ຂ່າວຫຼ້າສຸດ

ສປປ ກົງ​ໂກ ປະກາດ​ການລະບາດ​ຂອງ​ພະຍາດໝາກ​ແດງ

375 13 ມິ.ຖ. 2019 ຂ່າວຕ່າງປະເທດ
ສປປ ກົງ​ໂກ ປະກາດ​ການລະບາດ​ຂອງ​ພະຍາດໝາກ​ແດງ

     ທ່ານ ໂອ​ລີ ອີ​ລຸນ​ກາ ກາ​ເລນ​ກາ ລັດຖະມົນຕີ​ກະຊວງ​ສາທາລະນະ​ສຸກ ຂອງ​ສາທາລະນະ​ລັດ ປະຊາທິປະໄຕ ກົງ​ໂກ (​ສປ ກົງ​ໂກ) ໄດ້​ປະກາດ​ຢ່າງ​ເປັນ​ທາງ​ການ ເມື່ອ​ວັນ​ທີ 10 ມິຖຸນາ​ນີ້ ກ່ຽວ​ກັບ​ການລະບາດພະຍາດ​ໝາກ​ແດງ ຢູ່​ໃນ​ປະເທດ​ນີ້ ທ່າມກາງ​ທີ່ ​ສປ ກົງ​ໂກ ກໍ​ຕ້ອງ​ພະຍາຍາມ​ຕ້ານ​ກັບ​ການ​ລະບາດ​ຂອງ​ພະຍາດ​ອີ​ໂບ​ລາ (Ebola) ນັບ​ແຕ່​ເດືອນ​ສິງຫາ ປີ 2018 ເປັນຕົ້ນ​ມາ.

    ທ່ານ ກາ​ເລນ​ກາ ໃຫ້​ຮູ້​ວ່າ ເຈົ້າ​ໜ້າທີ່​ການ​ແພດ ໄດ້​ຢັ້ງຢືນ​ຜູ້​ຕິດ​ພະຍາດໝາກແດງ  677 ລາຍ ຈາກ​ຈຳນວນ​ຜູ້​ສົງ​ໃສ​ຕິດພະຍາດ​ນີ້ 87.000 ລາຍ ຢູ່​ໃນ 23 ແຂວງ​ຂອງ ​ສປ ກົງ​ໂກ. ຕົວ​ເລກ​ດັ່ງກ່າວ ນັບ​ວ່າ​ສູງ​ທົບ 7 ເທົ່າ​ເມື່ອ​ທຽບໃສ່​ເວລາ​ດຽວ​ກັນ​ຂອງ​ປີ 2018.

    ທ່ານ ກາ​ເລນ​ກາ ກໍ​ໃຫ້​ຮູ້​ວ່າ ເມື່ອ​ເດືອນ​ເມສາ​ທີ່​ຜ່ານ​ມາ ເດັກນ້ອຍ 2,24 ລ້ານ​ຄົນ ໃນ​ໄວ​ແຕ່ 6 ເດືອນ ຫາ 59 ເດືອນ ໄດ້​ຮັບ​ການ​ສັກ​ຢາ​ກັນ​ພະຍາດ ພາຍ​ໃນ​ເວລາ 4 ວັນ ແລະ ບັ້ນ​ສັກ​ຢາ​ກັນ​ພະຍາດ​ອີກ​ລາຍ​ໜຶ່ງ ສຳລັບ​ເດັກນ້ອຍ 1,4 ລ້ານ​ຄົນ ກໍ​ຈະ​ໄດ້​ເລີ່ມ​ຂຶ້ນ​ໃນ​ອີກ​ບໍ່​ພໍ​ເທົ່າໃດ​ວັນ​ຂ້າງ​ໜ້າ​ນີ້; ແລະ​ເພື່ອ​ສະກັດ​ກັ້ນ​ການ​ແຜ່​ລະບາດ​ຂອງ​ພະຍາດໝາກແດງ ໃນ​ອະນາຄົດ​ນັ້ນ  ປະຊາຊົນ​ຕ້ອງ​ໄດ້​ຮັບ​ການ​ສັກ​ຢາ​ກັນ​ພະຍາດ​ຢ່າງ​ໜ້ອຍ 95%.

    ໃນ​ຂະນະ​ດຽວ​ກັນ ຕົວ​ເລກ​ສະຖິຕິ ໃຫ້​ຮູ້​ວ່າ ການ​ແຜ່​ລະບາດ​ຂອງ​ພະຍາດ​ອີ​ໂບ​ລາ ຢູ່​ໃນ​ພາກ​ຕາເວັນ​ອອກ​ຂອງ ​ສປ ກົງ​ໂກ ນັບ​ແຕ່​ວັນ​ທີ 1 ສິງຫາ ປີ 2018 ເປັນຕົ້ນ​ມາ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 1.300 ກວ່າ​ຄົນ.

ຂ່າວທີ່ກ່ຽວຂ້ອງ