ຂ່າວຫຼ້າສຸດ

ຍີ່ປຸ່ນ ຊ່ວຍປ໋ອງປາ-ເຂົ້າສານ ເຂົ້າໃນວຽກງານອາຫານທ່ຽງໃນໂຮງຮຽນ

548 10 ມິ.ຖ. 2019 ຂ່າວໜ້າ​ໜຶ່ງ
ຍີ່ປຸ່ນ ຊ່ວຍປ໋ອງປາ-ເຂົ້າສານ ເຂົ້າໃນວຽກງານອາຫານທ່ຽງໃນໂຮງຮຽນ

    ວັນ​ທີ 7 ມິ­ຖຸ­ນາ 2019 ທ່ານ ທາ​ເກ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ ສປປ ລາວ ມອບ​ປ໋ອງ​ປາ ແລະ ເຂົ້າ­ສານ​ຈ້າວ ມູນ​ຄ່າ 3,2 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 27,74 ຕື້​ກີບ ໃຫ້​ອົງ­ການ​ອາ­ຫານ​ໂລກ ປະ­ຈຳ ສປປ ລາວ ເພື່ອ​ນຳ­ໄປ​ຈັດ​ຕັ້ງ​ປະ­ຕິ­ບັດ​ວຽກ​ງານ​ອາ­ຫານ​ທ່ຽງ​ໃນ​ໂຮງ­ຮຽນ ແລະ ການ​ສ້າງ​ຄວາມ​ເຂັ້ມ­ແຂງ​ໃຫ້​ຊຸມ​ຊົນ ໃນ​ການ​ຮັບ​ມື​ກັບ​ການ​ປ່ຽນ­ແປງ​ຂອງ​ສະ­ພາບ​ດິນ​ຟ້າ​ອາ­ກາດ.

    ທ່ານ ທາ​ເກ​ຊິ ຮິ​ກິ​ຮາ​ຣະ ກ່າວ​ວ່າ: ຍີ່­ປຸ່ນ​ຈະ​ເຮັດ​ວຽກ​ຮ່ວມ​ກັບ​ລັດ­ຖະ­ບານ​ລາວ ແລະ ອົງ­ການ​ສາ­ກົນ​ທີ່​ກ່ຽວ­ຂ້ອງ ລວມ​ທັງ​ອົງ­ການ​ອາ­ຫານ​ໂລກ ໃນ​ການ​ຂະ­ຫຍາຍ​ການ​ຮ່ວມ​ມື ແລະ ສະ­ໜັບ­ສະ­ໜູນ​ວຽກ​ງານ​ການ​ສ້າງ​ຊຸມ​ຊົນ​ໃຫ້​ມີ​ຄວາມ​ເຂັ້ມ­ແຂງ ແລະ ຊ່ວຍ​ໃຫ້​ນັກ­ຮຽນ​ໃນ​ປະ­ເທດ​ລາວ ເຕີບ​ໃຫຍ່ ແລະ ແຂງ­ແຮງ ໂດຍ​ຜ່ານ​ອາ­ຫານ​ທ່ຽງ​ໃນ​ໂຮງ­ຮຽນ ພວກ​ເຮົາ​ຈະ​ປະ­ກອບ­ສ່ວນ​ໃນ​ຄວາມ​ພະ­ຍາ­ຍາມ​ຂອງ​ປະ­ເທດ​ລາວ ໃນ​ການ​ລຶ­ບລ້າງ​ຄວາມ​ອຶດ­ຫິວ ເຊິ່ງ​ເປັນ​ຫົວ­ໃຈ​ຫຼັກ ແລະ ເປັນ​ພື້ນ­ຖານ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ປ໋ອງ​ປາ 425 ໂຕນ ຈະ​ຖືກ​ນຳ​ໃຊ້​ໃນ​ວຽກ​ງານ​ອາ­ຫານ​ທ່ຽງ​ໃນ​ໂຮງ­ຮຽນ​ໃຫ້​ເດັກ­ນ້ອຍ​ຫຼາຍ​ກວ່າ 100.000 ຄົນ ໃນ​ເຂດ​ທຸ­ລະ­ກັນ­ດານ​ທົ່ວ​ປະ­ເທດ ອາ­ຫານ​ຫຼັກ​ທີ່​ເດັກ­ນ້ອຍ​ໄດ້​ຮັບ​ໃນ​ທຸກ​ມື້​ແມ່ນ​ເຂົ້າ ແລະ ໝາກ­ຖົ່ວ ຍັງ​ມີ​ການ​ປະ­ກອບ­ສ່ວນ​ຈາກ​ຊຸມ​ຊົນ ເປັນ­ຕົ້ນ ຜັກ ແລະ ຜົນ​ຜະ­ລິດ​ທາງ​ການ​ກະ­ເສດ ລວມ​ທັງ​ຜັກ​ຈຳ­ນວນ​ໜຶ່ງ​ທີ່​ໄດ້​ຈາກ​ສວນ​ຄົວ​ໂຮງ­ຮຽນ ນອກ​ນີ້ ປ໋ອງ​ປາ 17 ໂຕນ ຈະ​ນຳ­ໄປ​ຊ່ວຍ­ເຫຼືອ​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ 5.700 ຄົນ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື.

    ສ່ວນ​ເຂົ້າ­ສານ​ຈ້າວ ຈະ​ນຳ­ໄປ​ຈັດ​ຕັ້ງ​ກິດ­ຈະ­ກຳ​ການ​ສ້າງ​ທະ­ນາ­ຄານ​ເຂົ້າ​ໃນ​ຊຸມ​ຢູ່​ແຂວງ​ເຊ​ກອງ ແລະ ອັດ​ຕະ​ປື ກິດ­ຈະ­ກຳ​ດັ່ງ­ກ່າວ ສາ­ມາດ​ສະ­ໜອງ​ເຂົ້າ​ໃຫ້​ປະ­ຊາ­ຊົນ​ຫຼາຍ​ກວ່າ 20.000 ຄົນ ໃນ​ການ​ກູ້​ຢືມ​ເຂົ້າ ໂດຍ​ສະ­ເພາະ ລະ­ດູ​ຂາດ­ເຂີນ ໂດຍ​ມີ​ທາງ​ເລືອກ​ໃນ​ການ​ຊຳ­ລະ​ຄືນ​ດ້ວຍ​ການ​ຊຳ­ລະ​ດ້ວຍ​ເຂົ້າ ຫຼັງ​ລະ­ດູ​ການ​ເກັບ​ກ່ຽວ​ໃນ​ຄັ້ງ​ຕໍ່​ໄປ ຫຼື ເປັນ​ເງິນ ຕາມ​ອັດ­ຕາ​ດອກ​ເບ້ຍ​ທີ່​ກຳ­ນົດ​ຮ່ວມ​ກັນ ທະ­ນາ­ຄານ​ເຂົ້າ­ຂອງ​ຊຸມ​ຊົນ​ຍັງ​ຊ່ວຍ​ເພີ່ມ​ຄວາມ​ໝັ້ນ­ຄົງ ໃຫ້​ຊຸມ​ຊົນ​ຕໍ່​ການ​ປ່ຽນ­ແປງ​ຂອງ​ສະ­ພາບ​ດິນ​ຟ້າ​ອາ­ກາດ​ທີ່​ອາດ​ເກີດ​ຂຶ້ນ​ໄດ້ ກິດ­ຈະ­ກຳ​ດັ່ງ­ກ່າວ ແມ່ນ​ຜ່ານ​ການ​ໃຫ້​ທຶນ​ສະ­ໜັບ­ສະ­ໜູນ ໂດຍ​ກອງ​ທຶນ​ສາ­ກົນ​ເພື່ອ​ການ​ພັດ­ທະ­ນາ​ກະ­ສິ­ກຳ (IFAD) ໃນ​ການ​ຮ່ວມ​ມື​ກັບ​ອົງ­ການ​ພັດ­ທະ­ນາ​ລຸກ​ຊຳ​ບວກ ແລະ ກະ­ຊວງ​ກະ­ສິ­ກຳ ແລະ ປ່າ­ໄມ້ ອົງ­ການ​ອາ­ຫານ​ໂລກ​ປະ­ສົບ​ຜົນ­ສຳ­ເລັດ​ຢ່າງ​ສູງ ໃນ​ການ­ຈັດ­ຕັ້ງ​ປະ­ຕິ­ບັດ​ກິດ­ຈະ­ກຳ​ການ​ສ້າງ​ທະ­ນາ­ຄານ​ເຂົ້າ­ຂອງ​ຊຸມ​ຊົນ ທີ່​ສາ­ມາດ​ບັນ­ລຸ​ການ​ສ້າງ­ຕັ້ງ​ທະ­ນາ­ຄານ​ເຂົ້າ​ໃນ​ຊຸມ​ຊົນ​ກວ່າ 160 ແຫ່ງ​ໃນ​ປີ 2016.

ຂ່າວທີ່ກ່ຽວຂ້ອງ