ນວ ຄັດເລືອກນັກເຕະ ກຽມເຂົ້າຮ່ວມຊຽງຂວາງເກມ

266 13 ມິ.ຖ. 2019 ວົງຈອນກີລາ
ນວ ຄັດເລືອກນັກເຕະ ກຽມເຂົ້າຮ່ວມຊຽງຂວາງເກມ

    ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ບານ­ເຕະ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 11 ມິ­ຖຸ­ນາ 2019 ວ່າ: ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ບານ­ເຕະ ນວ ໄດ້​ວາງ​ແຜນ­ການ​ໄວ້​ຢ່າງ­ຮອບ­ດ້ານ ໂດຍ​ແບ່ງ​ຄວາມ​ຮັບ­ຜິດ­ຊອບ​ໃຫ້​ບຸກ​ຄະ­ລາ​ກອນ​ແຕ່​ລະ​ຝ່າຍ ເປັນ­ຕົ້ນ​ຝ່າຍ​ຈັດ​ຕັ້ງ​ຊອກ​ຫາ​ນັກ­ກີ­ລາ​ຜູ້​ທີ່​ມີ​ຄວາມ​ສາ­ມາດ ແລະ ພອນ​ສະ­ຫວັນ ເພື່ອ​ຕາງ­ໜ້າ​ໃຫ້​ທັບ​ນັກ­ກີ­ລາ ນວ ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຢູ່​ແຂວງ​ຊຽງ​ຂວາງ ວັນ​ທີ 22 ມີ­ນາ-1 ເມ­ສາ 2020.

    ຮູບ​ການ​ຄັດ​ເລືອກ ແມ່ນ​ໄດ້​ຕິດ­ຕາມ​ຂະ​ບວນ​ການ​ແຂ່ງ­ຂັນ​ກີ­ລາ​ເຕະ­ບານ​ສາຍ ກ ປະ­ຈຳ​ປີ 2019 (ດິ​ວິ​ຊັນ 1) ແລະ ຈັດ​ແຂ່ງ­ຂັນ​ຊີງ​ຂັນ​ທ່ານ​ເຈົ້າ​ຄອງ ນວ ປະ­ຈຳ​ປີ 2019 ໃນ​ທ້າຍ​ປີ​ນີ້ ເພື່ອ​ຄັດ​ເລືອກ​ນັກ­ກີ­ລາ​ທີ່​ມີ​ພອນ​ສະ­ຫວັນ 9 ຕົວ​ເມືອງ ໃຫ້​ໄດ້​ຄົບ 35 ຄົນ ຈາກ​ນັ້ນ​ຈະ​ເຂົ້າ​ສູນ​ເກັບ​ຕົວ​ເຝິກ­ຊ້ອມ​ໄລ­ຍະ​ໜຶ່ງ ຈຶ່ງ​ມາ​ຄັດ​ເລືອກ​ອີກ​ຄັ້ງ ເພື່ອ​ໃຫ້​ໄດ້​ນັກ​ທີ່​ມີ​ຄວາມ​ສາ­ມາດ 25 ຄົນ ກ່ອນ​ສົ່ງ​ເຂົ້າ​ຮ່ວມ​ແຂ່ງ­ຂັນ​ງານ​ດັ່ງ­ກ່າວ ໃຫ້​ປະ­ສົບ​ຜົນ­ສຳ­ເລັດ​ຕາມ​ເປົ້າ​ໝາຍ​ທີ່​ຕັ້ງ​ໄວ້.

    ອີງ­ໃສ່​ເງື່ອນ­ໄຂ​ທີ່​ຄະ­ນະ​ຮັບ­ຜິດ­ຊອບ​ຈັດ​ແຂ່ງ­ຂັນ​ກີ­ລາ​ແຫ່ງ​ຊາດ ປີ 2014 ກຳ­ນົດ​ເອົາ​ນັກ​ເຕະ​ທີມ​ຊາດ 1 ຄົນ ແລະ ນັກ­ກີ­ລາ​ທີ່​ຮ່ວມ​ລາຍ­ການ​ລາວ​ພຣີ​ເມຍ​ລີກ 3 ຄົນ ເຂົ້າ​ຮ່ວມ​ທີມ​ໄດ້ ເຊິ່ງ​ພວກ​ເຮົາ​ໄດ້​ຕິດ­ຕາມ​ນັກ­ກີ­ລາ​ຈຳ­ນວນ​ດັ່ງ­ກ່າວ ເພາະ​ປີ 2020 ພວກ​ເຮົາ​ຕັ້ງ​ເປົ້າ​ໝາຍ​ຈະ​ສູ້​ຊົນ​ເຮັດ​ໃຫ້​ຄວາມ​ຫວັງ​ປະ­ສົບ​ຜົນ­ສຳ­ເລັດ ຢ່າງ​ໜ້ອຍ​ໃຫ້​ໄດ້​ຜ່ານ​ເຂົ້າ​ຮອບ 4 ທີມ​ສຸດ​ທ້າຍ ປັດ­ຈຸ­ບັນ​ສະ­ຫະ­ພັນ​ບານ­ເຕະ ນວ ຍັງ​ໄດ້​ຈັດ​ຕັ້ງ​ຄ້າຍ​ສອນ​ກີ­ລາ​ເຕະ­ບານ​ໃຫ້​ຮຸ່ນ​ສືບ​ທອດ (ໂຄງ­ການ ນວ ອາ​ຄາ​ເດ​ມີ) ເພື່ອ​ສ້າງ​ຄວາມ​ຝັນ​ໃຫ້​ເຍົາ­ວະ​ຊົນ ນວ ກ້າວ​ສູ່​ທີມ​ຊາດ​ໃນ​ອະ­ນາ­ຄົດ ໂດຍ​ກຳ­ນົດ​ນັກ­ກີ­ລາ​ເຂົ້າ​ຮ່ວມ​ເຝິກ­ຊ້ອມ ອາ­ຍຸ 8 ປີ 10 ປີ 12 ປີ 14 ປີ ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ.

ຂ່າວທີ່ກ່ຽວຂ້ອງ