງ​ທຶນ​ປະ­ຊາ­ກອນ (UNFPA) ມີ​ຕົວ​ແທນ​ຈາກ​ໂຮງ­ງານ​ຕັດ­ຫຍິບ 20 ກວ່າ​ແຫ່ງ​ທົ່ວ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຜົນ​ການ​ສຳ​ຫຼວດ​ປີ 2012 ລະ­ບຸ​ວ່າ ປະ­ມານ 20.000 ຄົນ ເຮັດ​ວຽກ​ຢູ່​ໂຮງ­ງານ​ຕັດ­ຫຍິບ ສ່ວນ​ຫຼາຍ​ແມ່ນ​ໄວ​ໜຸ່ມ ອາ­ຍຸ 17-25 ປີ (85% ແມ່ນ​ແມ່­ຍິງ) ເຊິ່ງ​ມາ​ຈາກ​ເຂດ​ຫ່າງ​ໄກ​ສອກ­ຫຼີກ ແລະ ມີ​ອັດ­ຕາ​ການ​ອອກ​ໂຮງ­ຮຽນ​ສູງ ຄອບ­ຄົວ​ມີ​ຄວາມ­ທຸກ​ຍາກ ຂາດ​ຄວາມ​ຮູ້​ດ້ານ​ການ​ຮັກ­ສາ​ສຸ­ຂະ­ພາບ ແລະ ເຂົ້າ​ເຖິງ​ການ​ບໍ­ລິ­ການ ໂດຍ​ສະ­ເພາະ ບໍ­ລິ­ການ​ດ້ານ​ສຸ­ຂະ­ພາບ​ທາງ​ເພດ ແລະ ຈະ­ເລີນ​ພັນ.

    ທ່ານ​ນາງ ຄຳ​ໄພ ລັດ­ສະ­ໝີ ກ່າວ​ວ່າ: ການ​ນຳ​ເອົາ​ການ​ບໍ­ລິ­ການ​ເຂົ້າ​ຫາ​ພະ­ນັກ­ງານ​ຕາມ​ໂຮງ­ງານ ຈະ​ເກີດ​ຜົນ​ປະ­ໂຫຍດ​ທັງ​ສອງ​ຝ່າຍ (ນາຍ​ຈ້າງ ແລະ ລູກ­ຈ້າງ) ຫາກ​ໄວ​ໜຸ່ມ ແມ່­ຍິງ ແລະ ຄູ່​ຜົວ​ເມຍ ສາ­ມາດ​ກຳ­ນົດ​ກ່ຽວ​ກັບ​ສຸ­ຂະ­ພາບ​ທາງ​ເພດ ຮ່າງ­ກາຍ ແລະ ການ​ຈະ­ເລີນ​ພັນ​ຂອງ​ພວກ​ເຂົາ​ເອງ​ໄດ້ ບໍ່​ພຽງ​ແຕ່​ພວກ​ເຂົາ​ຈະ​ມີ​ສຸ­ຂະ­ພາບ​ດີ​ຂຶ້ນ ຍັງ​ຈະ​ຊ່ວຍ​ໃຫ້­ການ​ເຮັດ​ວຽກ​ມີ​ປະ​ສິດ­ທິ​ຜົນ​ດີ​ຂຶ້ນ ເຊິ່ງ​ເປັນ​ການ​ປະ­ກອບ­ສ່ວນ​ໃຫ້​ແກ່​ເສດ­ຖະ­ກິດ​ຄອບ­ຄົວ ກໍ​ຄື ປະ­ເທດ​ຊາດ.

ຂ່າວທີ່ກ່ຽວຂ້ອງ