ຊາວໜຸ່ມຕາມຮອຍກອງພັນທີ 2 ວີລະຊົນຜ່າວົງປິດລ້ອມທີ່ທົ່ງໄຫຫີນຊຽງຂວາງ

920 13 ມິ.ຖ. 2019 ຂ່າວໜ້າ​ໜຶ່ງ
ຊາວໜຸ່ມຕາມຮອຍກອງພັນທີ 2 ວີລະຊົນຜ່າວົງປິດລ້ອມທີ່ທົ່ງໄຫຫີນຊຽງຂວາງ

    ຄາ​ລາ​ວານ​ຊາວ​ໜຸ່ມ​ລາວ​ທົ່ວ​ປະ­ເທດ ເດີນ​ຕາມ​ຮອຍ​ກອງ­ພັນ​ທີ 2 ວີ­ລະ​ຊົນ​ຜ່າ​ວົງ​ປິດ​ລ້ອມ​ຂອງ​ສັດ­ຕູ​ຢ່າງ​ມີ​ໄຊ ຄົບ­ຮອບ 60 ປີ ຢູ່​ແຂວງ​ຊຽງ​ຂວາງ ຈັດ​ຂຶ້ນ​ວັນ​ທີ 10 ມິ­ຖຸ­ນາ 2019 ນຳ​ໂດຍ​ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ (ຊປປ ລາວ) ໂດຍ​ການ​ເຂົ້າ​ຮ່ວມ​ຂອງ​ທ່ານ ທອງ​ສະ​ຫວັດ ໄຂ​ຄຳ​ພິ­ທູນ ອະ­ດີດ​ນັກ­ຮົບ​ວິ­ລະ​ຊົນ​ກອງ­ພັນ​ທີ 2 ທ່ານ​ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ໜຸ່ມ​ແຫ່ງ​ຊາດ ບັນ­ດາ​ເລ­ຂາ ຮອງ​ເລ­ຂາ​ຊາວ​ໜຸ່ມ​ຈາກ​ກະ­ຊວງ ອົງ­ການ ແຂວງ.

    ຂະ​ບວນ​ໄດ້​ນຳ​ກະ­ຕ່າ​ດອກ​ໄມ້ ໄປ​ວາງ​ຢູ່​ອະ­ນຸ­ສອນ​ສະ­ຖານ​ປະ­ທານ ໄກ­ສອນ ພົມ­ວິ­ຫານ ຜູ້­ນຳ​ທີ່​ເຄົາ­ລົບ​ຮັກ ເພື່ອ​ສະ­ແດງ​ຄວາມ​ຮູ້​ບຸນ­ຄຸນ ແລະ ເຄົາ­ລົບ ກ່ອນ​ຈະ​ອອກ​ເດີນ­ທາງ​ສູ່​ຈຸດ­ໝາຍ​ທົ່ງ​ໄຫ​ຫີນ​ແຂວງ​ຊຽງ​ຂວາງ ໂດຍ​ໄດ້​ຮັບ​ການ​ຕ້ອນ­ຮັບ​ຂອງ​ທ່ານ ຄຳ​ແສງ ພົມ​ມະ​ວັນ ຄະ­ນະ​ປະ­ຈຳ​ພັກ​ແຂວງ ຜູ້​ຊີ້​ນຳ​ອົງ​ການ­ຈັດ­ຕັ້ງ​ມະ­ຫາ­ຊົນ ພ້ອມ​ທັງ​ໄດ້​ໄຂ​ພິ­ທີ​ຂຶ້ນ​ຢູ່​ສະ­ຖານ­ທີ່​ຈຳ­ລອງ​ກອງ­ພັນ​ທີ 2 ທົ່ງ​ໄຫ​ຫີນ​ຊຽງ​ຂວາງ.

    ທ່ານ ອາ​ລຸນ​ໄຊ ສູນ​ນະ­ລາດ ກ່າວ​ວ່າ: ຜ່ານ​ການ​ຫວນ​ຄືນ​ເຫດ­ການ​ຕົວ​ຈິງ​ຈາກ​ທ່ານ ທອງ​ສະ​ຫວັດ ໄຂ​ຄຳ​ພິ­ທູນ ຢູ່​ເທິງ​ພູ​ພຽງ​ຊຽງ​ຂວາງ ແຜ່ນ­ດິນ​ວີ­ລະ​ຊົນ​ອັນ​ແສນ​ຮັກ ເວົ້າ​ສະ­ເພາະ ຢູ່​ເຂດ​ສະ­ໝໍ­ລະ­ພູມ​ທົ່ງ​ໄຫ​ຫີນ​ແຫ່ງ​ນີ້ ພວກ​ເຮົາ​ຕົວ​ແທນ​ຊາວ​ໜຸ່ມ​ລາວ​ໄດ້​ມາ​ເຕົ້າ­ໂຮມ​ກັນ ເພື່ອ​ຫວນ​ຄືນ​ເຫດ­ການ​ປະ­ຫວັດ­ສາດ​ມູນ­ເຊື້ອ​ການ​ຜ່າ​ວົງ​ປິດ​ລ້ອມ​ຂອງ​ສັດ­ຕູ​ຂອງ​ກອງ­ພັນ​ທີ 2 ວີ­ລະ​ຊົນ​ຢູ່​ທົ່ງ​ໄຫ​ຫີນ 60 ປີ ຄືນ​ເຖິງ​ເຫດ­ການ​ໄດ້­ແກ່​ຍາວ​ກໍ​ຕາມ ແຕ່​ມະ­ໂນ­ພາບ​ທັງ​ໜົດ​ຍັງ​ຕິດ​ຫ້ອຍ​ໃນ​ຈິດ​ສຳ­ນຶກ​ຂອງ​ປະ­ຊາ­ຊົນ​ລາວ ກໍ​ຄື ຊາວ​ໜຸ່ມ​ລາວ​ບັນ­ດາ­ເຜົ່າ​ຢ່າງ​ແກະ​ບໍ່​ອອກ ພວກ​ເຮົາ​ຍັງ​ສຳ­ນຶກ​ເຫັນ​ພະ­ນັກ­ງານ​ທະ­ຫານ ນັກ­ຮົບ​ປະ­ຕິ­ວັດ ພ້ອມ​ຄອບ­ຄົວ​ກອງ­ພັນ​ທີ 2 ຈຳ­ນວນ 1.500 ຄົນ ທີ່​ຖືກ​ສັດ­ຕູ​ປິດ​ລ້ອມ ແມ່ນ​ບໍ່​ໄດ້​ມີ​ເສລີ­ພາບ ການ­ເຄື່ອນ­ໄຫວ​ຖືກ​ຈຳ­ກັດ ເສດ­ຖະ­ກິດ ຊີ­ວິດ​ການ​ເປັນ​ຢູ່​ຫຍຸ້ງ­ຍາກ​ຂາດ­ເຂີນ ສ່ຽງ​ເປັນ​ສ່ຽງ​ຕາຍ ເມື່ອ​ຖືກ​ປິດ​ລ້ອມ​ແລ້ວ​ພວກ​ສັດ­ຕູ​ໄດ້​ໃຊ້​ຫຼາຍ​ຮູບ​ການ ແລະ ວິ­ທີ​ການ​ຫຼາຍ​ລ່ຽມ ເພື່ອ​ເຮັດ​ໃຫ້​ນັກ­ຮົບ​ກອງ­ພັນ​ທີ 2 ຍອມ​ຈຳ­ນົນ ແຕ່​ດ້ວຍ​ແນວ­ທາງ​ອັນ​ສະ­ຫຼາດ​ສ່ອງ​ໃສ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ດ້ວຍ​ຍຸດ​ທະ​ສາດ​ອັນ​ອົງ­ອາດ​ກ້າ­ຫານ ເດັດ­ດ່ຽວ​ໜຽວ​ແໜ້ນ ແລະ ບໍ່​ຍອມ​ຈຳ­ນົນ​ຂອງ​ນັກ­ຮົບ​ກອງ­ພັນ​ທີ 2 ຈຶ່ງ​ເຮັດ​ໃຫ້​ນັກ­ຮົບ​ກອງ­ພັນ​ທີ 2 ແລະ ຄອບ­ຄົວ 1.500 ຄົນ ສາ­ມາດ​ອອກ​ໄປ​ໄດ້​ຢ່າງ​ມະ­ຫັດ­ສະ­ຈັນ.

    ການ​ຈັດ​ຄາ​ລາ​ວານ​ຄັ້ງ​ນີ້ ມີ​ຄວາມ​ໜາຍ​ສຳ­ຄັນ​ຕໍ່​ການ​ສຶກ​ສາ​ອົບ­ຮົມ ປູກ​ຈິດ​ສຳ­ນຶກ​ໃຫ້​ຊາວ​ໜຸ່ມ​ລາວ​ບັນ­ດາ­ເຜົ່າ ໃນ​ການ​ສ້າງ​ສະ­ຕິ​ຄວາມ​ຮັກ​ຊາດ ຮັກ​ບ້ານ​ເກີດ​ເມືອງ​ນອນ ຮັກ​ພໍ່-ແມ່ ອາວ-ອາ ມີ​ຄວາມ​ຈົງ​ຮັກ​ພັກ­ດີ​ຕໍ່​ປະ­ເທດ​ຊາດ ເດັດ­ດ່ຽວ​ໜຽວ​ແໜ້ນ​ໃນ​ອຸ­ດົມ​ການ​ຂອງ​ພັກ-ລັດ ເຮັດ​ໃຫ້​ຊາວ​ໜຸ່ມ​ຮຸ່ນ​ປັດ­ຈຸ­ບັນ ຮັບ​ຮູ້ ແລະ ເຂົ້າ­ໃຈ​ເຖິງ​ນ້ຳ­ໃຈ​ອັນ​ອົງ­ອາດ​ກ້າ­ຫານ ບຸກ​ບືນ​ຜ່ານ​ຜ່າ​ພາ­ຍຸ​ລົມ­ແດງ ແລະ ອຸ­ປະ­ສັກ​ນາໆ​ປະ­ການ ບໍ່​ຍອມ​ຈຳ­ນົນ​ຂອງ​ສັດ­ຕູ ແລະ ຖື​ສິດ­ຜົນ­ປະ­ໂຫຍດ​ຂອງ​ຊາດ​ຂອງ​ສ່ວນ​ລວມ ສູງ​ເໜືອກ​ວ່າ​ຜົນ​ປະ­ໂຫຍດ​ຂອງ​ສ່ວນ​ຕົວ ເດີນ​ຕາມ​ຮອຍ​ກອງ­ພັນ​ທີ 2 ວີ­ລະ​ຊົນ​ຜ່າ​ວົງ​ປິດ​ລ້ອມ​ຂອງ​ສັດ­ຕູ ເດີນ​ຕາມ​ທາງ​ອັນ​ສະ­ຫຼາດ​ສ່ອງ​ໃສ​ຂອງ​ພັກ ເດີນ​ຕາມ​ທັດ­ສະ­ນະ​ແນວ​ຄິດ​ຄຸນ­ສົມ­ບັດ​ສິນ​ທຳ​ປະ­ຕິ­ວັດ​ຂອງ​ນັກ­ຮົບ​ກອງ­ພັນ​ທີ 2 ເດີນ​ຕາມ​ຄວາມ​ອົງ­ອາດ​ກ້າ­ຫານ ສະ­ຫຼາດ ແລະ ບໍ່​ຍອມ​ຈຳ­ນົນ​ຕໍ່​ສັດ­ຕູ ສະ­ຫຼາດ​ຄ່ອງ​ແຄ້ວ ນີ້ມ​ນວນ​ມີ​ໄຫວ​ພິກ ເພື່ອ​ເອົາ​ຊະ­ນະ​ສັດ­ຕູ​ໄດ້​ຢ່າງ​ມີ​ໄຊ.

ຂ່າວທີ່ກ່ຽວຂ້ອງ