ຂ່າວຫຼ້າສຸດ

ບົວລະພາ ໄດ້ຮັບອະນຸມັດປູກໄມ້ວິກ 2.000 ເຮັກຕາ ຢູ່ແຂວງວຽງຈັນ

834 13 ມິ.ຖ. 2019 ຂ່າວໜ້າ​ໜຶ່ງ
ບົວລະພາ ໄດ້ຮັບອະນຸມັດປູກໄມ້ວິກ 2.000 ເຮັກຕາ ຢູ່ແຂວງວຽງຈັນ

    ທ່ານ​ນາງ ສຸ​ໄພ​ວັນ ທ່ຽງ​ຈັນ​ໄທ ຮອງ​ຜູ້­ອຳ­ນວຍ­ການ​ບໍ­ລິ­ສັດ ບົວ­ລະ­ພາ​ກະ­ສິ­ກຳ-ປ່າ­ໄມ້ ຈຳ­ກັດ ໃຫ້​ສຳ­ພາດ​ຕໍ່​ສື່​ມວນ​ຊົນ ວັນ​ທີ 12 ມິ­ຖຸ­ນາ 2019 ຢູ່​ສວນ​ກ້າ​ເບ້ຍ​ໄມ້​ບໍ­ລິ­ສັດ​ດັ່ງ­ກ່າວ ບ້ານ​ແສນ​ອຸ­ດົມ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ວ່າ: ບໍ­ລິ­ສັດ​ມີ​ແຜນ​ກະ­ກຽມ​ເບ້ຍ​ໄມ້​ວິກ 1.700.000 ເບ້ຍ ເພື່ອ​ປູກ​ໃນ​ປີ​ນີ້ ປັດ­ຈຸ­ບັນ​ເບ້ຍ​ໄມ້​ດັ່ງ­ກ່າວ​ໄດ້​ເຕີບ​ໃຫຍ່​ແຕ່​ຍັງ​ບໍ່​ທັນ​ໄດ້​ປູກ​ລົງ​ດິນ ເນື່ອງ​ຈາກ​ມີ​ບັນ­ຫາ​ກ່ຽວ​ກັບ​ດິນ​ທີ່​ຈະ​ປູກ ຈຶ່ງ​ໄດ້​ເລື່ອນ​ເວ­ລາ​ການ​ປູກ​ອອກ​ໄປ ແນ­ໃສ່​ເຮັດ​ໃຫ້­ການ​ປູກ​ເບ້ຍ​ໄມ້​ຖືກ­ຕ້ອງ​ຕາມ​ລະ­ບຽບ​ຫຼັກ­ການ​ຂອງ​ລັດ­ຖະ­ບານ ເຊິ່ງ​ປີ 2019 ລັດ­ຖະ­ບານ ໄດ້​ອະ­ນຸ­ມັດ​ເນື້ອ­ທີ່ 2.000 ເຮັກ­ຕາ ໃນ​ປ່າ​ຜະ­ລິດ​ທີ່​ເຊື່ອມ​ໂຊມ ຢູ່​ເມືອງ​ຫີນ​ເຫີບ ຊະ­ນະ​ຄາມ ແລະ ເມືອງ​ເຟືອງ ແຂວງ​ວຽງ​ຈັນ ເພື່ອ​ໃຫ້​ບໍ­ລິ­ສັດ​ປູກ​ໄມ້​ອຸດ­ສາ­ຫະ­ກຳ.

    ຕາມ​ການ​ສຳ​ຫຼວດ​ພື້ນ​ທີ່​ຂອງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ພາກ­ສ່ວນ​ກ່ຽວ­ຂ້ອງ ພົບ​ວ່າ​ເນື້ອ­ທີ່​ປ່າ​ຜະ­ລິດ​ທີ່​ຊຸດ­ໂຊມ​ຢູ່​ແຂວງ​ວຽງ​ຈັນ ມີ​ຫຼາຍ​ກວ່າ 2.000 ເຮັກ­ຕາ ແຕ່​ບໍ­ລິ­ສັດ ບົວ­ລະ­ພາ-ກະ­ສິ­ກຳ ປ່າ­ໄມ້ ຂໍ​ທົດ​ລອງ​ປູກ​ໃນ​ເນື້ອ­ທີ່​ດັ່ງ­ກ່າວ​ກ່ອນ ເພື່ອ​ຢາກ​ຮູ້​ວ່າ­ການ​ປູກ​ຢູ່​ປ່າ​ຜະ­ລິດ​ເຊື່ອມ​ໂຊມ​ຈະ​ໃຊ້​ເວ­ລາ​ດົນ​ປານ­ໃດ ແລະ ຈະ​ເຮັດ​ຫຍັງ​ແດ່​ດ້ານ​ນິ­ຕິ​ກຳ ເຊິ່ງ​ເປັນ​ສິ່ງ​ໃໝ່ ແລະ ທ້າ​ທາຍ ແຕ່​ບໍ­ລິ­ສັດ​ໄດ້​ມີ​ຄວາມ​ພະ­ຍາ­ຍາມ​ສູງ ເພື່ອ​ໃຫ້​ມີ​ຄວາມ​ຖືກ­ຕ້ອງ ແລະ ທັນ​ລະ­ດູ​ການ ເນື່ອງ​ຈາກ​ໄລ­ຍະ​ຜ່ານ​ມາ​ໄດ້​ປູກ​ໄມ້​ວິກ ໂດຍ​ການ​ມີ​ສ່ວນ​ຮ່ວມ​ຂອງ​ປະ­ຊາ­ຊົນ ສະ­ເພາະ​ປີ 2019 ໄດ້​ເລີ່ມ​ປູກ​ມາ​ແຕ່​ທ້າຍ​ເດືອນ​ພຶດ­ສະ­ພາ ເປັນ­ຕົ້ນ​ມາ ແຕ່​ພື້ນ​ທີ່​ສ່ວນ​ໃຫຍ່​ຍັງ​ລໍ­ຖ້າ​ໃຫ້​ເຂົ້າ​ຕາມ​ລະ­ບຽບ​ການ ປັດ­ຈຸ­ບັນ​ຢູ່​ເມືອງ​ຫີນ​ເຫີບ​ບໍ­ລິ­ສັດ​ໄດ້​ບຸກ­ເບີກ ແລະ ຕັດ​ແລວ​ເພື່ອ​ກະ­ກຽມ​ປູກ ແຕ່​ຈະ​ປູກ​ໄດ້​ໜ້ອຍ-ຫຼາຍ​ນັ້ນ ແມ່ນ​ຂຶ້ນ​ກັບ​ການ​ຮ່ວມ​ມື​ຂອງ​ລັດ­ຖະ­ບານ ປະ­ຊາ­ຊົນ ກໍ​ຄື ພາກ­ສ່ວນ​ກ່ຽວ­ຂ້ອງ ທີ່​ຈະ​ອຳ­ນວຍ​ຄວາມ​ສະ­ດວກ​ໃຫ້​ບໍ­ລິ­ສັດ ນອກ​ນີ້ ບໍ­ລິ­ສັດ​ຍັງ​ຈະ​ກໍ່­ສ້າງ​ໂຮງ­ງານ​ຢູ່​ແຂວງ​ວຽງ​ຈັນ ໄວໆ​ນີ້.

    ປີ 2019 ບໍ­ລິ­ສັດ ບົວ­ລະ­ພາ ກະ­ສິ­ກຳ-ປ່າ­ໄມ້ ຈຳ­ກັດ ໄດ້​ກ້າ​ເບ້ຍ​ໄມ້​ໄວ້​ຈຳ­ນວນ​ຫຼາຍ ແຕ່​ດິນ​ທີ່​ຈະ​ປູກ​ຍັງ​ມີ​ຄວາມ​ຫຍຸ້ງ­ຍາກ ສະ­ນັ້ນ ປະ­ຊາ­ຊົນ​ຜູ້​ໃດ​ທີ່​ມີ​ເງື່ອນ­ໄຂ ຫຼື ມີ​ຄວາມ​ສົນ­ໃຈ​ຢາກ​ໄດ້​ເບ້ຍ​ໄມ້​ໄປ​ປູກ​ໃນ​ດິນ​ຂອງ​ຕົນ ບໍ­ລິ­ສັດ​ຈະ​ສະ­ໜອງ​ໃຫ້​ຜູ້​ລະ 1.000 ເບ້ຍ ໂດຍ​ບໍ່​ເສຍ​ຄ່າ ພຽງ​ແຕ່​ແຈ້ງ​ເຈດ​ຈຳ­ນົງ ບອກ​ສະ­ຖານ­ທີ່​ຢູ່ ແລະ ບ່ອນ​ທີ່​ຈະ​ນຳ​ເບ້ຍ​ໄມ້​ໄປ​ປູກ ເພື່ອ​ໃຫ້​ຂໍ້​ມູນ​ແກ່​ບໍ­ລິ­ສັດ​ໃນ​ການ​ລົງ​ຕິດ­ຕາມ​ການ​ປູກ ເມື່ອ​ຄົບ​ກຳ­ນົດ 7 ປີ​ຕົ້ນ­ໄມ້​ໃຫຍ່ ບໍ­ລິ­ສັດ​ຈະ​ເກັບ​ຊື້​ຄືນ​ໃນ​ລາ­ຄາ​ຕາມ​ຕະ­ຫຼາດ.

ຂ່າວທີ່ກ່ຽວຂ້ອງ