ຂ່າວຫຼ້າສຸດ

ລັດຖະບານ ຈະເພີ່ມຄວາມເອົາໃຈໃສ່ປະຕິບັດ ບາງວຽກທີ່ກຳນົດໃນມາດຕະການຕ່າງໆ

791 10 ມິ.ຖ. 2019 ຂ່າວໜ້າ​ໜຶ່ງ
ລັດຖະບານ ຈະເພີ່ມຄວາມເອົາໃຈໃສ່ປະຕິບັດ ບາງວຽກທີ່ກຳນົດໃນມາດຕະການຕ່າງໆ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ຊີ້​ແຈງ​ຕໍ່​ຄຳ​ຊັກ​ຖາມ ຄຳ​ຄິດ​ເຫັນ ແລະ ຂໍ້​ສະ­ເໜີ​ຕ່າງໆ​ຂອງ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ 8 ໃນ​ວັນ​ທີ 7 ມິ­ຖຸ­ນາ 2019 ກ່ຽວ​ກັບ​ຄຳ​ສັ່ງ​ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ ໂດຍ​ສະ­ເພາະ ມາດ​ຕະ­ການ​ກ່ຽວ​ກັບ​ການ​ສະ­ກັດ​ກັ້ນ​ໄພ​ເງິນ​ເຟີ້ ແລະ ປັບ­ປຸງ​ນະ­ໂຍ­ບາຍ​ການ​ເງິນ ແລະ ຈັດ​ຕັ້ງ​ປະ­ຕິ­ບັດ 10 ຕົວ​ຊີ້​ວັດ ໃນ​ນີ້ ມີ 5 ຕົວ​ຊີ້​ວັດ (ການ​ຂຶ້ນ​ທະ­ບຽນ​ຊັບ​ສິນ ການ​ເຂົ້າ​ເຖິງ​ສິນ​ເຊື່ອ ການ​ຊຳ­ລະ​ອາ­ກອນ ການ​ບັງ­ຄັບ​ໃຊ້​ສັນ­ຍາ ແລະ ການ​ແກ້​ໄຂ​ການ​ລົ້ມ​ລະ­ລາຍ) ບໍ່​ທັນ​ມີ​ຄວາມ​ຄືບ​ໜ້າ​ເທົ່າ​ທີ່​ຄວນ.

    ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ເຈາະ​ຈົງ 2 ບັນ­ຫາ ຄື: ການ­ຈັດ­ຕັ້ງ​ປະ­ຕິ­ບັດ​ມາດ​ຕະ­ການ ການ​ສະ­ກັດ​ກັ້ນ​ໄພ​ເງິນ​ເຟີ້ ແລະ ປັບ­ປຸງ​ນະ­ໂຍ­ບາຍ​ເງິນ­ຕາ ເປັນ­ຕົ້ນ ຮັກ­ສາ​ອັດ­ຕາ​ເງິນ​ເຟີ້​ສະ­ເລ່ຍ​ລະ­ດັບ 1,5% ເຊິ່ງ​ຢູ່​ໃນ​ຂອບ​ສະ­ພາ​ແຫ່ງ​ຊາດ​ຮັບ­ຮອງ ໝົດ​ປີ​ບໍ່​ເກີນ 5% ຮັກ­ສາ​ປະ­ລິ­ມານ​ເງິນ M2 ຢູ່​ລະ­ດັບ 9% ເຊິ່ງ​ສະ­ພາ​ແຫ່ງ​ຊາດ​ຮັບ­ຮອງ ສະ­ເລ່ຍ​ບໍ່​ເກີນ 20% ຮັກ­ສາ​ຄ່າ​ເງິນ​ກີບ​ຢູ່​ໃນ​ຂອບ​ເໜັງ​ຕີງ​ບໍ່​ເກີນ 5% ຕາມ​ມະ­ຕິ​ສະ­ພາ​ແຫ່ງ​ຊາດ​ກຳ­ນົດ ຄຸ້ມ​ຄອງ​ສ່ວນ​ຕ່າງ​ລະ­ຫວ່າງ​ອັດ­ຕາ​ແລກ­ປ່ຽນ​ທະ­ນາ­ຄານ​ທຸ­ລະ​ກິດ ແລະ ຕະ­ຫຼາດ ສຳ­ລັບ​ເງິນ​ກີບ ທຽບ­ໃສ່​ເງິນ​ໂດ​ລາ​ສະ­ຫະ­ລັດ ສະ­ເລ່ຍ​ໃນ​ລະ­ດັບ 1,7% ເງິນ​ກີບ ທຽບ­ໃສ່​ເງິນ​ບາດ ສະ­ເລ່ຍ​ຢູ່​ໃນ​ລະ­ດັບ 0,4% ເຊິ່ງ​ເປັນ​ອັດ­ຕາ​ທີ່​ບໍ່​ຕ່າງ​ກັນ​ຫຼາຍ ນອກ​ນີ້ ລັດ­ຖະ­ບານ ກໍ​ມີ​ຄວາມ​ຄືບ​ໜ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ທີ່​ກຳ­ນົດ​ໃນ​ມາດ​ຕະ­ການ​ນີ້ ເປັນ­ຕົ້ນ ການ​ສົ່ງ­ເສີມ​ການ​ຊຳ­ລະ​ສະ​ສາງ​ຜ່ານ​ລະ­ບົບ​ທະ­ນາ­ຄານ ການ​ປັບ­ປຸງ​ໂຄງ​ສ້າງ​ລາ­ຄາ​ນ້ຳ­ມັນ (ຕັດ​ຕົ້ນ​ທຶນ​ທີ່​ພາ­ໃຫ້​ລາ­ຄາ​ນ້ຳ­ມັນ​ສູງ​ຂຶ້ນ) ການ​ສົ່ງ­ເສີມ​ການ​ໃຊ້​ພະ­ລັງ­ງານ​ທົດ​ແທນ-ສົ່ງ­ເສີມ​ການ​ນຳ​ໃຊ້​ລົດ­ໄຟ​ຟ້າ ໂດຍ​ກຳ­ນົດ​ນະ­ໂຍ­ບາຍ​ຫຼຸດ­ຜ່ອນ​ພາ­ສີ​ນຳ​ເຂົ້າ ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ເພື່ອ​ຫຼຸດ­ຜ່ອນ​ການ​ນຳ​ເຂົ້າ ແລະ ອື່ນໆ ລັດ­ຖະ­ບານ​ຈະ​ໄດ້​ເພີ່ມ​ຄວາມ​ເອົາ­ໃຈ­ໃສ່ ຈັດ​ຕັ້ງ​ປະ­ຕິ­ບັດ​ບາງ​ວຽກ​ທີ່​ກຳ­ນົດ ໃນ​ມາດ​ຕະ­ການ​ກ່ຽວ​ກັບ​ການ​ສະ­ກັດ​ກັ້ນ​ໄພ​ເງິນ​ເຟີ້ ແລະ ປັບ­ປຸງ​ນະ­ໂຍ­ບາຍ​ການ​ເງິນ ເປັນ­ຕົ້ນ ການ​ເພີ່ມ​ຄັງ​ສຳ­ຮອງ​ເງິນ­ຕາ​ຕ່າງ­ປະ­ເທດ ເພື່ອ​ອຳ­ນວຍ​ຄວາມ​ສະ­ດວກ ຊຸກ­ຍູ້ ແລະ ຊ່ວຍ­ເຫຼືອ ເພື່ອ​ການ​ຊຳ­ລະ​ສະ​ສາງ ການ​ພັດ­ທະ­ນາ​ຕະ­ຫຼາດ​ທຶນ ແລະ ຊຸກ­ຍູ້​ຕະ­ຫຼາດ​ຫຼັກ​ຊັບ ການ​ຊຸກ­ຍູ້​ສົ່ງ­ເສີມ ແລະ ອຳ­ນວຍ​ຄວາມ​ສະ­ດວກ​ໃນ​ການ​ຜະ­ລິດ​ສິນ­ຄ້າ.

    ກອງ​ປະ­ຊຸມ​ຍັງ​ໄດ້​ສະ­ຫຼຸບ​ສັງ​ລວມ​ການ​ປະ­ກອບ​ຄຳ​ເຫັນ​ຂອງ ສສຊ ຕໍ່​ບົດ​ລາຍ​ງານ​ຂອງ​ລັດ­ຖະ­ບານ ພ້ອມ​ທັງ​ສະ­ເໜີ​ຮ່າງ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ວ່າ​ດ້ວຍ​ການ​ຮັບ­ຮອງ​ເອົາ​ບົດ​ລາຍ​ງານ ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ແລະ ແຜນ​ງົບ­ປະ­ມານ​ແຫ່ງ​ລັດ 4 ເດືອນ ຄາດ​ຄະ­ເນ 6 ເດືອນ​ຕົ້ນ​ປີ ແລະ ທິດ​ທາງ​ແຜນ­ການ​ໃນ 6 ເດືອນ​ທ້າຍ​ປີ 2019 ນອກ​ນີ້ ຍັງ​ໄດ້​ລົງ​ຄະ­ແນນ​ສຽງ​ຮັບ­ຮອງ​ເອົາ​ມະ­ຕິ ວ່າ​ດ້ວຍ​ການ​ຮັບ­ຮອງ​ເອົາ​ການ​ເລືອກ​ຕັ້ງ ແລະ ແຕ່ງ­ຕັ້ງ​ບຸ​ຄະ­ລາ​ກອນ ຄື: ແຕ່ງ­ຕັ້ງ​ທ່ານ ວິ​ດົງ ໄຊ​ຍະ​ສອນ ເຈົ້າ­ແຂວງ​ວຽງ​ຈັນ ເປັນ​ລັດ­ຖະ­ມົນ­ຕີ​ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ແລະ ແຕ່ງ­ຕັ້ງ​ທ່ານ ຄຳ​ພາ ແສງ​ດາ­ລາ ຮອງ​ປະ­ທານ​ສານ ເປັນ​ປະ­ທານ​ສານ​ປະ­ຊາ­ຊົນ​ສູງ​ສຸດ ຈາກ​ນັ້ນ ສສຊ ກໍ​ໄດ້​ປະ­ກອບ​ຄຳ​ເຫັນ​ໃສ່​ໜັງ­ສື​ແຕ່ງ­ຕັ້ງ ແລະ ລົງ­ມະ­ຕິ​ຮັບ­ຮອງ​ເອົາ​ໂດຍ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ