ສ ​ເກົາຫຼີ ​ແລະ ​ອັງກິດ​ບັນລຸ​ຂໍ້​ຕົກລົງ​ດ້ານ​ຫຼັກການ​ກ່ຽວ​ກັບ FTA

742 13 ມິ.ຖ. 2019 ຂ່າວຕ່າງປະເທດ
ສ ​ເກົາຫຼີ ​ແລະ ​ອັງກິດ​ບັນລຸ​ຂໍ້​ຕົກລົງ​ດ້ານ​ຫຼັກການ​ກ່ຽວ​ກັບ FTA

     ທ່ານ ຢູ ມຽງ ຮີ ລັດຖະມົນຕີ​ກະຊວງ​ການ​ຄ້າ ສ ເກົາຫຼີ ແລະ ທ່ານ ລຽມ ​ຟອສ ລັດຖະມົນຕີ​ກະຊວງ​ການ​ຄ້າ​ສາກົນ​ຂອງ​ອັງກິດ ຖະແຫຼງ​ເມື່ອ​ວັນ​ທີ 10 ມິຖຸນາ​ນີ້​ວ່າ ໄດ້​ບັນລຸ​ຂໍ້​ຕົກລົງ​ທາງ​ດ້ານ​ຫຼັກການ ກ່ຽວ​ກັບ​ສັນຍາ​ການ​ຄ້າ​ເສລີ (FTA) ລະຫວ່າງ ສ ເກົາຫຼີ ກັບ ອັງກິດ.

    ເຖິງ​ວ່າ​ເລື່ອງ​ອັງກິດ ຖອນ​ອອກ​ໄປ​ຈາກ​ສະຫະພາບ​ເອີ​ຣົບ (EU) ຫຼື​ທີ່​ເອີ້ນ​ວ່າ Brexit ໂດຍ​ທີ່​ບໍ່​ບັນລຸ​ຂໍ້​ຕົກລົງ​ໃດໆ​ກໍ​ຕາມ ແຕ່ ສ ເກົາຫຼີ ແລະ​ອັງກິດ ຍັງ​ຄົງ​ສາມາດ​ນຳ​ໃຊ້​ນະໂຍບາຍ​ພິເສດ​ກ່ຽວ​ກັບ​ພາສີ ກັບ​ສິນຄ້າ​ຂອງ​ກັນ​ແລະ​ກັນ ຢູ່​ໃນ​ລະດັບ​ທີ່​ຄ້າຍໆ​ຄື​ກັນ​ກັບ​ປັດຈຸບັນ. ໃນ​ນັ້ນ ສິນຄ້າ​ປະເພດ​ລົດຍົນ ແລະ​ອາ​ໄຫຼ່​ລົດຍົນ ຈະ​ໄດ້​ສົ່ງ​ອອກ​ດ້ວຍ​ລະດັບ​ພາສີ 0% ແທນ​ທີ່​ຈະ​ແມ່ນ 10% ແລະ 4,5% ຕາມ​ລຳດັບ. ນອກຈາກ​ນັ້ນແລ້ວ ສອງ​ປະເທດ​ກໍ​ເຫັນ​ດີ​ເປັນ​ເອກະສັນ​ກັນ ໃນ​ການ​ຮັບ​ຮູ້​ສິນຄ້າ​ທີ່​ວິ​ສາ​ຫະ​ກິດ​ຂອງ​ສອງ​ຝ່າຍ​ຜະລິດ ດ້ວຍ​ວັດຖຸ​ດິບ​ຂອງ EU ວ່າ​ເປັນ​ສິນຄ້າ​ທີ່​ມີ​ທີ່​ມາ​ຢູ່​ໃນ​ພາກ​ພື້ນ ດ້ວຍ​ກຳນົດ​ເວລາ 3 ປີ.

    ກ່ຽວ​ກັບ​ບັນຫາ​ການ​ຂົນສົ່ງ ສອງ​ປະເທດ​ຮັບ​ຮູ້​ສິນຄ້າ​ທີ່​ຂົນສົ່ງ​ໂດຍ​ຜ່ານ EU ວ່າ​ເປັນ​ການ​ຂົນສົ່ງ​ໂດຍ​ກົງ​ພາຍ​ໃນ​ເວລາ 3 ປີ ແລະ ວິ​ສາ​ຫະ​ກິດ​ຂອງ ສ ເກົາຫຼີ ສາມາດ​ນຳ​ໃຊ້​ບັນດາ​ພື້ນຖານ​ການ​ຂົນສົ່ງ​ຢູ່​ໃນ EU.

    ອັງກິດ ເປັນ​ຄູ່​ຮ່ວມ​ດ້ານ​ການ​ຄ້າ​ໃຫຍ່​ອັນ​ດັບ​ທີ​ສອງ​ຂອງ ສ ເກົາຫຼີ ຢູ່​ໃນ EU. ຂະໜາດ​ການ​ຄ້າ​ແບບ​ສອງ​ຝ່າຍ ໃນ​ປີ 2018 ບັນລຸ 12,24 ຕື້​ໂດ​ລາ​ສະຫະລັດ. ໂດຍ​ສະເພາະ​ແລ້ວ ໃນ​ປີ 2018 ສ ເກົາຫຼີ ສົ່ງ​ອອກ​ລົດຍົນ​ໄປ​ຍັງ EU ເປັນ​ຍອດ​ມູນ​ຄ່າ 1.600 ຕື້​ວອນ (ເທົ່າ​ກັບ 1,35 ຕື້​ໂດ​ລາ​ສະຫະລັດ).

ຂ່າວທີ່ກ່ຽວຂ້ອງ