ບີເຄເອັນ ປູກໄມ້ຕິ້ວ 2.000 ເບ້ຍ ເປັນວັດຖຸດິບປ້ອນໂຮງງານ

425 10 ມິ.ຖ. 2019 ຂ່າວໜ້າ​ໜຶ່ງ
ບີເຄເອັນ ປູກໄມ້ຕິ້ວ 2.000 ເບ້ຍ ເປັນວັດຖຸດິບປ້ອນໂຮງງານ

    ບໍ­ລິ­ສັດ ບີ​ເຄ​ເອັນ ຈຳ­ກັດ (ກຸ່ມ​ຜູ້​ຜະ­ລິດ​ຖ່ານ​ຂາວ​ເພື່ອ​ສົ່ງ​ອອກ) ຮ່ວມ​ກັບ​ຫ້ອງ­ການ​ບໍ­ລິ­ຫານ​ກົມ​ໃຫຍ່​ເສ­ນາ​ທິ​ການ ກະ­ຊວງ​ປ້ອງ​ກັນ​ປະ­ເທດ ຈັດ​ພິ­ທີ​ປູກ​ໄມ້​ຕິ້ວ ເພື່ອ​ສະ­ເຫຼີມ­ສະ­ຫຼອງ​ວັນ​ປູກ​ຕົ້ນ­ໄມ້​ແຫ່ງ​ຊາດ ແລະ ວັນ­ເດັກ­ນ້ອຍ​ສາ­ກົນ (1 ມິ­ຖຸ­ນາ) ຂຶ້ນ​ວັນ​ທີ 7 ມິ­ຖຸ­ນາ 2019 ຢູ່​ສວນ​ກົມ​ໃຫຍ່​ເສ­ນາ​ທິ​ການ ບ້ານ​ພ້າວ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ພົນ​ໂທ ສຸ​ວອນ ເລືອງ​ບຸນ​ມີ ຫົວ­ໜ້າ​ກົມ​ໃຫຍ່​ເສ­ນາ​ທິ​ການ ຮອງ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ປະ­ເທດ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເບ້ຍ​ໄມ້​ຕິ້ວ​ທີ່​ນຳ​ມາ​ປູກ​ຄັ້ງ​ນີ້ ມີ 2.000 ເບ້ຍ ປູກ​ໃສ່​ເນື້ອ­ທີ່ 1 ເຮັກ­ຕາ ເພື່ອ​ປະ­ຕິ­ບັດ​ຕາມ​ສັນ­ຍາ​ລະ­ຫວ່າງ​ຫ້ອງ ການ​ກົມ​ໃຫຍ່​ເສ­ນາ​ທິ​ການ ກະ­ຊວງ​ປ້ອງ​ກັນ​ປະ­ເທດ ແລະ ບໍ­ລິ­ສັດ ບີ​ເຄ​ເອັນ ຈຳ­ກັດ ໃນ​ເນື້ອ­ທີ່​ທັງ​ໝົດ 30 ເຮັກ­ຕາ ໂດຍ​ປີ­ຜ່ານ­ມາ​ກໍ​ໄດ້​ມີ​ການ​ປູກ​ໃສ່​ຝຸ່ນ ແລະ ຕິດ​ປ້າຍ​ໃຫ້​ເປັນ​ສວນ​ປູກ​ຢ່າງ​ຖືກ­ຕ້ອງ ພ້ອມ​ນີ້ ຍັງ​ເປັນ​ການ​ປະ­ກອບ­ສ່ວນ​ສ້າງ​ພື້ນ​ທີ່​ສີ­ຂຽວ​ໃຫ້​ປະ­ເທດ​ຊາດ ໂດຍ​ສະ­ເພາະ ປະ­ກອບ­ສ່ວນ​ໃນ​ການ­ຈັດ­ຕັ້ງ​ປະ­ຕິ­ບັດ​ຍຸດ​ທະ​ສາດ​ປ່າ­ໄມ້​ປີ 2020 ແລະ ປະ­ກອບ­ສ່ວນ​ຈັດ​ຕັ້ງ​ປະ­ຕິ­ບັດ​ນະ­ໂຍ­ບາຍ​ຂອງ​ລັດ­ຖະ­ບານ ວ່າ​ດ້ວຍ​ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ ເຮັດ​ໃຫ້​ປະ­ເທດ​ຊາດ​ຫຼຸດ​ພົ້ນ​ອອກ​ຈາກ​ຄວາມ​ດ້ອຍ​ພັດ­ທະ­ນາ​ຂັ້ນ​ພື້ນ­ຖານ ໃນ​ປີ 2024 ຕົ້ນ­ໄມ້​ຕິ້ວ​ທີ່​ປູກ​ນີ້ ອະ­ນາ­ຄົດ​ຍັງ​ຈະ​ກາຍ­ເປັນ​ວັດ­ຖຸ​ດິບ​ປ້ອນ​ໂຮງ­ງານ​ຂອງ​ບໍ­ລິ­ສັດ ບີ​ເຄ​ເອັນ ຈຳ­ກັດ ຕື່ມ​ອີກ ໂດຍ 6 ປີ­ຜ່ານ­ມາ ສອງ​ຝ່າຍ​ສາ­ມາດ​ປູກ​ໄມ້​ຕິ້ວ​ແລ້ວ 7 ກວ່າ​ເຮັກ­ຕາ ໂດຍ​ປູກ​ໃສ່​ເນື້ອ­ທີ່​ດິນ​ເປົ່າ​ຫວ່າງ ແລະ ຜົນ​ໄດ້​ຮັບ​ຕົວ​ຈິງ​ປະ­ມານ 70%.

    ທ່ານ ບຸນ​ອຸ້ມ ພັນ­ທະ​ປັນ­ຍາ ຜູ້­ອຳ­ນວຍ­ການ​ບໍ­ລິ­ສັດ ບີ​ເຄ​ເອັນ ຈຳ­ກັດ ປະ­ທານ​ກຸ່ມ​ຜູ້​ຜະ­ລິດ​ຖ່ານ​ຂາວ​ເພື່ອ​ສົ່ງ​ອອກ ກ່າວ​ວ່າ: ກຸ່ມ​ຜະ­ລິດ​ຖ່ານ​ຂາວ​ເພື່ອ​ສົ່ງ​ອອກ ໄດ້​ເລີ່ມ​ປູກ​ໄມ້​ຕິ້ວ​ຮ່ວມ​ກັບ​ປະ­ຊາ­ຊົນ ລັກ­ສະ­ນະ 2+3 ແຕ່​ປີ 2007 ເປັນ­ຕົ້ນ​ມາ ປັດ­ຈຸ­ບັນ​ມີ​ສະ­ມາ­ຊິກ​ເຂົ້າ​ຮ່ວມ​ໂຄງ­ການ 303 ຄອບ­ຄົວ 3 ອົງ​ກອນ ແລະ 2 ເນື້ອ­ທີ່​ຂອງ​ບໍ­ລິ­ສັດ ລວມ 1.526 ເຮັກ­ຕາ ເພີ່ມ​ຂຶ້ນ 3,25% ທຽບ­ໃສ່​ປີ­ຜ່ານ­ມາ ໃນ​ນີ້ ເນື້ອ­ທີ່​ມີ​ທະ­ບຽນ​ສວນ​ຟື້ນ​ຟູ ແລະ ສວນ​ປູກ​ປະ­ມານ 364 ເຮັກ­ຕາ ເພີ່ມ​ຂຶ້ນ 43,8% ເຊິ່ງ​ມີ​ຢູ່​ນະ­ຄອນ­ຫຼວງ​ວຽງ​ຈັນ ບໍ​ລິ​ຄຳ​ໄຊ ວຽງ​ຈັນ ສະ­ຫວັນ​ນະ​ເຂດ ແລະ ສາ­ລະ​ວັນ.

ຂ່າວທີ່ກ່ຽວຂ້ອງ