ສະເຫຼີມສະຫຼອງວັນຜະດຸງຄັນສາກົນ

504 12 ມິ.ຖ. 2019 ຂ່າວໜ້າ​ໜຶ່ງ
ສະເຫຼີມສະຫຼອງວັນຜະດຸງຄັນສາກົນ

    ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ສະ­ຫະ​ປະ­ຊາ​ຊາດ ກອງ​ທຶນ​ປະ­ຊາ­ກອນ (UNFPA) ກະ­ຊວງ​ສາ­ທາ­ລະ­ນະ​ສຸກ ໄດ້​ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ຜະ­ດຸງ­ຄັນ​ສາ­ກົນ (IDM) ຂຶ້ນ​ວັນ​ທີ 11 ມິ­ຖຸ­ນາ 2019 ຢູ່​ໂຮງ­ແຮມ​ດອນ​ຈັນ​ພາ​ເລດ ໂດຍ​ເປັນ​ປະ­ທານ​ຂອງ​ທ່ານ ຄຳ​ພອນ ພຸດ​ທະ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ​ນາງ Mariam Kham ຜູ້­ຕາງ­ໜ້າ​ອົງ­ການ UNFPA ປະ­ຈຳ​ລາວ ພ້ອມ​ດ້ວຍ​ປະ­ທານ​ສະ­ພາ​ຄຸ້ມ​ຄອງ​ວິ­ຊາ​ຊີບ​ປິ່ນ­ປົວ ຜູ້­ຕາງ­ໜ້າ​ຈາກ​ກົມ ພະ­ແນກ­ການ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກ່ອນ​ໜ້າ​ນີ້ 10 ປີ ແມ່­ຍິງ​ຖື­ພາ 8 ໃນ 10 ຄົນ​ຂອງ​ການ​ເກີດ​ລູກ ແມ່ນ​ບໍ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ຜູ້​ຊ່ຽວ­ຊານ​ດ້ານ​ສຸ­ຂະ­ພາບ ຍິ່ງ​ໄປ​ກວ່າ​ນັ້ນ​ເຂດ​ຫ່າງ​ໄກ​ສອກ­ຫຼີກ ແລະ ບໍ່​ມີ​ຫົນ­ທາງ 9 ໃນ 10 ການ​ເກີດ ແມ່ນ​ບໍ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ແພດ​ຜູ້​ຊ່ຽວ­ຊານ ແມ່​ມານ​ສ່ວນ​ໃຫຍ່​ຈະ​ເກີດ​ຢູ່​ເຮືອນ ບາງ​ຄັ້ງ​ໄດ້​ຮັບ​ການ​ຊ່ວຍ­ເຫຼືອ​ຈາກ​ຄອບ­ຄົວ ຫຼື ຍາດ​ພີ່­ນ້ອງ ເຮັດ​ໃຫ້­ການ​ຕາຍ​ຂອງ​ແມ່​ຢູ່ ສປປ ລາວ ສູງ​ໃນ​ຂົງ­ເຂດ​ອາ​ຊຽນ ພາຍ­ຫຼັງ​ກະ­ຊວງ​ສາ­ທາ­ລະ­ນະ​ສຸກ ແລະ ຜູ້​ຮ່ວມ​ງານ​ຕ່າງໆ ໄດ້​ຮ່ວມ​ມື​ກັນ​ໃນ​ໂຄງ­ການ​ຜະ­ດຸງ­ຄັນ​ທົ່ວ​ປະ­ເທດ ປັດ­ຈຸ­ບັນ​ມີ​ຜະ­ດຸງ­ຄັນ​ທີ່​ໄດ້​ຮັບ​ການ​ຍົກ​ລະ­ດັບ​ເກືອບ 2.500 ຄົນ ຄູ​ສອນ​ຜະ­ດຸງ­ຄັນ 76 ຄົນ ທີ່​ໄດ້​ຍົກ​ລະ­ດັບ​ຢູ່​ມະ­ຫາ­ວິ­ທະ­ຍາ­ໄລ​ຂອນ​ແກ່ນ ຜ່ານ​ໂຄງ­ການ​ຮ່ວມ​ມື​ກະ­ຊວງ​ສາ­ທາ­ລະ­ນະ​ສຸກ ຍັງ​ໄດ້​ຈ້າງ​ງານ​ຜະ­ດຸງ­ຄັນ 1.800 ຄົນ ປະ­ຈຳ​ຢູ່​ທົ່ວ​ປະ­ເທດ ເພື່ອ​ຊ່ວຍ­ເຫຼືອ​ແມ່­ຍິງ​ຖື​ພາ­ໃຫ້​ປອດ​ໄພ.

    ທ່ານ ຄຳ​ພອນ ພຸດ​ທະ​ວົງ ກ່າວ​ວ່າ: ການ​ສະ­ເຫຼີມ­ສະ­ຫຼອງ​ວັນ​ຜະ­ດຸງ­ຄັນ​ສາ­ກົນ ເປັນ​ເຫດ­ການ​ໜຶ່ງ​ທີ່​ສຳ­ຄັນ ເປັນ​ການ­ສະ­ແດງ​ເຖິງ​ຄວາມ​ເປັນ​ຫວ່ງ​ເປັນ​ໄຍ​ຂອງ​ພັກ-ລັດ­ຖະ­ບານ ໃນ​ການ​ເພີ່ມ​ທະ­ວີ ເອົາ­ໃຈ­ໃສ່​ການ​ບໍ­ລິ­ການ ເບິ່ງ­ແຍງ​ສຸ­ຂະ­ພາບ​ປະ­ຊາ­ຊົນ​ບັນ­ດາ­ເຜົ່າ ໂດຍ​ສະ­ເພາະ ຕໍ່​ສຸ­ຂະ­ພາບ​ຂອງ​ແມ່­ຍິງ ແລະ ເດັກ­ນ້ອຍ ທັງ​ເປັນ​ການ​ຂໍ​ການ​ສະ­ໜັບ­ສະ­ໜູນ​ຈາກ​ການ​ນຳ​ທຸກ​ຂັ້ນ ແຕ່​ຂັ້ນ​ສູນ​ກາງ ແລະ ອຳ­ນາດ​ການ​ປົກ­ຄອງ​ຂັ້ນ​ຕ່າງໆ ໃຫ້​ເກີດ​ຄວາມ​ເຂົ້າ­ໃຈ ປຸກ­ລະ­ດົມ​ບຸກ­ຄົນ ຄອບ­ຄົວ ແລະ ຊຸມ​ຊົນ ເພື່ອ​ສ້າງ​ຄວາມ​ເຂົ້າ­ໃຈ ແລະ ເຫັນ​ຄວາມ​ສຳ­ຄັນ​ຂອງ​ການ​ຮັກ­ສາ​ສຸ­ຂະ­ພາບ​ຂອງ​ແມ່­ຍິງ ແລະ ເດັກ­ນ້ອຍ ລວມ​ທັງ​ການ​ສ້າງ​ຄວາມ​ເຂົ້າ­ໃຈ​ໃຫ້​ເພດ​ຊາຍ (ສາ­ມີ) ແລະ ຍາດ​ພີ່­ນ້ອງ ໃຫ້​ມີ​ສ່ວນ​ຮ່ວມ​ໃນ​ການ​ຮັກ­ສາ​ສຸ­ຂະ­ພາບ​ຂອງ​ແມ່­ຍິງ ແລະ ເດັກ­ນ້ອຍ ນັບ​ມື້​ດີ​ຂຶ້ນ.

ຂ່າວທີ່ກ່ຽວຂ້ອງ