ກົນໂກງເງິນຄ່າງວດລົດ

383 12 ມິ.ຖ. 2019 ຫົວຂໍ້ຂ່າວອື່ນໆ

    ຜູ້​ຂຽນ​ໄດ້​ຮັບ​ຟັງ​ຫາງ​ສຽງຈົ່ມ​ວ່າ​ຈາກ​ມິດ​ຮັກ​ເພື່ອນ​ຜູ້​ອ່ານ ເຈົ້າ​ປະ­ຈຳຂອງ ນສພ ວຽງ​ຈັນໃໝ່​ເຮົາ ໂດຍ​ສະ­ເພາະ ກໍ​ຄື ແຟນພັນ​ແທ້​ເຈົ້າ​ປະ­ຈຳ​ຄໍ​ລຳ​ສັງ­ຄົມ ກົດ­ໝາຍ​ຂອງ​ພວກ​ເຮົາ​ນີ້​ລະ ເລື່ອງ​ເລົ່າ​ທີ່​ເພິ່ນ​ຢາກ​ສ່ອງ​ແສງໃຫ້​ສັງ­ຄົມ​ຮັບ​ຮູ້ ກໍ​ຄື ເພິ່ນ​ໃນນາມ​ທີ່​ເປັນ​ລູກ​ຄ້າ​ຄົນ​ໜຶ່ງ ຢາກຝາກ​ເຖິງ​ບໍ­ລິ­ສັດ​ຜູ້​ໃຫ້​ບໍ­ລິ­ການ ເຊົ່າ​ສິນ​ເຊື່ອ​ທີ່​ຮັບ​ຈັດ​ຟາຍ​ແນນ ລົດ​ທີ່​ຊື້​ຜ່ອນ​ກັບ​ບໍ­ລິ­ສັດ​ຂາຍ​ລົດ ອີກ​ຕໍ່​ໜຶ່ງ ໝາ­ຍວ່າ ຮັບ​ຈ່າຍ​ຄ່າລົດ 100% ແທນ​ລູກ​ຄ້າ​ທີ່​ເງິນ​ບໍ່ພໍ​ຈ່າຍ​ຄ່າ​ລົດ​ໃຫ້​ບໍ­ລິ­ສັດ​ຂາຍລົດ ແລ້ວ​ມາ​ເກັບ​ເງິນ​ກັບ​ລູກ​ຄ້າເປັນ​ງວດໆ ໂດຍ​ໄດ້­ຜົນ​ກຳ­ໄລ ຈາກ​ການ​ຄິດ­ໄລ່​ດອກ​ເບ້ຍ​ເພີ່ມໃສ່​ຕົ້ນ​ທຶນ (ຂໍ​ສະ­ຫງວນ​ຊື່​ບໍ­ລິ­ສັດເນີ) ເຊິ່ງ​ມີ​ລັກ­ສະ­ນະ​ສວຍ​ໂອກາດ ເອົາ​ລັດ​ເອົາ​ປຽບ​ລູກ​ຄ້າດັ່ງ​ຕໍ່​ໄປ​ນີ້:

    ເພື່ອນ​ຜູ້​ອ່ານ​ທ່ານ​ດັ່ງ­ກ່າວ​ໄດ້ ຊື້​ລົດ​ເກັງ​ກັບ​ບໍ­ລິ­ສັດ​ຊື່​ດັງ​ແຫ່ງ​ໜຶ່ງ​ໃນ​ນະ­ຄອນ­ຫຼວງ​ວຽງ​ຈັນ (ຂໍ​ສະ­ຫງວນ​ຊື່) ເຊິ່ງ​ເປັນ​ຕົວແທນ​ຈຳ­ໜ່າຍ​ລົດ​ນຳ​ເຂົ້າ​ຈາກຕ່າງ­ປະ­ເທດ ໂດຍ​ວາງ­ເງິນ​ດາວ 10% ຂອງ​ມູນ​ຄ່າ​ລົດ ອີກ 90% ແມ່ນ​ໃຫ້​ບໍ­ລິ­ສັດ​ເຊົ່າ​ສິນ​ເຊື່ອ​ນີ້ ຈ່າຍ​ໃຫ້​ບໍ­ລິ­ສັດ​ຂາຍ​ລົດ​ກ່ອນ ແລ້ວ​ຈຶ່ງ​ມາ​ເກັບ​ນຳ​ລູກ​ຄ້າ​ຕາມຫຼັງ​ເປັນ​ງວດໆ ໂດຍ​ໄດ້­ຜົນ​ກຳໄລ​ຈາກ​ການ​ຄິດ­ໄລ່​ດອກ​ເບ້ຍເພີ່ມ​ໃສ່​ຕົ້ນ​ທຶນ ແຕ່​ບັນ­ຫາ​ຢູ່​ທີ່ແຕ່​ລະ​ງວດ​ພະ­ນັກ­ງານ​ສິນ​ເຊື່ອ ພັດ​ຕັດ​ເອົາ​ເງິນ​ຄ່າ​ງວດ​ລົດ​ຂອງລູກ​ຄ້າ​ທ່ານ​ນີ້​ເກີນ​ໄປ​ແສນ​ກວ່າກີບ ໂດຍ​ອ້າງ​ວ່າ​ເປັນ​ຄ່າ​ປັບ​ໃໝ ລູກ​ຄ້າ​ຈ່າຍ​ຊ້າ​ເກີນ​ມື້​ກຳ­ນົດໄວ້​ໃນ​ສັນ­ຍາ ແຕ່​ລູກ​ຄ້າ​ກໍ​ບອກວ່າ ລາວ​ໃຊ້​ແອັພ ບີ​ຊີ​ແອ​ລວັນ ຂອງ​ທະ­ນາ­ຄານ​ການ​ຄ້າ​ຕ່າງປະ­ເທດ ມີ​ຍອດ​ເງິນ​ເຂົ້າ-ອອກຕະ­ຫຼອດ ບໍ່​ເຄີຍ​ໜ້ອຍ​ກວ່າ​ຈຳນວນ​ຄ່າ​ງວດ​ລົດ ເປັນ​ຫຍັງ​ຮອດມື້​ຄື​ບໍ່​ຕັດ​ເອົາ​ເລີຍ ຈຳ­ເປັນ​ຫຍັງ​ຕ້ອງ​ປ່ອຍ​ໃຫ້​ກາຍ​ມື້​ຈຶ່ງ​ຕັດ​ເກີນ ພ້ອມ​ຄ່າ​ປັບ​ໃໝ ພະ­ນັກ­ງານ​ສິນເຊື່ອ​ກໍ​ແກ້​ຕົວ​ວ່າ ເປັນ​ນຳ​ລະ­ບົບຂັດ­ຂ້ອງ​ເດີ ງວດ​ທຳ​ອິດ​ຜ່ານ​ໄປ ງວດ 2 ງວດ 3 ບໍ­ລິ­ສັດ​ສິນ​ເຊື່ອກໍ​ຍັງ​ເຮັດ​ຄື­ເກົ່າ ທັງ​ທີ່​ພໍ​ໃກ້​ຮອດມື້​ຊິ​ຊຳ­ລະ​ຄ່າ​ງວດ ທ່ານ​ລູກ​ຄ້າກໍ​ໄດ້​ໂທ​ໄປ​ບອກ​ລັດ​ໄວ້​ວ່າ​ກຽມຕັດ​ເອົາ​ສາ​ເດີ ແຕ່​ກໍ​ຍັງ​ປ່ອຍ​ໃຫ້ກາຍ​ມື້​ໄປ 4-5 ມື້​ຈຶ່ງ​ຕັດ​ເອົາ ພ້ອມ​ບວກ​ຄ່າ​ປັບ​ໃໝ ສະ­ຫຼຸບ​ຄື ຖິ້ມ​ໂທດ​ໃສ່​ລະ­ບົບ​ຕັດ​ເງິນ​ຂັດຂ້ອງ ແລ້ວ​ປັບ​ໃໝ​ລູກ​ຄ້າ ຫາວ່າ​ຈ່າຍ​ຊ້າ​ກາຍ​ກຳ­ນົດ​ຊຳ­ລະ.

    ບັນ­ຫາ​ທີ່​ເພື່ອນ​ຜູ້​ອ່ານ​ທ່ານ​ນີ້ ປະ­ສົບ​ພົບ­ພໍ້​ກັບ​ຕົວ​ເພິ່ນ​ນັ້ນ ຜູ້ຂຽນ​ຄິດ​ວ່າ​ເພື່ອນ​ຜູ້​ອ່ານ​ອີກ​ຫຼາຍ ທ່ານ​ອາດ​ຈະ​ເຄີຍ​ປະ­ສົບ​ພົບ­ພໍ້​ເຊັ່ນ​ດຽວ​ກັນ ພຽງ​ແຕ່​ວ່າ​ຫຼາຍ​ທ່ານ​ອາດ​ຈະ​ບໍ່​ທັນ​ໄດ້​ສັງ­ເກດ ຫຼືອີກ​ຢ່າງ​ກໍ​ບໍ່​ຢາກ​ລຳ​ໄລ​ນຳ ກໍ​ເລີຍ​ປະ­ປ່ອຍ​ມັນ​ໄປ ຄ້ານ​ວົນ ນຳ​ມັນ ຄິດ​ພຽງ​ວ່າ​ເງິນ​ດ້າມເລັກໆ​ນ້ອຍໆ ຢາກ​ຕັດ​ເອົາ​ກໍເອົາ​ໄປ​ໂລດ ແຕ່​ເມື່ອ​ພວກ​ເຮົາມາ​ເບິ່ງ​ໃນ​ແງ່​ຂອງ​ຄວາມ​ເປັນຈິງ​ແລ້ວ ການ​ທີ່​ບໍ­ລິ­ສັດ​ຜູ້​ໃຫ້​ບໍລິ​ການ​ເຊົ່າ​ສິນ​ເຊື່ອ​ຈະ​ມາ​ອາໄສ​ບາງ​ຊ່ອງ​ວ່າງ​ເລັກໆ​ນ້ອຍໆ ເອົາ​ປຽບ​ລູກ​ຄ້າ​ຂອງ​ຕົນ​ແບບໜ້າ​ລັງ​ກຽດ​ ເຫັນ​ວ່າ​ບໍ່​ສົມ­ຄວນເຮັດ ເພາະ​ນັ້ນ​ຖື​ວ່າ​ເປັນ​ການ​ໄຮ້ຈັນ​ຍາ​ບັນ ແລະ ຍັງ​ເປັນ​ການ​ລະເມີດ​ຕົວ​ບົດ​ກົດ­ໝາຍ​ຫຼາຍ​ສະບັບ​ທີ່​ເພິ່ນ​ສ້າງ​ຂຶ້ນ ແລະ ປະກາດ​ໃຊ້​ເພື່ອ​ດັດ​ປັບ​ທຸກ​ສາຍ​ພົວພັນ​ໃນ​ສັງ­ຄົມ​ທີ່​ເກີດ​ຂຶ້ນ ສິ່ງ​ເຫຼົ່ານີ້​ບໍ່​ມີ​ໃຜ​ບອກ​ເລີຍ​ວ່າ​ຈະ​ເປັນແນວ­ໃດ ແຕ່​ມັນ​ໄດ້​ເກີດ​ກັບເພື່ອນ​ຜູ້​ອ່ານ​ທ່ານ​ນີ້​ເອງ​ລ້ວນໆ ເພິ່ນ​ກໍ​ເລີຍ​ຝາກ​ສ່ອງ​ແສງ​ມາບອກ​ເພື່ອນໆ​ຕໍ່ ເພາະ­ວ່າຖ້າ​ໂທໄປ​ຖາມ​ພະ­ນັກ­ງານ​ຄໍ​ເຊັນ​ເຕີ້ (ຮັບ​ສາຍ) ກໍ​ຕອບ​ວ່າ​ເປັນ​ນຳ​ລະບົບ​ເດີ​ທ່ານ... ບໍ­ລິ­ສັດ​ໃຫຍ່​ໂຕ ແລະ ຊື່​ດັງ​ຂະ­ໜາດ​ນີ້​ຍັງ​ຫາ​ກິນເລັກໆ​ນ້ອຍໆ​ຢູ່​ນໍ! ກໍ​ຢາກ​ຝາກເຖິງ​ບໍ­ລິ­ສັດ​ຜູ້​ໃຫ້​ບໍ­ລິ­ການ​ເຊົ່າ​ສິນເຊື່ອ​ດັ່ງ­ກ່າວ​ແດ່​ເນີ້ ໃຫ້​ຫັນ​ເປັນມາດ­ຕະ­ຖານ​ສາ­ກົນ​ນຳ​ເພິ່ນ​ໄດ້ແລ້ວ ຢ່າ​ກິນ​ເລັກ​ກິນ​ນ້ອຍ​ຕາມພາ­ສາ “ເງິນ​ດ້າມ​ຮ້ອຍ ໝູ​ນ້ອຍດ້າມ​ໂຕ” ຖ້າ​ເອົາ​ຈິງ​ເອົາ​ຈັງ​ໃນ​ການ­ຈັດ­ຕັ້ງ​ປະ­ຕິ­ບັດ​ຕາມ​ຕົວ​ບົດກົດ­ໝາຍ​ທີ່​ລັດ​ປະ­ກາດ​ໃຊ້​ຄັກ­ແນ່ ທ່ານ​ອາດ​ຈະ​ຖືກ​ຟ້ອງ​ຮ້ອງ ຖືກດຳ­ເນີນ​ຄະ­ດີ​ຈາກ​ລູກ​ຄ້າ​ຂອງທ່ານ​ເອງ​ກໍ​ເປັນ​ໄດ້.

    ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ (ສະ­ບັບ​ປັບ­ປຸງ​ໃໝ່) ໝວດ​ທີ V ມາດ­ຕາ 120 ໄດ້ ລະ­ບຸ​ໄວ້​ວ່າ: ບຸກ­ຄົນ​ໃດ​ຫາກ​ໄດ້ໃຊ້​ເລ່​ລ່ຽມ​ຕົວະ​ຍົວະ​ຫຼອກ​ລວງ ດ້ວຍ​ວິ­ທີ​ໃດ​ກໍ​ຕາມ ເພື່ອ​ໃຫ້​ຜູ້​ອື່ນເອົາ​ຊັບ​ໃຫ້​ຕົນ ຈະ​ຖືກ​ລົງ­ໂທດຕັດ​ອິດ­ສະ­ຫຼະ­ພາບ​ແຕ່ 3 ເດືອນຫາ 2 ປີ ແລະ ຈະ​ຖືກ​ປັບ​ໃໝແຕ່ 200.000 ກີບ​ຫາ 5.000.000 ກີບ ໃນ​ກໍ­ລະ­ນີ​ທີ່​ຜູ້ກະ­ທຳ​ຜິດ​ຫາກ​ໄດ້​ເອົາ​ການ​ສໍ້ໂກງ​ຊັບ​ເປັນ​ອາ­ຈີນ (ເຮັດ​ເລື້ອຍເລື້ອຍ​ຈົນ​ເປັນ­ນິດ​ໄສ) ມີ​ການ​ຈັດຕັ້ງ​ເປັນ​ກຸ່ມ ຫຼື ໃນ​ກໍ­ລະ­ນີ​ທີ່​ມີຄວາມ​ເສຍ​ຫາຍ​ຢ່າງ​ໃຫຍ່​ຫຼວງ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະພາບ​ແຕ່ 2 ປີ ຫາ 5 ປີ ແລະ ຈະ​ຖືກ​ປັບ​ໃໝ​ແຕ່ 500.000 ກີບ ຫາ 10.000.000 ກີບ ຂະນະ​ທີ່​ມາດ­ຕາ 121 ຍັງ​ລະ­ບຸ​ເຖິງການ​ຍັກ​ຍອກ​ຊັບຕື່ມ​ວ່າ: ບຸກຄົນ​ໃດ​ຫາກ​ໄດ້​ສວຍ​ໃຊ້​ຄວາມເຊື່ອ​ໃຈ ເພື່ອ​ລັກ​ໂລບ​ເອົາ ຕັດຮອນ​ເອົາ ຫຼື ສັບ​ປ່ຽນ​ເອົາ​ຊັບ​ທີ່​ຕົນ​ໄດ້​ຖືກ​ມອບ​ໝາຍ​ໃຫ້​ຮັກ­ສາ ຫຼື ເພື່ອ​ຈຸດ­ປະ­ສົງ​ໃດ​ໜຶ່ງ ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະພາບ​ແຕ່ 3 ເດືອນ​ຫາ 2 ປີ ແລະ ຈະ​ຖືກ​ປັບ​ໃໝ​ແຕ່ 200.000 ກີບ​ຫາ 5.000.000 ກີບ ໃນ​ກໍລະ​ນີ​ທີ່​ຜູ້​ກະ­ທຳ​ຜິດ​ຫາກ​ໄດ້​ເອົາການ​ຍັກ​ຍອກ​ຊັບ​ເປັນ​ອາ­ຈີນ (ເຮັດ​ເລື້ອຍໆ​ຈົນ​ເປັນ­ນິດ​ໄສ) ມີ​ການ­ຈັດ­ຕັ້ງ​ເປັນ​ກຸ່ມ ຫຼື ໃນ​ກໍລະ​ນີ​ທີ່​ມີ​ຄວາມ​ເສຍ​ຫາຍ​ຢ່າງໃຫຍ່​ຫຼວງ ຈະ​ຖືກ​ລົງ­ໂທດ​ຕັດອິດ­ສະ­ຫຼະ­ພາບ​ແຕ່ 2 ປີ​ຫາ 5 ປີ ແລະ ຈະ​ຖືກ​ປັບ​ໃໝ​ແຕ່ 500.000 ກີບ​ຫາ 10.000.000 ກີບ ເຊິ່ງ​ຄວາມ​ພະ­ຍາ­ຍາມ​ກໍ່ການ​ກະ­ທຳ​ຜິດ (ທັງ​ສໍ້​ໂກງ ທັງຍັກ​ຍອກ) ກໍ​ຈະ​ຖືກ​ລົງ­ໂທດ​ຄືກັນ.

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ