ວຽກງານຟື້ນຟູຫຼັງໄພພິບັດ ມີຜົນສຳເລັດໂດຍພື້ນຖານ

523 13 ມິ.ຖ. 2019 ຂ່າວໜ້າ​ໜຶ່ງ
ວຽກງານຟື້ນຟູຫຼັງໄພພິບັດ ມີຜົນສຳເລັດໂດຍພື້ນຖານ

    ກອງ​ປະ­ຊຸມ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ (ຄພຊ) ຈັດ​ຂຶ້ນ​ວັນ​ທີ 12 ມິ­ຖຸ­ນາ 2019 ຢູ່​ເຮືອນ​ຮັບ­ແຂກ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ ຮສສ ມີ​ບັນ­ດາ​ທ່ານ​ຮອງ​ລັດ­ຖະ­ມົນ­ຕີ ຮອງ​ປະ­ທານ ແລະ ກຳ­ມະ­ການ ຄພຊ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ຟັງ​ການ​ລາຍ​ງານ ແລະ ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ການ​ຊ່ວຍ­ເຫຼືອ​ໄລ­ຍະ​ສຸກ​ເສີນ ແລະ ຟື້ນ​ຟູ​ຄືນ ຫຼັງ​ໄພ­ພິ­ບັດ​ນ້ຳ​ຖ້ວມ​ປີ 2018 ກໍ​ຄື ປັດ­ຈຸ­ບັນ ບັນ­ດາ​ກະ­ຊວງ​ກ່ຽວ­ຂ້ອງ ໃນ ຄພຊ ລວມ​ທັງ​ບັນ­ດາ​ອົງ­ການ​ປົກ­ຄອງ​ທ້ອງ­ຖິ່ນ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ ກໍ​ໄດ້​ເອົາ­ໃຈ­ໃສ່​ຜັນ​ຂະ­ຫຍາຍ ແລະ ຈັດ​ຕັ້ງ​ປະ­ຕິ­ບັດ​ແຈ້ງ​ການ​ຂອງ​ລັດ­ຖະ­ບານ ແລະ ທິດ​ຊີ້​ນຳ​ຕ່າງໆ​ຂອງ​ຂັ້ນ​ເທິງ ກ່ຽວ​ກັບ​ການ​ແກ້​ໄຂ ແລະ ຟື້ນ​ຟູ​ຫຼັງ​ໄພ­ພິ­ບັດ​ໃນ​ທົ່ວ​ປະ­ເທດ ໃນ​ນີ້ ລັດ­ຖະ­ບານ​ໄດ້​ອະ­ນຸ­ມັດ​ເງິນ​ແກ້​ໄຂ​ສຸກ​ເສີນ 100 ຕື້​ກີບ ຈັດ​ແບ່ງ​ໃຫ້​ຂະ­ແໜງ​ກະ­ສິ­ກຳ ແລະ ປ່າ­ໄມ້ ແລະ ຂະ­ແໜງ​ໂຍ­ທາ​ທິ​ການ ແລະ ຂົນ­ສົ່ງ ໄດ້​ຫັນ​ງົບ­ປະ­ມານ​ລົງ­ທຶນ​ໂຄງ­ການ​ຂອງ​ລັດ​ປີ 2019 ເຂົ້າ​ໃນ​ການ​ແກ້​ໄຂ​ຟື້ນ​ຟູ​ຫຼັງ​ໄພ­ພິ­ບັດ ມູນ​ຄ່າ 500 ຕື້​ກີບ ເພື່ອ​ແກ້​ໄຂ​ຟື້ນ​ຟູ 4 ຂະ­ແໜງ­ການ​ທີ່​ເປັນ​ບຸ­ລິ­ມະ­ສິດ ເຊັ່ນ: ໂຍ­ທາ​ທິ​ການ ແລະ ຂົນ­ສົ່ງ ກະ­ສິ­ກຳ ແລະ ປ່າ­ໄມ້ ສາ­ທາ­ລະ­ນະ​ສຸກ ແລະ ສຶກ​ສາ​ທິ​ການ ແລະ ກີ­ລາ ພ້ອມ​ນີ້ ກໍ​ໄດ້​ຮັບ​ເອົາ​ການ​ຊ່ວຍ­ເຫຼືອ​ຂອງ​ສາ­ກົນ ແລະ ປະ­ເທດ​ເພື່ອນ​ມິດ ເຂົ້າ​ໃນ​ການ​ແກ້​ໄຂ ແລະ ຟື້ນ​ຟູ​ຄືນ​ຫຼັງ​ໄພ­ພິ­ບັດ.

    ປັດ­ຈຸ­ບັນ ບັນ­ດາ​ວຽກ​ງານ​ດັ່ງ­ກ່າວ ໄດ້​ມີ​ຄວາມ​ຄືບ​ໜ້າ-ສຳ­ເລັດ​ໂດຍ​ພື້ນ­ຖານ ເປັນ­ຕົ້ນ ສືບ­ຕໍ່​ໃຫ້­ການ​ຊ່ວຍ­ເຫຼືອ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ຜູ້​ປະ­ສົບ​ໄພ­ພິ­ບັດ ຜ່ານ​ຫຼາຍ​ຮູບ​ແບບ​ຂອງ​ກິດ­ຈະ­ກຳ ເຊັ່ນ: ການ​ສະ­ໜອງ​ສົງ­ເຄາະ​ເງິນ​ໃຫ້​ຜູ້​ປະ­ສົບ​ໄພ­ພິ­ບັດ ຜູ້​ທີ່​ບໍ່​ສາ­ມາດ​ອອກ­ແຮງ​ງານ​ໄດ້ ສະ­ໜອງ​ເງິນ​ຜ່ານ​ກິດ­ຈະ­ກຳ​ອາ­ຫານ ເພື່ອ​ງານ​ສຳ­ລັບ​ຜູ້​ປະ­ສົບ​ໄພ­ພິ­ບັດ​ທີ່​ສາ­ມາດ​ອອກ­ແຮງ​ງານ ກິດ­ຈະ­ກຳ​ສົ່ງ­ເສີມ​ການ​ຄ້ຳ­ປະ­ກັນ​ດ້ານ​ສະ­ບຽງ​ອາ­ຫານ ໂດຍ​ການ​ສະ­ໜອງ​ແນວ​ພັນ​ພືດ ສັດ­ລ້ຽງ ແລະ ການ​ປະ­ມົງ ການ​ສົ່ງ­ເສີມ​ດ້ານ​ສຸ­ຂະ­ພາບ ສຸ​ຂະ​ອະ­ນາ­ໄມ ແລະ ໂພ­ຊະ​ນາ​ການ ສຳ­ລັບ​ໄວ​ຈະ­ເລີນ​ພັນ ແລະ ເດັກ ການ​ສ້ອມ­ແປງ ແລະ ກໍ່­ສ້າງ​ຄືນ­ໃໝ່​ດ້ານ​ທີ່­ຢູ່​ອາ­ໄສ​ຂອງ​ປະ­ຊາ­ຊົນ ການ​ບຸກ­ເບີກ ແລະ ຈັດ​ສັນ​ທິ່​ດິນ​ການ​ຜະ­ລິດ​ໃຫ້​ປະ­ຊາ­ຊົນ ພ້ອມ​ນີ້ ກໍ​ໄດ້​ສຳ­ເລັດ​ບັນ­ດາ​ໂຄງ­ການ​ຟື້ນ​ຟູ​ໄລ­ຍະ​ສັ້ນ​ສຸກ​ເສີນ ແລະ ຮີບ​ດ່ວນ ເປັນ­ຕົ້ນ ການ​ສ້ອມ­ແປງ ແລະ ກໍ່­ສ້າງ​ບັນ­ດາ​ເສັ້ນ­ທາງ ຂົວ ລະ­ບົບ​ຊົນ­ລະ­ປະ­ທານ ໂຮງ­ຮຽນ ໂຮງ­ໝໍ ຫ້ອງ­ການ ສຳ­ນັກ­ງານ ແລະ ອື່ນໆ.

ຂ່າວທີ່ກ່ຽວຂ້ອງ