ຂ່າວຫຼ້າສຸດ

ພັດທະນານິຄົມອຸດສາຫະກຳ ນວ ໃຫ້ເປັນເຂດນິຄົມອຸດສາຫະກຳສີຂຽວ

417 12 ມິ.ຖ. 2019 ຂ່າວໜ້າ​ໜຶ່ງ
ພັດທະນານິຄົມອຸດສາຫະກຳ ນວ ໃຫ້ເປັນເຂດນິຄົມອຸດສາຫະກຳສີຂຽວ

    ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ເຄື່ອນ​ໄຫວ​ຢ້ຽມ­ຢາມ ແລະ ເຮັດ​ວຽກ​ຢູ່​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ (ອຄ ນວ) ວັນ​ທີ 11 ມິ­ຖຸ­ນາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ເບີ​ລິນ ເພັດ​ຈັນ­ທະ​ຣາດ ຫົວ­ໜ້າ​ພະ​ແນກ ອຄ ນວ ພ້ອມ​ດ້ວຍ​ຄະ­ນະ​ພະ​ແນກ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ເບີ​ລິນ ເພັດ​ຈັນ­ທະ​ຣາດ ກ່າວ​ວ່າ: ປີ 2019 ພະ​ແນກ ອຄ ນວ ໄດ້​ຮັບ​ງົບ­ປະ­ມານ​ໂຄງ­ການ​ລົງ­ທຶນ​ຂອງ​ລັດ 10 ໂຄງ­ການ ມູນ​ຄ່າ 137 ລ້ານ​ກີບ ສ່ວນ​ປີ 2020 ໄດ້​ນຳ​ສະ­ເໜີ​ເພື່ອ​ພິ­ຈາ­ລະ­ນາ 10 ໂຄງ­ການ ມູນ​ຄ່າ 1,24 ຕື້​ກີບ ໄດ້​ຈັດ​ຕັ້ງ​ປະ­ຕິ­ບັດ​ໂຄງ­ການ​ສຳ​ຫຼວດ​ອອກ​ແບບ ເພື່ອ​ສ້າງ​ເຂດ​ການ​ຄ້າ​ສາ­ກົນ ເນື້ອ­ທີ່ 146,2 ເຮັກ­ຕາ ຢູ່​ເຂດ​ນິ­ຄົມ​ອຸດ­ສາ­ຫະ­ກຳ ຕາມ​ສັນ­ຍາ​ວ່າ​ດ້ວຍ​ການ​ອອກ​ແບບ ປັດ­ຈຸ­ບັນ ໄດ້​ສຳ­ເລັດ​ການ​ກວດ­ກາ​ວຽກ​ງານ​ສຳ​ຫຼວດ​ອອກ​ແບບ​ເບື້ອງ​ຕົ້ນ ສຳ­ເລັດ​ການ​ສຳ​ຫຼວດ​ອອກ​ແບບ​ໂຄງ­ການ​ສຶກ​ສາ-ອອກ​ແບບ​ເຂດ​ປຸງ​ແຕ່ງ​ກະ­ສິ­ກຳ ເພື່ອ​ສົ່ງ​ອອກ​ໃນ​ເນື້ອ­ທີ່ 100 ເຮັກ­ຕາ ມາ​ຮອດ​ໄຕ​ມາດ 1 ປີ 2019 ນວ ມີ​ໂຮງ­ງານ​ອຸດ­ສາ­ຫະ­ກຳ​ປຸງ​ແຕ່ງ ແລະ ຫັດ­ຖະ­ກຳ 3.033 ແຫ່ງ ມູນ​ຄ່າ 4.653 ຕື້​ກີບ ມີ­ແຮງ​ງານ 53.803 ຄົນ 173.743 ແຮງ​ມ້າ ການ​ດັດ­ສົມ​ອຸດ­ສາ­ຫະ­ກຳ​ປຸງ​ແຕ່ງ​ໄມ້ ແລະ ເຟີ​ນິ​ເຈີ ມີ​ໂຮງ­ງານ 162 ໂຮງ­ງານ ທ້າຍ​ປີ 2018 ສາ­ມາດ​ປະ­ຕິ­ບັດ​ດັດ­ສົມ​ໂຮງ­ງານ​ສຳ­ເລັດ 103 ໂຮງ­ງານ ເທົ່າ​ກັບ 63,58% ຂອງ​ຈຳ­ນວນ​ໂຮງ­ງານ​ທັງ​ໝົດ ສິນ­ຄ້າ​ທີ່​ໄດ້​ຮັບ​ກາ​ໝາຍ​ໜຶ່ງ​ເມືອງ​ໜຶ່ງ​ຜະ­ລິດ​ຕະ​ພັນ​ແຫ່ງ​ຊາດ 48 ຫົວ­ໜ່ວຍ 10 ກຸ່ມ​ການ​ຜະ­ລິດ 38 ຫົວ­ໜ່ວຍ​ວິ​ສາ​ຫະ​ກິດ 213 ຜະ­ລິດ​ຕະ​ພັນ ໃນ 43 ບ້ານ 9 ເມືອງ ໃນ ນວ ຮອດ​ປີ 2018 ນວ ມີ​ຫົວ­ໜ່ວຍ​ທຸ­ລະ​ກິດ 46.122 ຫົວ­ໜ່ວຍ ທຶນ​ຈົດ​ທະ­ບຽນ 246.415 ຕື້​ກີບ ເປັນ​ການ​ລົງ­ທຶນ​ພາຍ​ໃນ 42.462 ຫົວ­ໜ່ວຍ ຕ່າງ­ປະ­ເທດ 2.035 ຫົວ­ໜ່ວຍ ແລະ ພາຍ​ໃນ​ຮ່ວມ​ກັບ​ຕ່າງ­ປະ­ເທດ 1.390 ຫົວ­ໜ່ວຍ ການ​ນຳ​ເຂົ້າ​ມີ​ມູນ​ຄ່າ 1.623 ລ້ານ​ໂດ​ລາ​ສະ­ຫະ­ລັດ ທຽບ­ໃສ່​ໄລ­ຍະ​ດຽວ​ກັນ​ປີ 2017 ເພີ່ມ​ຂຶ້ນ 27,13% ສົ່ງ​ອອກ 605 ລ້ານ​ໂດ​ລາ​ສະ­ຫະ­ລັດ ຫຼຸດ​ລົງ 5,62% ສະ­ເພາະ 3 ເດືອນ​ຕົ້ນ​ປີ 2019 ການ​ສົ່ງ​ອອກ​ປະ­ຕິ­ບັດ​ໄດ້ 5.782.173,53 ໂດ​ລາ​ສະ­ຫະ­ລັດ.

    ທ່ານ​ຮອງ​ເຈົ້າ​ຄອງ ກໍ​ໄດ້​ໃຫ້​ທິດ​ຊີ້​ນຳ​ໃນ​ການ​ສຸມ​ໃສ່​ປະ­ຕິ­ບັດ​ແຜນ­ການ​ໃນ­ຕໍ່­ໜ້າ ໂດຍ​ສະ­ເພາະ ການ​ປະ­ຕິ­ບັດ​ຂໍ້​ຕົກ­ລົງ​ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ປະ­ຈຳ​ປີ 2019 ທີ່ ນວ ມອບ​ໝາຍ​ໃຫ້ 17 ໜ້າ​ວຽກ​ໃຫ້​ສຳ­ເລັດ​ຕາມ​ຄາດ­ໝາຍ ເປັນ­ຕົ້ນ ການ​ສືບ­ຕໍ່​ພັດ­ທະ­ນາ​ນິ­ຄົມ​ອຸດ­ສາ­ຫະ­ກຳ ນວ ໃຫ້​ເປັນ​ເຂດ​ນິ­ຄົມ​ອຸດ­ສາ­ຫະ­ກຳ​ສີ­ຂຽວ ເປັນ​ມິດ​ຕໍ່​ສິ່ງ­ແວ­ດລ້ອມ ຕາມ​ແຜນ­ທີ່​ໄດ້​ຮັບ­ຮອງ​ໄວ້ ໂດຍ​ສະ­ເພາະ ດຶງ​ດູດ​ນັກ​ລົງ­ທຶນ​ເຂົ້າ​ໃນ​ເຂດ​ອຸດ­ສາ­ຫະ­ກຳ​ປະ­ເພດ 1 ສົ່ງ­ເສີມ​ໂຄງ­ການ​ຜະ­ລິດ​ເປັນ​ສິນ­ຄ້າ ເອົາ­ໃຈ­ໃສ່​ປັບ­ປຸງ​ຍົກ​ລະ­ດັບ ບັນ­ດາ​ໂຮງ­ງານ​ອຸດ­ສາ­ຫະ­ກຳ​ປຸງ​ແຕ່ງ​ໃຫ້​ໄດ້​ມາດ­ຕະ­ຖານ ຈັດ​ຕັ້ງ​ການ​ດັດ­ສົມ​ໂຮງ­ງານ​ປຸງ​ແຕ່ງ​ໄມ້​ໃຫ້​ສຳ­ເລັດ 9 ເມືອງ ສືບ­ຕໍ່​ຄຸ້ມ​ຄອງ​ລາ­ຄາ​ສິນ­ຄ້າ​ໃຫ້​ຖືກ​ລະ­ບຽບ ເອົາ­ໃຈ­ໃສ່​ປະ­ຕິ­ບັດ​ແຜນ​ພັດ­ທະ­ນາ​ວິ​ສາ​ຫະ​ກິດ ແລະ ອື່ນໆ ເພື່ອ​ປະ­ກອບ­ສ່ວນ​ເຮັດ​ໃຫ້​ເສດ­ຖະ­ກິດ-ສັງ­ຄົມ ນວ ມີ​ຄວາມ​ໜັກ​ແໜ້ນ ແລະ ເຂັ້ມ­ແຂງ.

ຂ່າວທີ່ກ່ຽວຂ້ອງ