ເກີດ​ອຸບັດເຫດ​ການ​ຄົມມະນາຄົມ​ຮ້າຍ​ແຮງ​ຢູ່​ໃນ​ຟີ​ລິບ​ປິນ UAE ແລະ ນີ​ເຊຣີ

305 11 ມິ.ຖ. 2019 ຂ່າວຕ່າງປະເທດ
ເກີດ​ອຸບັດເຫດ​ການ​ຄົມມະນາຄົມ​ຮ້າຍ​ແຮງ​ຢູ່​ໃນ​ຟີ​ລິບ​ປິນ  UAE ແລະ ນີ​ເຊຣີ

    ເຈົ້າ​ໜ້າທີ່​ຕຳຫຼວດ​ຟີ​ລິບ​ປິນ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ 13 ຄົນ ໃນ​ນັ້ນ​ເປັນ​ເດັກນ້ອຍ 2 ຄົນ ເມື່ອ​ລົດ​ຂົນສົ່ງ​ຄັນ​ໜຶ່ງ ຊຶ່ງ​ພວກ​ເຂົາ​ໂດຍສານ​ໄປ​ນັ້ນ ໄດ້​ເກີດ​ອຸບັດເຫດ​ພິກ​ຂວ້ຳ ຫຼັງ​ຈາກ​ທີ່​ໄດ້​ເຂົ້າ​ຮ່ວມ​ໃນ​ພິທີ​ຂູ່​ຂໍ​ແຕ່ງດອງ​ລາຍ​ໜຶ່ງ ອຸບັດເຫດ​ດັ່ງກ່າວ ເກີດ​ຂຶ້ນ​ເມື່ອ​ວັນ​ທີ 8 ມິຖຸນາ​ທີ່​ຜ່ານ​ມາ ຢູ່​ໃນ​ຍ່ານ​ທາງ​ທີ່​ເປັນ​ສາຍພູ ຢູ​ໃນ​ແຂວງ ກາມາ​ຣິນ ຊູ (ພາກ​ຕາເວັນ​ອອກ​ຂອງ​ຟີ​ລິບ​ປິນ).

    ໃນ​ຂະນະ​ດຽວ​ກັນ ອຸບັດເຫດ​ຮ້າຍ​ແຮງ ໄດ້​ເກີດ​ຂຶ້ນ​ກັບ​ລົດ​ບັດ​ຄັນ​ໜຶ່ງ ຢູ່​ໃນ​ນະຄອນ ດູ​ບາຍ ຂອງ​ສະຫະລັດ ອາ​ຣັບ ເອ​ມີ​ເຣດ (UAE) ເມື່ອ​ຄ່ຳ​ຄືນ​ຂອງ​ວັນ​ທີ 6 ມິຖຸນາ​ທີ່​ຜ່ານ​ມາ ສົ່ງ​ຜົນ​ໃຫ້​ຜູ້ໂດຍສານ​ເສຍ​ຊີວິດ 17 ຄົນ ໃນ​ນັ້ນ 12 ຄົນ​ເປັນ​ພົນລະເມືອງ​ອິນ​ເດຍ ແລະ ມີ​ຜູ້​ໄດ້​ຮັບ​ບາດເຈັບ​ອີກ 5 ຄົນ.

ແຫຼ່ງ​ຂ່າວ​ຈາກ​ຕຳຫຼວດ UAE ແລະ ສະຖານກົງສູນ​ຂອງ​ອິນ​ເດຍ ປະຈຳ​ດູ​ບາຍ ໃຫ້​ຮູ້​ວ່າ  ອຸບັດເຫດ​ດັ່ງກ່າວ​ເກີດ​ຂຶ້ນ ເມື່ອ​ລົດ​ບັດ​ຄັນ​ໜຶ່ງ ຊຶ່ງ​ບັນທຸກ​ຜູ້ໂດຍສານ 31 ຄົນ ທີ່​ຖື​ຫຼາຍ​ສັນຊາດ​ແຕກ​ຕ່າງ​ກັນ ພວມ​ແລ່ນ​ຢູ່​ໃນ​ເສັ້ນທາງ​ຈາກ​ເມືອງ ມູ​ຊາດ (ປະເທດ​ໂອ​ມານ) ໄປ​ຍັງ ດູ​ບາຍ ໃນ​ຂະນະ​ທີ່​ພວມ​ແລ່ນ​ຢູ່​ນັ້ນ ລົດ​ບັດ​ດັ່ງກ່າວ ໄດ້​ໄປ​ຕຳ​ເອົາ​ປ້າຍ​ແຈ້ງ​ເຕືອນ​ກຳນົດ​ລະດັບ​ສູງ ຫຼັງ​ຈາກ​ທີ່​ຫຼົງ​ແລ່ນ​ເຂົ້າ​ໄປ​ໃນ​ເລນ​ຫ້າມ​ສັນຈອນ​ຂອງ​ລົດ​ປະເພດ​ນີ້.

    ສ່ວນ​ທີ່​ນີ​ເຊຣີ ເຈົ້າ​ໜ້າທີ່​ຕຳຫຼວດ​ໃນ​ທ້ອງຖິ່ນ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 18 ຄົນ ຈາກ​ອຸບັດເຫດ​ການ​ເດີນທາງ​ດ້ວຍ​ລົດຍົນ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 9 ມິຖຸນາ​ນີ້ ທີ່​ເຂດ​ທິດຕາເວັນຕົກ​ສ່ຽງ​ໃຕ້ ປະເທດ​ນີ​ເຊຣີ.

ຂ່າວທີ່ກ່ຽວຂ້ອງ