ເກີດ​ນ້ຳ​ຖ້ວມ​ຢ່າງ​ຮ້າຍ​ແຮງ​ຢູ່​ໃນ​ອິນ​ໂດ​ເນ​ເຊຍ

393 12 ມິ.ຖ. 2019 ຂ່າວຕ່າງປະເທດ
ເກີດ​ນ້ຳ​ຖ້ວມ​ຢ່າງ​ຮ້າຍ​ແຮງ​ຢູ່​ໃນ​ອິນ​ໂດ​ເນ​ເຊຍ

   ທ່ານ ຊູ​ໂຕ​ໂປ ພູ​ໂວ ນູ​ໂກຣ​ໂຮ ໂຄສົກ​ຂອງ​ອົງການ​ບັນເທົາ​ໄພພິບັດ​ແຫ່ງ​ຊາດ ອິນ​ໂດ​ເນ​ເຊຍ (BNPB) ແຈ້ງ​ໃຫ້​ຮູ້ເມື່ອ​ວັນ​ທີ 10 ມິຖຸນາ​ນີ້​ວ່າ ໄພ​ນ້ຳ​ຖ້ວມ​ຢູ່​ໃນ​ເຂດ ໂກ​ນາ​ເວ​ເໜືອ ໃນ​ແຂວງ​ສຸລາ​ເວ​ສີ ໄດ້​ເຮັດ​ໃຫ້​ປະຊາຊົນ 4.198 ຄົນ ຕ້ອງ​ອົບ​ພະ​ຍົບ ໄປ​ຢູ່​ໃນ​ທີ່​ປອດ​ໄພ.

    ເມືອງ​ອາ​ເຊ​ຣາ ເປັນ​ພື້ນ​ທີ່ໆໄດ້​ຮັບ​ຜົນ​ກະທົບ​ຮ້າຍ​ແຮງ​ທີ່​ສຸດ ໂດຍ​ມີ 13 ບ້ານ ຖືກ​ນ້ຳ​ຖ້ວມ ມີ​ເຮືອນ 72 ຫຼັງ ຖືກ​ກະແສນ້ຳ​ພັດ​ໄຫຼ​ໄປ ເນື້ອທີ່​ນາ​ເຂົ້າ ສາລີ ແລະ​ໜອງ​ປາ ຫຼາຍ​ຮ້ອຍ​ເຮັກຕາ ໄດ້​ຮັບ​ຄວາມ​ເສຍ​ຫາຍ. ສະເພາະ​ຢູ່​ໃນ​ເຂດ ໂກ​ນາ​ເວ ມີ​ເດັກນ້ອຍ​ໄວ 4 ເດືອນ​ຜູ້​ໜຶ່ງ ເສຍ​ຊີວິດ​ຢູ່​ໃນ​ທ່າມກາງ​ສະພາບ​ນ້ຳ​ຖ້ວມ.

    ໃນ​ຂະນະ​ດຽວ​ກັນ ອົງການ​ອຸຕຸນິຍົມ ອາກາດ ແລະ​ພູມ​ສາດ (BMKG) ຂອງ​ອິນ​ໂດ​ເນ​ເຊຍ ໄດ້​ແຈ້ງ​ເຕືອນ​ເຖິງ​ຄວາມ​ເປັນ​ໄປ​ໄດ້ ທີ່​ຈະ​ເກີດ​ຝົນຕົກ​ໜັກ​ຢູ່​ໃນ ສຸ​ມາ​ຕຣາ ກາລີ​ມັນ​ຕັນ ສຸລາ​ເວ​ສີ ມາ​ລຸ​ກຸ ແລ​ປາ​ປົວ ໃນ​ໄລຍະ​ເວລາ​ແຕ່​ວັນ​ທີ 11-15 ມິຖຸນາ​ນີ້.

ຂ່າວທີ່ກ່ຽວຂ້ອງ