ອາຊຽນ ຮ່ວມມືຄຸ້ມຄອງການສົ່ງອອກ-ນຳເຂົ້າສິນຄ້າ

511 12 ມິ.ຖ. 2019 ຂ່າວໜ້າ​ໜຶ່ງ
ອາຊຽນ ຮ່ວມມືຄຸ້ມຄອງການສົ່ງອອກ-ນຳເຂົ້າສິນຄ້າ

    ກອງ​ປະ­ຊຸມ​ຫົວ­ໜ້າ​ກົມ​ພາ­ສີ​ອາ​ຊຽນ ຄັ້ງ​ທີ 28 ຈັດ​ຂຶ້ນ​ວັນ​ທີ 11-13 ມິ­ຖຸ­ນາ 2019 ຢູ່​ນະ­ຄອນ­ຫຼວງ​ວຽງ​ຈັນ ຕາມ​ຮອບ​ວຽນ​ຂອງ​ອາ​ຊຽນ ໂດຍ​ເປັນ​ປະ­ທານ​ຂອງ​ທ່ານ ບຸນ​ປະ­ເສີດ ສີ​ກຸນ­ລະ­ບຸດ ຮັກ­ສາ​ການ​ຫົວ­ໜ້າ​ກົມ​ພາ­ສີ ກະ­ຊວງ​ການ​ເງິນ ມີ​ທ່ານ​ນາງ ທິບ​ພະ​ກອນ ຈັນ­ທະ​ວົງ­ສາ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ພ້ອມ​ດ້ວຍ​ຫົວ­ໜ້າ​ກົມ​ພາ­ສີ​ປະ­ເທດ​ສະ­ມາ­ຊິກ​ອາ​ຊຽນ ກອງ​ເລ­ຂາ​ອາ​ຊຽນ ອົງ­ການ​ພາ­ສີ​ໂລກ ແລະ ປະ­ເທດ​ຄູ່​ຮ່ວມ​ພັດ­ທະ­ນາ ເຂົ້າ​ຮ່ວມ.

    ທ່ານ ບຸນ​ປະ­ເສີດ ສີ​ກຸນ­ລະ­ບຸດ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ເປັນ​ສ່ວນ​ປະ­ກອບ​ທີ່​ສຳ­ຄັນ ໃນ​ການ​ສ້າງ​ປະ­ຊາ​ຄົມ​ເສດ­ຖະ­ກິດ​ອາ​ຊຽນ (AEC) ເພື່ອ​ປຶກ­ສາ​ຫາ­ລື​ການ​ເຊື່ອມ​ໂຍງ​ວຽກ​ງານ​ພາ­ສີ​ຂອງ​ປະ­ເທດ​ສະ­ມາ­ຊິກ​ອາ​ຊຽນ ປັບ­ປຸງ​ລະ­ບົບ​ພາ­ສີ​ອາ​ຊຽນ​ໃຫ້​ມີ​ປະ​ສິດ­ທິ​ຜົນ​ສູງ ຮັກ­ສາ​ໄດ້​ຄວາມ​ປອດ​ໄພ​ຕາມ​ດ່ານ​ພາ­ສີ​ຊາຍ​ແດນ ສ້າງ​ສິ່ງ​ອຳ­ນວຍ​ຄວາມ​ສະ­ດວກ​ທາງ​ການ​ຄ້າ ແລະ ການ​ຄຸ້ມ​ຄອງ​ການ​ສົ່ງ​ອອກ-ນຳ​ເຂົ້າ​ສິນ­ຄ້າ ຜ່ານ​ດ່ານ​ພາ­ສີ​ສາ­ກົນ.

    ກອງ​ປະ­ຊຸມ​ຄັ້ງ​ນີ້ ຈະ​ປຶກ­ສາ​ຫາ­ລື​ກັນ 40 ກວ່າ​ຫົວ­ຂໍ້ ເຊິ່ງ​ຈະ​ມີ​ການ​ປຶກ­ສາ​ຫາ­ລື​ພາຍ​ໃນ​ອາ​ຊຽນ ປະ­ມານ 15 ຫົວ­ຂໍ້ ປຶກ­ສາ​ຫາ­ລື​ກັບ​ບັນ­ດາ​ປະ­ເທດ​ຄູ່​ຮ່ວມ​ພັດ­ທະ­ນາ ປະ­ມານ 15 ຫົວ­ຂໍ້ ແລະ ປຶກ­ສາ​ຫາ­ລື​ກັບ​ພາກ​ທຸ­ລະ​ກິດ 10 ຫົວ­ຂໍ້ ນອກ​ນີ້ ກົມ​ພາ­ສີ​ຍັງ​ຈະ​ມີ​ການ​ພົບ​ປະ 2 ຝ່າຍ ກັບ 7 ປະ­ເທດ ເພື່ອ​ແລກ­ປ່ຽນ​ບົດ­ຮຽນ ແລະ ຮ່ວມ​ມື​ດ້ານ​ການ​ພັດ­ທະ­ນາ​ບຸ​ຄະ­ລາ​ກອນ ແລະ ເຕັກ­ນິກ​ວິ­ຊາ​ການ​ສະ­ເພາະ​ພາ­ສີ.

ຂ່າວທີ່ກ່ຽວຂ້ອງ