ຂ່າວຫຼ້າສຸດ

ເຊີນຮ່ວມບໍລິຈາກເລືອດ ໃນວັນບໍລິຈາກເລືອດໂລກ

844 13 ມິ.ຖ. 2019 ຂ່າວໜ້າ​ໜຶ່ງ

    ສູນ​ເລືອດ​ແຫ່ງ​ຊາດ ອົງ­ການ​ກາ­ແດງ​ລາວ ຈັດ​ພິ­ທີ​ຖະ­ແຫຼງ​ຂ່າວ​ການ​ສະ­ເຫຼີມ­ສະ­ຫຼອງ​ວັນ​ບໍ­ລິ­ຈາກ​ເລືອດ​ໂລກ (14 ມິ­ຖຸ­ນາ) ຂຶ້ນ​ວັນ​ທີ 11 ມິ­ຖຸ­ນາ 2019 ຢູ່​ສູນ​ເລືອດ​ແຫ່ງ​ຊາດ ໂດຍ​ມີ​ທ່ານ ສິງ ເມ​ໂນ​ລາດ ຮອງ​ປະ­ທານ​ອົງ­ການ​ກາ­ແດງ​ລາວ ທ່ານ ຈັນ­ທະ​ລາ ສຸກ​ສາ­ຄອນ ຫົວ­ໜ້າ​ສູນ​ເລືອດ​ແຫ່ງ​ຊາດ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສິງ ເມ​ໂນ​ລາດ ກ່າວ​ວ່າ: ກອງ​ປະ­ຊຸມ​ຂອງ​ອົງ­ການ​ອະ­ນາ­ໄມ​ໂລກ ຄັ້ງ​ທີ 58 ປີ 2005 ໄດ້​ລົງ​ນາມ​ຂໍ້​ຕົກ­ລົງ​ສະ­ໜັບ­ສະ­ໜູນ​ການ​ບໍ­ລິ­ຈາກ​ເລືອດ​ດ້ວຍ​ຄວາມ​ສະ­ໝັກ​ໃຈ ແລະ ໄດ້​ກຳ­ນົດ​ກິດ­ຈະ­ກຳ​ວັນ​ຜູ້​ບໍ­ລິ­ຈາກ​ເລືອດ​ໂລກ ເອົາ​ວັນ​ທີ 14 ມິ­ຖຸ­ນາ ຂອງ​ທຸກໆ​ປີ ເປັນ​ການ​ສະ­ເຫຼີມ­ສະ­ຫຼອງ ເຊິ່ງ​ແມ່ນ​ວັນ​ຄ້າຍ​ວັນ​ເກີດ​ຂອງ​ທ່ານ ຄານ ແລນ​ສະ​ແກນ​ເນີ ນັກ­ວິ­ທະ­ຍາ­ສາດ​ການ​ແພດ ຊາວ​ໂອ​ຕຣິດ ທີ່​ໄດ້​ຄົ້ນ​ພົບ​ໝວດ​ເລືອດ ລະ­ບົບ ABO ຜູ້​ທຳ​ອິດ ປີ 2009 ຜູ້​ຊ່ຽວ­ຊານ​ດ້ານ​ການ​ສົ່ງ​ເລືອດ ຜູ້​ວາງ​ແຜນ​ນະ­ໂຍ­ບາຍ ແລະ ຜູ້​ແທນ​ຈາກ​ອົງ​ກອນ​ອິດ­ສະ­ຫຼະ 40 ປະ­ເທດ​ທົ່ວ​ໂລກ ໄດ້​ຮ່າງ​ພັນ­ທະ​ສັນ­ຍາ​ເມວ​ເບີນ ໂດຍ​ຕັ້ງ​ເປົ້າ​ໝາ­ຍວ່າ​ປີ 2020 ທຸກ​ປະ­ເທດ​ທົ່ວ​ໂລກ ຕ້ອງ​ໄດ້​ຮັບ​ເລືອດ​ຈາກ​ຜູ້​ບໍ­ລິ­ຈາກ​ດ້ວຍ​ຄວາມ​ຕື່ນ​ຕົວ​ສະ­ໝັກ​ໃຈ ສຳ­ລັບ​ແນວ​ຄວາມ​ຄິດ​ປີ​ນີ້​ໄດ້­ແກ່: “ເລືອດ​ປອດ​ໄພ-ເພື່ອ​ທຸກ​ຄົນ”.

    ເພື່ອ​ສະ­ເຫຼີມ­ສະ­ຫຼອງ​ວັນ​ຜູ້​ບໍ­ລິ­ຈາກ​ເລືອດ​ໂລກ ປີ 2019 ໃຫ້​ກວ້າງ­ຂວາງ ນອກ­ຈາກ​ໄດ້​ຈັດ​ກິດ­ຈະ­ກຳ​ຢູ່​ແຂວງ​ຊຽງ​ຂວາງ ວັນ​ທີ 6 ມິ­ຖຸ­ນາ​ແລ້ວ ວັນ​ທີ 12 ມິ­ຖຸ­ນາ ຈະ​ຈັດ​ຢູ່​ແຂວງ​ບໍ​ລິ​ຄຳ​ໄຊ ວັນ​ທີ 14 ມິ­ຖຸ­ນາ ຢູ່​ນະ­ຄອນ­ຫຼວງ​ວຽງ​ຈັນ ແລະ ແຂວງ​ສະ­ຫວັນ​ນະ​ເຂດ ວັນ​ທີ 19 ມິ­ຖຸ­ນາ ຢູ່​ແຂວງ​ຈຳ­ປາ​ສັກ ແລະ ແຂວງ​ອື່ນໆ​ທົ່ວ​ປະ­ເທດ ສະ­ເພາະ​ຢູ່​ນະ­ຄອນ­ຫຼວງ​ວຽງ​ຈັນ ຈະ​ຈັດ​ຢູ່​ສູນ​ການ​ຄ້າ​ລາວ-ໄອ​ເຕັກ ວັນ​ທີ 14 ມິ­ຖຸ­ນາ ແຕ່​ເວ­ລາ 8:30-16:00 ໂມງ ນອກ​ນີ້ ທ່ານ​ໃດ​ທີ່​ມີ​ເຈດ​ຈຳ­ນົງ​ຢາກ​ບໍ­ລິ­ຈາກ​ເລືອດ ກໍ​ສາ­ມາດ​ບໍ­ລິ­ຈາກ​ເລືອດ​ໄດ້​ຢູ່​ສູນ​ເລືອດ​ແຫ່ງ​ຊາດ ເລີ່ມ​ແຕ່ 08:30-15:30 ໂມງ​ຂອງ​ທຸກໆ​ວັນ.

ຂ່າວທີ່ກ່ຽວຂ້ອງ