ເບີ່ງບ້ານເຂົາເອົາບົດຮຽນ 12-06-2019

374 12 ມິ.ຖ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ທີ່​ໜ້າ​ສົນ­ໃຈ 3 ເລື່ອງ​ຄື: ບັນ­ຫາ​ອາ­ຫານ​ເປັນ​ພິດ ບັນ­ຫາ​ເດັກ​ຊາຍ​ຖືກ​ລະ­ເມີດ​ທາງ​ເພດ ແລະ ການ​ງົດ​ຈູດ​ທູບ​ບູ­ຊາ ເພື່ອ​ຫຼຸດ­ຜ່ອນ​ມົນ​ລະ​ພິດ​ທາງ​ອາ­ກາດ ເຫດ­ການ​ເຫຼົ່າ​ນີ້​ເກີດ​ຂຶ້ນ​ຢູ່​ມົງ​ໂກນ ກຳ­ປູ­ເຈຍ ແລະ ເກາະ​ໃຕ້​ຫວັນ ຕາມ​ລຳ­ດັບ.

    ທີ່ ມົງ​ໂກນ: ຂ່າວ​ຕ່າງ­ປະ­ເທດ ໃນ​ທ້າຍ​ເດືອນ​ກຸມ­ພາ​ປີ​ນີ້​ໃຫ້​ຮູ້​ວ່າ: ທາງ​ການ​ປະ­ເທດ​ມົງ​ໂກນ ຫຼື ມົງ​ໂກ​ລີ ໄດ້​ອອກ​ຄຳ​ສັ່ງ​ເດັດ­ຂາດ ໃຫ້​ປິດ​ຮ້ານ​ອາ­ຫານ​ໃນ​ເຄືອ KFC (ໄກ່​ຈືນ​ເຄັນ​ຕັກ​ຄີ ສະ­ຫະ­ລັດ​ອາ​ເມ​ຣິ​ກາ) ທັງ​ໝົດ​ໃນ​ທົ່ວ​ປະ­ເທດ​ພາຍ­ຫຼັງ​ມີ​ລູກ​ຄ້າ​ກວ່າ 200 ຄົນ ເກີດ​ອາ­ການ​ບໍ່​ສະ­ບາຍ ພາຍ­ຫຼັງ​ກິນ​ຈືນ​ໄກ​ຢູ່​ຮ້ານ KFC ເຖິງ​ຂັ້ນ​ໄດ້​ຮັບ​ການ​ປິ່ນ­ປົວ ຢູ່​ໂຮງ­ພະ­ຍາ­ບານ​ຫຼາຍ​ສິບ​ຄົນ ການ​ວິ­ໄຈ​ຊີ້​ໃຫ້​ເຫັນ​ວ່າ ໄກ່​ຈືນ​ທີ່​ຮ້ານ​ລື​ຊື່​ລະ­ດັບ​ໂລກ​ນີ້​ມີ​ສານ­ພິດ​ເຈືອ​ປົນ ຊຶ່ງ​ເຮັດ​ໃຫ້​ຜູ້​ບໍ­ລິ­ໂພກ​ເກີດ​ອາ­ການ​ຖອກ­ທ້ອງ​ຮາກ ແລະ ໄຂ້​ຂຶ້ນ​ສູງ ຂ່າວ​ບອກ​ວ່າ ເຫດ­ການ​ນີ້ ເກີດ​ຂຶ້ນ​ໃນ​ຕົ້ນ​ເດືອນ​ກຸມ­ພາ​ປີ​ນີ້ ພາຍ­ຫຼັງ​ລູກ​ຄ້າ 16 ຄົນ​ລົ້ມ​ປ່ວຍ ຍ້ອນ​ກິນ​ໄກ່​ຈືນ KFC ພໍ​ຕົກ​ມາ​ຮອດ​ທ້າຍ​ເດືອນ​ດຽວ​ກັນ​ນີ້ ຈຳ­ນວນ​ຜູ້​ເຈັບ­ເປັນ​ໄດ້​ເພີ່ມ​ຂຶ້ນ​ເປັນ 247 ຄົນ ໃນ​ນັ້ນ 42 ຄົນ​ໄດ້​ເຂົ້າ​ໄປ​ປິ່ນ­ປົວ​ຢູ່​ໂຮງ­ພະ­ຍາ­ບານ​ຢູ່​ມົງ​ໂກນ ຮ້ານ​ອາ­ຫານ KFC ມີ​ທັງ​ໝົດ 11 ແຫ່ງ ແລະ ທັງ​ໝົດ​ຕັ້ງ​ຢູ່​ນະ­ຄອນ­ຫຼວງ​ອູ​ລານ​ບາ​ຕໍ ຜົນ​ການ​ສອບ​ສວນ​ກ່ຽວ​ກັບ​ກໍ­ລະ­ນີ​ໄກ່​ຈືນ​ເປັນ​ພິດ​ຊີ້​ບອກ​ວ່າ ພະ­ນັກ­ງານ​ໃນ​ຮ້ານ KFC 35 ຄົນ ບໍ່​ໄດ້​ມາດ­ຕະ­ຖານ ຄຸນ​ນະ​ພາບ​ໃນ​ການ​ປຸງ​ແຕ່ງ­ອາ­ຫານ ສ່ວນ​ຮ້ານ​ອາ­ຫານ​ເອງ​ກໍ​ຂາດ​ຫຼັກ​ອະ­ນາ­ໄມ ແລະ ຂາດ​ຂອດ​ການ​ຄຸ້ມ​ຄອງ​ຮ້ານ​ອາ­ຫານ​ເຄືອ KFC ມີ​ຮ້ານ​ອາ­ຫານ ຫຼາຍ​ກວ່າ 20.000 ແຫ່ງ​ໃນ 109 ປະ­ເທດ​ທົ່ວ​ໂລກ ທີ່​ບໍ­ລິ­ການ​ອາ­ຫານ​ຈານ​ດ່ວນ​ປະ­ເພດ​ໄກ່​ຈືນ ເປັນ­ຕົ້ນ​ຕໍ ກໍ­ລະ­ນີ​ຢູ່​ມົງ​ໂກນ​ນີ້ ຄວນ​ຖື​ເປັນ​ສະ­ຕິ​ເຕືອນ­ໃຈ ຢ່າ​ເຫີ່​ນຳ​ອາ­ຫານ​ນອກ ອາ­ຫານ​ຈານ​ດ່ວນ​ເກີນ​ໄປ ເພາະ​ການ​ເຫີ່​ນັ້ນ​ເຮັດ​ໃຫ້​ຄົນ​ຫຼົງ​ໂຕ​ໄດ້.

    ທີ່ ກຳ­ປູ­ເຈຍ: ໜັງ­ສື­ພິມ​ວຽງ​ຈັນ​ທາມ (8/3/2019) ໃຫ້​ຮູ້​ວ່າ ເດັກ​ຊາຍ​ກຳ­ປູ­ເຈຍ​ນັ້ນ ພວມ​ປະ​ເຊີນ​ກັບ​ຄວາມ​ສ່ຽງ​ທີ່​ຈະ​ຕົກ​ເປັນ​ເຫຍື່ອ​ການ​ລະ­ເມີດ​ທາງ​ເພດ ບໍ່​ຫຼຸດ​ເດັກ​ຍິງ ນີ້​ຄື​ຂໍ້​ມູນ​ຈາກ​ໂຄງ­ການ​ສຳ​ຫຼວດ​ທີ່​ໃສ່​ຊື່­ວ່າ “ກຳ­ປູ­ເຈຍ​ໃນ​ບາດ­ກ້າວ​ທຳ​ອິດ” (First Step Cambodia) ຜົນ​ການ​ສຳ​ຫຼວດ​ໄດ້​ຊີ້​ອອກ​ວ່າ ຜູ້​ເປັນ​ພໍ່​ແມ່​ຜູ້​ປົກ­ຄອງ​ຂອງ​ເດັກ ກໍ​ຄື ທາງ​ການ​ກຳ­ປູ­ເຈຍ​ນັ້ນ ຍັງ​ມີ​ຄວາມ​ຮັບ​ຮູ້​ໃນ​ລະ­ດັບ​ຕ່ຳ​ກ່ຽວ​ກັບ​ວິ­ທີ​ປ້ອງ​ກັນ​ບໍ່​ໃຫ້​ເດັກ​ຊາຍ ຕົກ​ເປັນ​ເຫຍື່ອ​ຂູດ​ຮີດ​ທາງ​ເພດ​ນັ້ນ ມີ​ຈຳ­ນວນ​ຫຼາຍ​ກວ່າ​ເດັກ​ຍິງ ໂຄງ­ການ “ກຳ­ປູ­ເຈຍ​ໃນ​ບາດ­ກ້າວ​ທຳ​ອິດ” ນີ້ ໄດ້​ຮັບ​ການ​ສ້າງ­ຕັ້ງ​ຂຶ້ນ​ເພື່ອ​ລົງ​ເລິກ ແກ້​ໄຂ​ບັນ­ຫາ​ການ​ຂູດ​ຮີດ​ທາງ​ເພດ​ຕໍ່​ເດັກ­ນ້ອຍ​ເພດ​ຊາຍ ແລະ ເພື່ອ​ໃຫ້­ການ​ຊ່ວຍ­ເຫຼືອ​ບັນ­ດາ​ເຫຍື່ອ​ເພດ​ຊາຍ​ທີ່​ຖືກ​ຂູດ​ຮີດ​ທາງ​ເພດ ແລະ ຄອບ­ຄົວ​ຂອງ​ພວກ​ເຂົາ­ເຈົ້າ ຂໍ້​ແນະ­ນຳ​ຈາກ​ຜົນ​ການ​ສຳ​ຫຼວດ​ບອກ​ວ່າ ຍ້ອນ​ປະ­ເພ­ນີ ແລະ ຄ່າ​ນິ­ຍົມ​ທາງ​ສັງ­ຄົມ​ກຳ­ປູ­ເຈຍ ທີ່​ຖື​ວ່າ​ເພດ​ຊາຍ​ສຳ­ຄັນ​ເໜືອກ​ວ່າ​ເພດ​ຍິງ ແລະ ຍ້ອນ​ຄວາມ​ເຂົ້າ­ໃຈ​ທີ່​ວ່າ ຜູ້​ຊາຍ ຫຼື ເດັກ​ຊາຍ ບໍ່​ສາ­ມາດ​ຕົກ​ເປັນ​ເຫຍື່ອ​ທາງ​ເພດ​ໄດ້ ດັ່ງ­ນັ້ນ ຈຶ່ງ​ເຮັດ​ໃຫ້​ເດັກ​ຊາຍ​ມີ​ຄວາມ​ສ່ຽງ​ຖືກ​ຂູດ​ຮີດ​ທາງ​ເພດ​ຫຼາຍ​ກວ່າ​ເດັກ​ຍິງ.

    ທີ່ ເກາະ​ໄຕ້​ຫວັນ: ການ​ຮ່ວມ​ແຮງ​ຮ່ວມ​ໃຈ ເພື່ອ​ຫຼຸດ­ຜ່ອນ​ມົນ​ລະ​ພິດ​ທາງ​ອາ­ກາດ ຢູ່​ເກາະ​ໄຕ້​ຫວັນ ໄດ້​ດຳ­ເນີນ​ໄປ​ຢ່າງ​ລະ­ອຽດ ແລະ ກິ­ກີ​ຂະ­ໜາດ ການ​ຈູດ​ທູບ​ບູ­ຊາ​ຕາມ​ວັດ​ຕ່າງໆ ກໍ​ໄດ້​ມີ​ການ​ຈຳ­ກັດ ໃນ​ເມື່ອ​ກ່ອນ​ຊາວ​ເກາະ​ໄຕ້​ຫວັນ ສະ­ແດງ​ຄວາມ​ນົບ​ນ້ອມ​ຕໍ່​ຮູບ​ປັ້ນ​ພະ​ເຈົ້າ​ທີ່​ເປັນ​ຕົວ​ແທນ​ແຫ່ງ​ຄວາມ​ເປັນ​ທຳ ແຫ່ງ​ສາຍ​ໄຍ​ອ້າຍ-ນ້ອງ ກໍ​ຄື ພະ​ເຈົ້າ​ແຫ່ງ​ໄຊ­ຊະ­ນະ​ໃນ​ສົງ­ຄາມ ດ້ວຍ​ການ​ຈູດ​ທູບ​ບູ­ຊາ ແຕ່​ໃນ​ປັດ­ຈຸ­ບັນ ພວກ​ເຂົາ­ເຈົ້າ​ມີ​ພຽງ​ປະ­ນົມ​ມື​ນົບ ແລະ ກົ້ມ​ຫົວ​ລົງ​ເທົ່າ​ນັ້ນ​ນີ້​ຄື​ມິ​ຕິ​ໃໝ່​ໃນ​ບັນ­ດາ​ວັດ​ຢູ່​ເກາະ​ໄຕ້​ຫວັນ ແນ­ໃສ່​ຫຼຸດ­ຜ່ອນ​ຄວັນ​ຈາກ​ການ​ຈູດ​ທູບ ຊຶ່ງ​ຈະ​ເຮັດ​ໃຫ້​ອາ­ກາດ​ເປັນ​ພິດ​ໄດ້.

ຂ່າວທີ່ກ່ຽວຂ້ອງ