ຂ່າວຫຼ້າສຸດ

ປິ່ງປ່ອງ ນວ ກຽມຄັດເລືອກນັກກີລາ ຮ່ວມມະຫະກຳກີລາແຫ່ງຊາດ

613 11 ມິ.ຖ. 2019 ວົງຈອນກີລາ
ປິ່ງປ່ອງ ນວ ກຽມຄັດເລືອກນັກກີລາ ຮ່ວມມະຫະກຳກີລາແຫ່ງຊາດ

    ທ່ານ ຄຳ​ເສີມ ມະ​ນິ​ວົງ ປະ­ທານ​ສະ­ຫະ­ພັນ​ປິ່ງ​ປ່ອງ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ເພື່ອ​ເຮັດ​ໃຫ້​ຂະ​ບວນ​ການ​ກີ­ລາ​ປິ່ງ​ປ່ອງ​ຂອງ ນວ ກັບ​ມາ​ມີ​ບັນ­ຍາ­ກາດ​ຄຶກ­ຄື້ນ​ອີກ​ຄັ້ງ​ໜຶ່ງ ພວກ​ເຮົາ​ຈະ​ສູ້​ຊົນ​ປຸກ­ລະ­ດົມ​ພາກ­ສ່ວນ​ທີ່​ມີ​ເງື່ອນ­ໄຂ ໃຫ້​ມີ​ສ່ວນ​ຮ່ວມ​ໃນ​ຂະ​ບວນ​ການ​ຈັດ­ການ​ແຂ່ງ­ຂັນ​ກີ­ລາ​ດັ່ງ­ກ່າວ ໃຫ້​ໄດ້​ຢ່າງ​ຕໍ່​ເນື່ອງ ໂດຍ​ສະ­ເພາະ​ຈະ​ຈັດ­ການ​ແຂ່ງ­ຂັນ 3 ງານ​ໃຫຍ່ ຄື: ແຂ່ງ­ຂັນ​ປິ່ງ​ປ່ອງ ຊີງ​ຂັນ​ທ່ານ​ເຈົ້າ​ຄອງ ນວ ຊີງ​ຂັນ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ແລະ ຊີງ​ຂັນ​ທ່ານ​ເຈົ້າ­ເມືອງ ກ່ອນ​ຈະ​ຄັດ​ເລືອກ​ນັກ­ກີ­ລາ​ຜູ້​ມີ​ພອນ​ສະ­ຫວັນ​ດີ­ເດັ່ນ ຕາມ​ເປົ້າ​ໝາຍ​ທີ່​ກຳ­ນົດ​ໄວ້​ເຂົ້າ​ເກັບ​ຕົວ​ເຝິກ­ຊ້ອມ ເພື່ອ​ສົ່ງ​ເຂົ້າ​ຮ່ວມ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຢູ່​ແຂວງ​ຊຽງ​ຂວາງ ວັນ​ທີ 22 ມີ­ນາ-1 ເມ­ສາ 2020.

    ເພື່ອ​ເຮັດ​ໃຫ້­ການ​ມອບ​ໝາຍ​ຄວາມ​ຮັບ­ຜິດ­ຊອບ​ຂອງ​ການ​ນຳ ນວ ປະ­ສົບ​ຜົນ­ສຳ­ເລັດ​ຕາມ​ຄວາມ​ມຸ່ງ​ຫວັງ​ໃຫ້​ປະ­ກົດ​ຜົນ​ເປັນ​ຈິງ ພວກ​ເຮົາ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ປິ່ງ​ປ່ອງ ນວ ຈະ​ພ້ອມ​ກັນ​ສູ້​ຊົນ​ບຸກ​ບືນ​ຢ່າງ​ສຸດ​ຄວາມ​ສາ­ມາດ ເພື່ອ​ປະ­ກອບ­ສ່ວນ​ຟື້ນ​ຟູ​ວົງ​ການ​ກີ­ລາ​ປິ່ງ​ປ່ອງ ກໍ​ຄື​ສົ່ງ­ເສີມ​ການ​ພັດ­ທະ­ນາ​ນັກ­ກີ­ລາ​ປິ່ງ​ປ່ອງ ທີ່​ເປັນ​ລູກ​ຫຼານ​ຂອງ​ພໍ່​ແມ່​ປະ­ຊາ­ຊົນ​ຊາວ ນວ ກັບ​ມາ​ຍິ່ງ​ໃຫຍ່​ອີກ​ຄັ້ງ ໃນ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl.

ຂ່າວທີ່ກ່ຽວຂ້ອງ