ຂ່າວຫຼ້າສຸດ

ເບີ່ງບ້ານເຂົາເອົາບົດຮຽນ 13-06-2019

921 13 ມິ.ຖ. 2019 ຫົວຂໍ້ຂ່າວອື່ນໆ

    ມື້­ນີ້ ຂໍ​ສະ­ເໜີ 3 ເລື່ອງ​ທີ່​ໜ້າ​ສົນ­ໃຈ ເຊັ່ນ: ບັນ­ຫາ​ຮ້ອນ​ຈາກ​ການ​ປັບ​ຂຶ້ນ​ຄ່າ​ຢາ​ປົວ​ພະ­ຍາດ​ທີ່​ປາ​ກິດ​ສະ­ຖານ ເລື່ອງ​ໄອ​ແລນ ອອກ​ກົດ­ໝາຍ​ກຳ­ນົດ​ເງິນ­ເດືອນ​ສະ­ເໝີ­ພາບ​ລະ­ຫວ່າງ ຍິງ-ຊາຍ ແລະ ເລື່ອງ​ເສຍ​ເງິນ​ລ້າ​ຍ້ອນ​ເຊື່ອ​ງົມ​ງາຍ​ຢູ່​ມາ​ເລ​ເຊຍ.

    ທີ່​ປາ​ກິດ​ສະ­ຖານ: ໃນ​ຕົ້ນ​ປີ​ນີ້ ມີ​ຂ່າວ​ກ່ຽວ​ກັບ​ຄວາມ​ກັງ­ວົນ​ໃຈ​ທີ່​ແຜ່​ລະ­ບາດ​ໄປ​ທົ່ວ​ສັງ­ຄົມ​ຂອງ​ປະ­ເທດ​ປາ​ກິດ​ສະ­ຖານ ຍ້ອນ​ທາງ​ການ​ປະ­ກາດ​ຂຶ້ນ​ຄ່າ​ຢາ​ປິ່ນ­ປົວ​ພະ­ຍາດ ໂດຍ​ອ້າງ​ເຫດ­ຜົນ​ວ່າ ຍ້ອນ​ຄ່າ​ເງິນ​ຣູ​ປີ​ຂອງ​ປາ​ກິດ​ສະ­ຖານ​ຫຼຸດ​ລົງ 30% ທຽບ­ໃສ່​ເງິນ​ໂດ​ລາ​ສະ­ຫະ­ລັດ ການ​ປັບ​ຂຶ້ນ​ລາ­ຄາ​ຢາ​ປົວ​ພະ­ຍາດ​ນັ້ນ​ມີ​ດັ່ງ­ນີ້ ຢາ​ສາ­ມັນ​ປະ­ຈຳ​ເຮືອນ​ປັບ​ຂຶ້ນ 15% ຢາ​ປະ­ເພດ​ສຸກ​ເສີນ ຫຼື ຊ່ວຍ​ຊີ­ວິດ​ປັບ​ຂຶ້ນ 9% ການ​ຂຶ້ນ​ຄ່າ​ຢາ​ປົວ​ພະ­ຍາດ​ຄັ້ງ​ນີ້​ໄດ້​ພາ­ໃຫ້​ເກີດ​ກະ­ແສ​ວິ­ພາກ​ວິ­ຈານ ແລະ ຕຳ​ນິ​ວິ­ຈານ​ຈາກ​ຜູ້​ປະ­ກອບ​ການ​ຮ້ານ​ຂາຍ​ຢາ ເພາະ​ມັນ​ເຮັດ​ໃຫ້​ຍອດ​ຂາຍ​ຫຼຸດ​ລົງ​ເກືອບ​ເທົ່າ​ຕົວ ແຕ່​ໜັກ​ກວ່າ​ນັ້ນ​ແມ່ນ​ຄົນ​ເຈັບ​ທີ່​ບໍ່​ມີ​ເງິນ​ພຽງ­ພໍ​ຈະ​ຊື້​ຢາ ການ​ຂຶ້ນ​ຄ່າ​ຢາ ເຮັດ​ໃຫ້​ຜູ້​ເປັນ​ພະ­ຍາດ​ຊຳ​ເຮື້ອ ເຊັ່ນ: ພະ­ຍາດ­ຫົວ­ໃຈ ຕ້ອງ​ໄດ້​ຈ່າຍ​ເງິນ​ຄ່າ​ຢາ​ສູງ​ຂຶ້ນ​ເດືອນ​ລະ 80-90 ໂດ​ລາ​ສະ­ຫະ­ລັດ ຂ່າວ​ນີ້​ໃຫ້​ບົດ­ຮຽນ​ວ່າ ອາ­ຫານ ແລະ ຢາ​ປົວ​ພະ­ຍາດ​ນັ້ນ​ເປັນ​ບັນ­ຫາ​ກະ­ທົບ​ໄວ ເພາະ​ມັນ​ຕິດ​ພັນ​ກັບ​ຊີ­ວິດ​ຂອງ​ຄົນ ຖ້າ​ລາ­ຄາ​ສູງ​ຂຶ້ນ ແນ່­ນອນ ກໍ​ຈະ​ສ້າງ​ຄວາມ​ເດືອດ­ຮ້ອນ​ລະ­ບາດ​ໄປ​ທົ່ວ​ສັງ­ຄົມ​ໂດຍ​ໄວ.

    ທີ່​ປະ­ເທດ​ໄອ​ແລນ: (Iceland) ປະ­ເທດ​ນ້ອຍໆ​ມີ​ປະ­ຊາ­ກອນ​ພຽງ 335.000 ຄົນ ຢູ່​ເຂດ​ເໜືອ​ສຸດ​ຂອງ​ທະ­ວີບ​ເອີ​ຣົບ ທີ່​ມີ​ຊື່­ວ່າ ໄອ​ແລນ ນີ້​ມີ​ນະ­ໂຍ­ບາຍ​ເດັດໆ ເພື່ອ​ຄ້ຳ­ປະ­ກັນ​ຄວາມ​ສະ­ເໝີ­ພາບ​ຢ່າງ ແທ້​ຈິງ​ລະ­ຫວ່າງ​ຍິງ-ຊາຍ ກ່ຽວ​ກັບ​ເລື່ອງ​ນີ້ ຂ່າວ​ບອກ​ວ່າ ໃນ​ທ້າຍ​ປີ 2017 ລັດ​ຖະ​ສະ­ພາ​ໄອ​ແລນ ໄດ້​ຮັບ­ຮອງ​ເອົາ​ກົດ­ໝາຍ​ທີ່​ກຳ­ນົດ​ໃຫ້​ຈ່າຍ​ເງິນ­ເດືອນ ເທົ່າ​ທຽມ​ກັນ​ລະ­ຫວ່າງ​ແມ່­ຍິງ​ກັບ​ຜູ້​ຊາຍ (ໃນ​ໜ້າ​ວຽກ ແລະ ຄວາມ​ຮັບ­ຜິດ­ຊອບ+ລະ­ດັບ​ດຽວ​ກັນ) ການ​ຮັບ­ຮອງ​ເອົາ​ກົດ­ໝາຍ​ດັ່ງ­ກ່າວ​ໄດ້​ເຮັດ​ໃຫ້​ໄອ​ແລນ ເປັນ​ປະ­ເທດ​ທຳ​ອິດ​ໃນ​ໂລກ​ທີ່​ມີ​ກົດ­ໝາຍ​ກຳ­ນົດ​ເງິນ­ເດືອນ​ເງິນ​ຄ່າ​ແຮງ​ງານ​ເທົ່າ​ທຽມ​ກັນ​ລະ­ຫວ່າງ​ເພດ​ຍິງ ແລະ ເພດ​ຊາຍ ກົດ­ໝາຍ​ສະ­ບັບ​ນີ້​ເລີ່ມ​ມີ​ຜົນ​ສັກ­ສິດ​ນັບ​ແຕ່​ວັນ​ທີ 1 ມັງ­ກອນ ປີ 2018 ເປັນ­ຕົ້ນ​ມາ ປະ­ເທດ​ໄອ​ແລນ ມີ​ເປົ້າ​ໝາຍ​ກຳ­ຈັດ​ຊ່ອງ​ຫວ່າງ​ການ​ຈ່າຍ​ເງິນ­ເດືອນ​ລະ­ຫວ່າງ​ຍິງ-ຊາຍ ໃຫ້​ສຳ­ເລັດ​ຢ່າງ​ຂາດ​ຕົວ ພາຍ​ໃນ​ປີ 2020 ໂດຍ​ນຳ​ໃຊ້​ກົດ­ໝາຍ​ດັ່ງ­ກ່າວ ເປັນ​ເຄື່ອງ­ມື​ສູ່​ຄວາມ​ສຳ­ເລັດ ບາງ​ເນື້ອ​ໃນ​ຂອງ​ກົດ­ໝາຍ​ໄດ້​ກຳ­ນົດ​ວ່າ ບໍ­ລິ­ສັດ ຫຼື ໜ່ວຍ​ງານ​ຂອງ​ລັດ​ທີ່​ມີ​ພະ­ນັກ­ງານ 25 ຄົນ​ຂຶ້ນ​ໄປ ຕ້ອງ​ມີ​ໃບ​ຮັບ­ຮອງ​ຈາກ​ລັດ­ຖະ­ບານ​ທີ່​ຢັ້ງ­ຢືນ​ການ​ຈ່າຍ​ເງິນ­ເດືອນ​ຢ່າງ​ສະ­ເໝີ ພາບ​ກັນ​ລະ­ຫວ່າງ​ຍິງ-ຊາຍ ບໍ່​ດັ່ງ­ນັ້ນ​ຈະ​ຖືກ​ໂທດ ປັບ​ໃໝ ປະ­ເທດ​ໄອ​ແລນ ມີ ສສຊ ເພດ​ຍິງ​ກວມ​ເອົາ 38% ຂອງ​ຈຳ­ນວນ​ຜູ້​ແທນ​ສະ­ພາ​ທັງ​ໝົດ ລວມ​ທັງ​ທ່ານ​ນາງ ແຄັດ​ທຼິນ ຈາ​ຄອບ ສະ​ດອດ​ຕີ ເຊິ່ງ​ຄອງ​ຕຳ­ແໜ່ງ​ນາ­ຍົກ­ລັດ­ຖະ­ມົນ­ຕີ​ຂອງ​ໄອ​ແລນ ອີກ​ດ້ວຍ.

    ທີ່​ມາ​ເລ​ເຊຍ: ມີ​ຂ່າວ​ເກົ່າໆ​ທີ່​ເກີດ​ຂຶ້ນ​ແຕ່​ທ້າຍ​ປີ 2016 ຢູ່​ມາ​ເລ​ເຊຍ ແຕ່​ຂໍ​ເອົາ​ມາ​ເວົ້າ​ຄືນ­ໃໝ່ ເພື່ອ​ເຕືອນ​ສະ­ຕິ​ກັນ​ບໍ່​ໃຫ້​ຫຼົງ​ເຊື່ອ​ເລື່ອງ​ງົມ​ງາຍ ເລື່ອງ​ມີ​ຢູ່​ວ່າ ຊາຍ​ມາ​ເລ​ເຊຍ​ຄົນ​ໜຶ່ງ​ໄດ້​ຂໍ​ຮ້ອງ​ໃຫ້​ໝໍ​ຜີ​ຊ່ວຍ​ປິ່ນ­ປົວ​ພໍ່​ຂອງ​ຕົນ​ທີ່​ລົ້ມ​ປ່ວຍ​ໜັກ ພາຍ­ຫຼັງ​ກວດ​ອາ­ການ​ຂອງ​ຜູ້​ເຈັບ­ເປັນ​ທີ່​ຮຽບ​ຮ້ອຍ ໝໍ​ຜີ ກໍ​ບອກ​ວ່າ​ອາ­ການ​ປ່ວຍ​ເກີດ​ຈາກ​ວິນ​ຍານ​ຮ້າຍ ໂຕ​ໜຶ່ງ​ເຂົ້າ​ສິງ ແຕ່​ເຂົາ​ສາ­ມາດ​ໃຊ້​ເວດ­ມົນ​ຂັບ​ໄລ່​ອອກ​ໄດ້ ຊາຍ​ຜູ້​ເປັນ​ລູກ​ຄົນ​ເຈັບ​ຫຼົງ​ເຊື່ອ ແລະ ຕົກ­ລົງ​ຈ່າຍ​ເງິນ​ຄ່າ​ປິ່ນ­ປົວ​ລ່ວງ​ໜ້າ ຈຳ­ນວນ​ກວ່າ 200 ໂດ​ລາ​ສະ­ຫະ­ລັດ (810 ຣິງ​ກິດ) ແຕ່​ການ​ປິ່ນ­ປົວ​ຂອງ​ໝໍ​ຜີ​ຍິ່ງ​ເຮັດ​ໃຫ້​ຜູ້​ປ່ວຍ​ເຈັບ​ໜັກ​ຂຶ້ນ ແລະ ເສຍ​ຊີ­ວິດ​ໃນ​ທີ່​ສຸດ ຂ່າວ​ບອກ​ວ່າ ທາງ​ເບື້ອງ​ສານ​ບໍ່​ຮູ້​ຊິ​ຕັດ­ສິນ​ແນວ­ໃດ ເພາະ​ໝໍ​ຜີ​ນັ້ນ​ບໍ່​ໄດ້​ຂຶ້ນ​ທະ­ບຽນ​ກັບ​ທາງ​ການ ການ​ປິ່ນ­ປົວ​ໂດຍ​ໝໍ​ຜີ​ນັ້ນ​ແມ່ນ​ທາງ​ເລືອກ​ຂອງ​ສ່ວນ​ບຸກ­ຄົນ ບໍ່​ກ່ຽວ​ກັບ​ທາງ​ການ ວ່າ​ຊັ້ນ (ຂໍ້​ມູນ​ຈາກ The Nation 31/12/2016).

ຂ່າວທີ່ກ່ຽວຂ້ອງ