ຈັດຕັ້ງປະຕິບັດຄຳຕັດສິນຂອງສານ ທີ່ໃຊ້ໄດ້ຢ່າງເດັດຂາດ ສຳເລັດ 3.126 ເລື່ອງ

527 12 ມິ.ຖ. 2019 ຂ່າວໜ້າ​ໜຶ່ງ
ຈັດຕັ້ງປະຕິບັດຄຳຕັດສິນຂອງສານ ທີ່ໃຊ້ໄດ້ຢ່າງເດັດຂາດ ສຳເລັດ 3.126 ເລື່ອງ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 11 ມິ­ຖຸ­ນາ 2019 ທີ່​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ​ນາງ ສີ­ໃສ ລື​ເດດ​ມູນ​ສອນ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ແລະ ທ່ານ ຄຳ​ສານ ສຸ​ວົງ ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ພ້ອມ​ດ້ວຍ​ສະ­ມາ­ຊິກ​ສະ­ພາ​ແຫ່ງ​ຊາດ​ເຂົ້າ​ຮ່ວມ.

    ໃນ​ພາກ​ເຊົ້າ ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ໄດ້​ຂຶ້ນ​ລາຍ​ງານ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ສະ­ບັບ​ເລກ​ທີ 080/ສພຊ ລົງ​ວັນ​ທີ 17 ພະ­ຈິກ 2017 ວ່າ: ນັບ​ແຕ່​ຈັດ​ຕັ້ງ​ປະ­ຕິ­ບັດ​ມະ­ຕິ​ສະ­ພາ​ແຫ່ງ​ຊາດ ສະ­ບັບ​ເລກ​ທີ 080/ສພຊ ມາ​ເຖິງ​ປັດ­ຈຸ­ບັນ ອົງ​ການ­ຈັດ­ຕັ້ງ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ ໄດ້​ນຳ​ເອົາ​ຄຳ​ຕັດ­ສິນ​ຂອງ​ສານ​ທີ່​ໃຊ້​ໄດ້​ຢ່າງ​ເດັດ­ຂາດ ມາ​ຈັດ​ຕັ້ງ​ປະ­ຕິ­ບັດ ສຳ­ເລັດ 3.126 ເລື່ອງ ໃນ​ນີ້​ຄະ­ດີ​ແພ່ງ 1.312 ເລື່ອງ ຄະ­ດີ​ອາ­ຍາ 1.814 ເລື່ອງ ທຽບ­ໃສ່​ໄລ­ຍະ​ດຽວ​ກັນ​ຂອງ​ປີ 2016-2017 ເພີ່ມ​ຂຶ້ນ 8,1% ລວມ​ເງິນ​ທີ່​ເກັບ​ໄດ້ ແລະ ມອບ​ໃຫ້​ຄູ່​ຄວາມ​ມີ​ທັງ​ໝົດ 45.762.393.806 ກີບ 82.219.717 ບາດ 1.869.512ໂດ​ລາ 12.000 ຢວນ ລວມ​ເງິນ​ອາ­ກອນ​ເງິນ​ປັບ​ໃໝ ເງິນ​ຮີບ​ເກັບ​ໄດ້ ແລະ ມອບ​ໃຫ້​ລັດ​ມີ 11.756.000.407 ກີບ 92.533 ບາດ 310 ໂດ​ລາ ແລະ ມາ​ຮອດ​ທ້າຍ​ເດືອນ​ເມ­ສາ 2019 ຄຳ​ຕັດ­ສິນ​ຂອງ​ສານ ຢູ່​ອົງ​ການ­ຈັດ­ຕັ້ງ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ​ທົ່ວ​ປະ­ເທດ​ທັງ​ໝົດ 30.718 ເລື່ອງ ໃນ​ນີ້ ຄະ­ດີ​ແພ່ງ 7.451 ເລື່ອງ ຄະ­ດີ​ອາ­ຍາ 23.267 ເລື່ອງ ແລະ ໃນ​ໄລ­ຍະ 9 ເດືອນ​ທີ່​ພະ­ນັກ­ງານ​ໄດ້​ລົງ​ຊຸກ­ຍູ້​ສາ­ມາດ​ປະ­ຕິ­ບັດ​ຄຳ​ຕັດ­ສິນ​ຂອງ​ສານ​ໄດ້​ທັງ​ໝົດ 398 ເລື່ອງ.

    ສຳ­ລັບ​ພາກ​ບ່າຍ​ສືບ­ຕໍ່​ຮັບ​ຟັງ​ການ​ລາຍ​ງານ ທ່ານ ຄຳ​ສານ ສຸ​ວົງ ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ກ່ຽວ​ກັບ​ການ​ຕິດ­ຕາມ​ກວດ­ກາ​ການ​ປະ­ຕິ­ບັດ​ກົດ­ໝາຍ​ຂອງ​ອົງ­ການ​ສືບ­ສວນ-ສອບ​ສວນ​ຕາມ​ມາດ­ຕາ 42 ຂໍ້ 2 ຂໍ້ 5 ແລະ ຂໍ້ 6 ຂອງ​ກົດ­ໝາຍ​ວ່າ​ດ້ວຍ​ອົງ­ການ​ໄອ​ຍະ​ການ​ປະ­ຊາ­ຊົນ​ວ່າ: ໃນ​ໄລ­ຍະ​ຜ່ານ​ມາ ໄດ້​ເອົາ­ໃຈ­ໃສ່​ຕິດ­ຕາມ​ກວດ­ກາ ການ​ປະ­ຕິ­ບັດ​ກົດ­ໝາຍ​ຂອງ​ອົງ­ການ​ສືບ­ສວນ-ສອບ​ສວນ ໂດຍ​ຕິດ­ຕາມ​ກວດ­ກາ​ຂັ້ນ​ຕອນ​ຂອງ​ການ​ດຳ­ເນີນ​ຄະ­ດີ​ອາ­ຍາ ຕາມ​ທີ່​ໄດ້​ກຳ­ນົດ​ໄວ້​ໃນ​ກົດ­ໝາຍ ໂດຍ​ສະ­ເພາະ ການ​ນຳ​ໃຊ້​ວິ­ທີ​ການ​ສືບ­ສວນ-ສອບ​ສວນ ການ​ນຳ​ໃຊ້​ມາດ​ຕະ­ການ​ສະ­ກັດ​ກັ້ນ​ໃນ​ການ​ດຳ­ເນີນ​ຄະ­ດີ​ອາ­ຍາ ຕາມ​ລັກ­ສະ­ນະ​ຂອງ​ການ​ກະ­ທຳ​ຜິດ ສະ­ແດງ​ອອກ​ໃນ​ປີ 2018 ຜ່ານ​ມາ ໄດ້​ອອກ​ຄຳ​ສັ່ງ​ເປີດ​ການ​ສອບ​ສວນ 721 ສະ­ບັບ ອອກ​ຄຳ​ສັ່ງ​ຢຶດ ຫຼື ອາ​ຍັດ​ຊັບ 19 ສະ­ບັບ ອອກ​ຄຳ​ສັ່ງ​ກວດ​ຄົ້ນ​ເຄ­ຫະ​ສະ­ຖານ 717 ສະ­ບັບ ອອກ​ຄຳ​ສັ່ງ​ຈັບ​ຕົວ 1.900 ສະ­ບັບ ອອກ​ຄຳ​ສັ່ງ​ກັກ​ຂັງ​ພາງ 8.061 ສະ­ບັບ ອອກ​ຄຳ​ສັ່ງ​ຕໍ່​ກຳ­ນົດ​ເວ­ລາ​ກັກ​ຂັງ​ພາງ 5.641 ສະ­ບັບ ອອກ​ຄຳ​ສັ່ງ​ປ່ອຍ​ຕົວ​ພາງ 766 ສະ­ບັບ ອອກ​ຄຳ​ແນະ­ນຳ​ກ່ຽວ​ກັບ​ການ​ດຳ­ເນີນ​ຄະ­ດີ​ອາ­ຍາ 1.161 ສະ­ບັບ ທັງ​ໄດ້​ເອົາ­ໃຈ­ໃສ່​ກວດ­ກາ​ການ​ປະ­ກອບ​ຂໍ້​ມູນ​ຫຼັກ​ຖານ​ຕ່າງໆ​ໃນ​ສຳ­ນວນ​ຄະ­ດີ ຈຳ­ນວນ 10.068 ເລື່ອງ ແລະ ໄດ້​ມີ​ຄຳ​ເຫັນ​ຕາມ​ມາດ­ຕາ 152 ຂອງ​ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ອາ­ຍາ​ເຊັ່ນ: ໄດ້​ສົ່ງ​ສຳ­ນວນ​ຄະ­ດີ​ຄືນ​ໃຫ້​ເຈົ້າ​ໜ້າ­ທີ່ ເພື່ອ​ດຳ­ເນີນ​ການ​ສືບ­ສວນ-ສອບ​ສວນ​ຄືນ­ໃໝ່ 2.213 ເລື່ອງ ທີ່​ເຫັນ​ວ່າ​ຂໍ້​ມູນ​ຫຼັກ​ຖານ​ບໍ່​ຄົບ​ຖ້ວນ ແລະ ໜັກ​ແໜ້ນ​ຮັດ­ກຸມ​ເທົ່າ​ກັບ 21,98% ໂຈະ​ການ​ດຳ­ເນີນ​ຄະ­ດີ 41 ເລື່ອງ ເທົ່າ​ກັບ 0,40% ຊັດ​ມ້ຽນ​ຄະ­ດີ​ທາງ​ດ້ານ​ກົດ­ໝາຍ 345 ເລື່ອງ ເທົ່າ​ກັບ 3,42% ຖະ­ແຫຼງ​ສົ່ງ​ສານ​ຂັ້ນ​ຕົ້ນ 6.706 ເລື່ອງ ເທົ່າ​ກັບ 66,60% ຂອງ​ສຳ­ນວນ​ຄະ­ດີ​ທີ່​ອົງ­ການ​ສືບ­ສວນ-ສອບ​ສວນ​ສົ່ງ​ມາ ນອກ­ຈາກ​ນີ້ ອົງ­ການ​ສືບ­ສວນ-ສອບ​ສວນ​ໄດ້​ສະ­ຫຼຸບ​ສົ່ງ​ໃຫ້​ອົງ­ການ​ໄອ​ຍະ​ການ​ປະ­ຊາ­ຊົນ ໃນ​ປີ 2018 ມີ​ຈຳ­ນວນ 10.068 ເລື່ອງ ໃນ​ນັ້ນ ອົງ­ການ​ໄອ​ຍະ​ການ​ປະ­ຊາ­ຊົນ​ໄດ້​ສັ່ງ​ຟ້ອງ ແລະ ຖະ­ແຫຼງ​ໃຫ້​ສານ​ປະ­ຊາ­ຊົນ​ພິ­ຈາ­ລະ­ນາ​ຕັດ­ສິນ​ແລ້ວ 6.706 ເລື່ອງ ເທົ່າ​ກັບ 66,60%.

ຂ່າວທີ່ກ່ຽວຂ້ອງ