ຂ່າວຫຼ້າສຸດ

ປະຊາຊົນ​ຊີ​ຣີ 2 ລ້ານ​ຄົນ ອາດ​ຈະ​ໜີ​ໄພ​ຮຸນ​ແຮງ​ເຂົ້າ​ໄປ​ໃນ​ຕວກ​ກີ

248 12 ມິ.ຖ. 2019 ຂ່າວຕ່າງປະເທດ
ປະຊາຊົນ​ຊີ​ຣີ 2 ລ້ານ​ຄົນ ອາດ​ຈະ​ໜີ​ໄພ​ຮຸນ​ແຮງ​ເຂົ້າ​ໄປ​ໃນ​ຕວກ​ກີ

    ທ່ານ ພານ​​ົສ ມູມ​ຊິ​​ສ ຜູ້​ປະສານ​ງານ​ດ້ານ​ມະນຸດສະທຳ​ຂອງ​ສະຫະ​ປະຊາ​ຊາດ (​ສປຊ) ກ່ຽວ​ກັບ​ຊີ​ຣີ ກ່າວ​ເມື່ອ​ວັນ​ທີ 10 ມິຖຸນາ​ນີ້​ວ່າ ປະຊາຊົນ​ຊີ​ຣີ 2 ລ້ານ​ຄົນ ອາດ​ຈະ​ໜີ​ໄພ​ຮຸນ​ແຮງ ເຂົ້າ​ໄປ​ໃນ​ປະເທດ​ຕວກ​ກີ ຖ້າ​ຫາກ​ວ່າການ​ຍິງ​ຕໍ່ສູ້​ກັນ​ຍັງ​ສືບຕໍ່​ເພີ່ມ​ຂຶ້ນ ຢູ່​ໃນ​ເຂດ​ທິດຕາເວັນຕົກ ສ່ຽງ​ເໜືອ​ຂອງ​ຊີ​ຣີ.

    ທ່ານ ພານ​​ົສ ມູມ​ຊິ​​ສ ກ່າວ​ເນັ້ນ​ວ່າ ສະຖານະ​ການ​ພວມ​ຂີ້ຮ້າຍ​ລົງ​ໄປ ທ່າມກາງ​ທີ່​ການ​ໂຈມ​ຕີ ຕ່າງໆ ເຮັດ​ໃຫ້​ເກີດ​ຜົນ​ກະທົບ ຫຼື​ເປັນ​ການ​ແນ​ເປົ້າ​ໃສ່​ໂຮງໝໍ ແລະ​ໂຮງຮຽນ ຢູ່​ໃນ​ເຂດ​ຊຸມ​ຊົນ. ຕາມ​ກົດໝາຍ​ວ່າ​ດ້ວຍ​ມະນຸດສະທຳ​ສາກົນ​ແລ້ວ ສິ່ງ​ດັ່ງກ່າວ ບໍ່​ຄວນ​ທີ່​ຈະ​ເກີດ​ຂຶ້ນ.

    ທ່ານ ພານ​​ົສ ມູມ​ຊິ​​ສ ກໍ​ໃຫ້​ຮູ້​ວ່າ ​ສປຊ ໄດ້​ຮຽກຮ້ອງ​ການ​ປະກອບສ່ວນ​ເງິນ 3,3 ຕື້​ໂດ​ລາ ສະຫະລັດ ເພື່ອ​ໃຊ້​ເຂົ້າ​ໃນ​ການ​ຜັນ​ຂະຫຍາຍ​ການເຄື່ອນໄຫວ​ມະນຸດສະທຳ​ຢູ່​ໃນ​ຊີ​ຣີ ພາຍ​ໃນ​ປີ​ນີ້ ແຕ່​ວ່າ​ມາ​ຮອດ​ເວລາ​ນີ້ ​ສປຊ ຫາ​ກໍ​ໄດ້​ຮັບ​ພຽງ 500 ລ້ານ​ໂດ​ລາ​ສະຫະລັດ ສົ່ງ​ຜົນ​ໃຫ້​ຄວາມ ພະຍາຍາມ​ຊ່ວຍເຫຼືອ​ມະນຸດສະທຳ ພົບ​ກັບ​ຄວາມ​ຫຍຸ້ງຍາກ.

    ຄາດ​ວ່າ ສະພາບ​ຄວາມ​ຮຸນ​ແຮງ​ຢູ່​ໃນ​ເຂດ​ທິດຕາເວັນຕົກ​ສ່ຽງ​ເໜືອ​ຊີ​ຣີ ໄດ້​ສົ່ງ​ຜົນ​ໃຫ້​ປະຊາຊົນ ຢ່າງ​ໜ້ອຍ 180.000 ຄົນ ສູນ​ເສຍ​ເຮືອນ​ຊານ ເຮັດ​ໃຫ້​ເກີດ​ຄວາມ​ກັງວົນ ກ່ຽວ​ກັບ​ຄວາມ​ສ່ຽງ ທີ່​ຈະ​ເກີດ​ວິ​ກິດ​ການ​ມະນຸດສະທຳ​ເທື່ອ​ໃໝ່.

ຂ່າວທີ່ກ່ຽວຂ້ອງ