UNHCR ແຈ້ງ​ເຕືອນ​ກ່ຽວ​ກັບ​ການ​ສົ່ງ​ຜູ້​ລີ້​ໄພ​ອາ​ຟະ​ກາ​ນິດ​ສະຖານ​ກັບ​ຄືນ​ບ້ານ​ເດີມ

198 12 ມິ.ຖ. 2019 ຂ່າວຕ່າງປະເທດ
UNHCR ແຈ້ງ​ເຕືອນ​ກ່ຽວ​ກັບ​ການ​ສົ່ງ​ຜູ້​ລີ້​ໄພ​ອາ​ຟະ​ກາ​ນິດ​ສະຖານ​ກັບ​ຄືນ​ບ້ານ​ເດີມ

   ອົງການ​ຂ້າ​ຫຼວງ​ໃຫຍ່​ສະຫະ​ປະຊາ​ຊາດ ກ່ຽວ​ກັບ​ຜູ້​ລີ້​ໄພ (UNHCR) ມີ​ຄຳ​ແຈ້ງ​ເຕືອນ​ໃໝ່​ຫຼ້າ​ສຸດ​ອອກ​ມາ​ວ່າ ການ​ສົ່ງ​ຜູ້​ລີ້​ໄພ​ອາ​ຟະ​ກາ​ນິດ​ສະຖານ ກັບ​ຄືນ​ບ້ານ​ເດີມ (ກັບ​ຄືນ​ໄປ​ຍັງ​ອາ​ຟະ​ກາ​ນິດ​ສະຖານ) ຄວນ​ໄດ້​ຮັບ​ການ​ພິຈາລະນາ​ຢ່າງ​ເຖິງ​ຖອງ​ໄປ​ແຕ່​ລະ​ກໍລະນີ ກ່ອນ​ທີ່​ຈະ​ປະຕິບັດ ທັງ​ນີ້​ກໍ​ເພື່ອ​ຫຼີກເວັ້ນ​ຄວາມ​ສ່ຽງ​ທີ່​ອາດ​ເກີດ​ຂຶ້ນ ແລະ​ ຮັບປະກັນ​ຄວາມ​ປອດ​ໄພ​ໃຫ້​ແກ່​ຜູ້​ລີ້​ໄພ.

    UNHCR ໃຫ້​ຮູ້​ວ່າ ນະຄອນຫຼວງ​ກາ​ບູນ ຂອງ​ອາ​ຟະ​ກາ​ນິດ​ສະຖານ​ໃນ​ເມື່ອ​ກ່ອນ ຖືກ​ຖື​ວ່າ​ເປັນ​ບ່ອນຢູ່​ທີ່​ປອດ​ໄພ​ພໍ​ສົມຄວນ ຢູ່​ພາຍ​ໃນ​ປະເທດ ສຳລັບ​ຜູ້​ລີ້​ໄພ ຊຶ່ງ​ເປັນ​ບ່ອນ​ທີ່​ສະໜອງ​ຄວາມ​ຊ່ວຍເຫຼືອ​ທີ່​ຈຳເປັນ​ໃຫ້​ແກ່​ພວກ​ເຂົາ ເຮັດ​ໃຫ້​ເຂົາເຈົ້າ​ບໍ່​ຕ້ອງ​ອອກ​ໄປ​ຈາກ​ປະເທດ​ຊາດ​ຂອງ​ຕົນ. ເຖິງ​ຢ່າງໃດ​ກໍ​ຕາມ ສະພາບ​ການ​ໃນ​ປັດຈຸບັນ​ນີ້ ໄດ້​ແຕກ​ຕ່າງ​ໄປ​ຈາກ​ເມື່ອ​ກ່ອນ.

    ການ​ຕໍ່ສູ້​ໃນ​ແຕ່​ລະ​ວັນ ລະຫວ່າງ​ກອງ​ກຳລັງ​ຝ່າຍ​ລັດຖະບານ​ອາ​ຟະ​ກາ​ນິດ​ສະຖານ ກັບ​ກຸ່ມ​ມື​ປືນ​ຕາ​ລີ​ບັນ ໄດ້​ເຮັດ​ໃຫ້​ສາມັນ​ຊົນ​ເສຍ​ຊີວິດ​ຈຳນວນ​ຫຼາຍ. ປັດຈຸບັນ​ນີ້ ກຸ່ມ​ມື​ປືນ​ຕາ​ລີ​ບັນ  ຍາດ​ເອົາ​ສິດ​ຄວບ​ຄຸມ​ໄດ້​ສ່ວນ​ໜຶ່ງ​ຂອງ​ດິນແດນ​ອາ​ຟະ​ກາ​ນິດ​ສະຖານ. ຄຽງ​ຄູ່​ກັນ​ນັ້ນ ກຸ່ມ​ກໍ່​ການ​ຮ້າຍ ລັດ​ອິດ​ສະ​ລາມ (IS) ກໍ​ດຳເນີນ​ການ​ໂຈມ​ຕີ​ເປັນ​ປະຈຳ​ຢູ່​ໃນ​ອາ​ຟະ​ກາ​ນິດ​ສະຖານ.

    ເມື່ອ​ເປັນ​ດັ່ງນັ້ນ UNHCR  ຈຶ່ງ​ໄດ້​ແຈ້ງ​ເຕືອນ​ໄປ​ຍັງ​ປະເທດ​ຕ່າງໆ ໃນ​ເວລາ​ທີ່​ຕົກລົງ​ສົ່ງ​ຜູ້​ລີ້​ໄພ​ອາ​ຟະ​ກາ​ນິດ​ສະຖານ ກັບ​ຄືນ​ບ້ານ​ເດີມ ຕ້ອງ​ໄດ້​ທົບ​ທວນ​ຢ່າງ​ເຖິງ​ຖອງ.

ຂ່າວທີ່ກ່ຽວຂ້ອງ