WB ໃຫ້​ຄວາມ​ຊ່ວຍເຫຼືອ​ຫວຽດນາມ ໃນ​ການ​ກໍ່ສ້າງ​ພື້ນຖານ​ໂຄງ​ລ່າງ​ໃນ 4 ຕົວ​ເມືອງ

474 14 ມິ.ຖ. 2019 ຂ່າວຕ່າງປະເທດ
WB ໃຫ້​ຄວາມ​ຊ່ວຍເຫຼືອ​ຫວຽດນາມ ໃນ​ການ​ກໍ່ສ້າງ​ພື້ນຖານ​ໂຄງ​ລ່າງ​ໃນ 4 ຕົວ​ເມືອງ

   ຂ່າວສານ​ຫວຽດນາມ ລາຍ​ງານ​ວ່າ ຄະນະ​ອຳນວຍ​ການ​ບໍລິຫານ​ຂອງ​ທະນາຄານ​ໂລກ (WB) ໄດ້​ຮັບຮອງ​ບ້ວງ​ເງິນ​ສິນ​ເຊື່ອ ມູນ​ຄ່າ 194,36 ລ້ານ​ໂດ​ລາ​ສະຫະລັດ ເພື່ອ​ແນໃສ່​ຊ່ວຍເຫຼືອ 4 ຕົວ​ເມືອງ​ທີ່​ມີ​ຂະໜາດ​ປານ​ກາງຂອງ​ຫວຽດນາມ ໃນ​ການ​ກໍ່ສ້າງ​ພື້ນຖານ​ໂຄງ​ລ່າງ​ທີ່​ຈຳເປັນ​ຈຳນວນ​ໜຶ່ງ ແລະ​ເພີ່ມ​ທະວີ​ກຳລັງ​ຄວາມ​ສາມາດ ໃນ​ການ​ວາງ​ແຜນ​ກຳນົດ​ຕົວ​ເມືອງ.

    4 ຕົວ​ເມືອງ​ດັ່ງກ່າວ​ຂອງ​ຫວຽດນາມ ປະກອບ​ດ້ວຍ ກີ່​ແອັງ (ແຂວງ​ຮ່າ​ຕິງ) ຕິ້ງ​ຢາ (ແຂວງ​ແທັງ​ຮວ້າ) ຫາຍ​ເຢືອງ (ແຂວງ​ຫາຍ​ເຢືອງ) ແລະ​ອຽນ​ບ້າຍ (ແຂວງ​ອຽນ​ບ້າຍ). ຄາດ​ວ່າ​ບັນດາ​ການເຄື່ອນໄຫວ​ຂອງ​ໂຄງການ  ຈະ​ນຳ​ມາ​ຊຶ່ງ​ຜົນ​ປະໂຫຍດ​ໂດຍ​ກົງ ໃຫ້​ແກ່​ປະຊາຊົນ​ທີ່​ອາໄສ​ຢູ່​ໃນ​ພື້ນ​ທີ່​ຕົວ​ເມືອງ​ເຫຼົ່ານັ້ນ ປະມານ 200.000 ຄົນ ໃນ​ນັ້ນ​ມີ​ກວ່າ​ເຄິ່ງ​ໜຶ່ງ ເປັນ​ແມ່ຍິງ.

    ໂຄງການ​ດັ່ງກ່າວ ຈະ​ຊ່ວຍ​ຫຼຸດຜ່ອນ​ຄວາມ​ສ່ຽງ​ເກີດ​ນ້ຳ​ຖ້ວມ ແກ້​ໄຂ​ເງື່ອນໄຂ​ການ​ອະນາໄມ​ສິ່ງແວດລ້ອມ ຫຼຸດຜ່ອນ​ເວລາ​ການ​ເດີນທາງ​ໄປ​ມາ​ຂອງ​ປະຊາຊົນ ຕາມ​ເສັ້ນທາງ​ທີ່​ໄດ້​ຮັບ​ການ​ປົວແປງ ແລະ​ກໍ່ສ້າງ​ໃໝ່ ຊ່ວຍເຫຼືອ​ການ​ກໍ່ສ້າງ​ພູມ​ພາບ​ສາທາລະນະ​ທີ່​ມີ​ຄຸນ​ນະ​ພາບ​ສູງ ແລະ ​ອື່ນໆ.

    ຍອດ​ຄ່າ​ໃຊ້​ຈ່າຍ​ໃຫ້​ແກ່​ໂຄງການ​ດັ່ງກ່າວ ຢູ່​ທີ່ 276,17 ລ້ານ​ໂດ​ລາ​ສະຫະລັດ ໃນ​ນັ້ນ 194,36 ລ້ານ​ໂດ​ລາ​ສະຫະລັດ ຈະ​ໄດ້​ຮັບ​ການ​ຊ່ວຍເຫຼືອ​ຈາກ​ແຫຼ່ງ​ທຶນ ຂອງ​ສະມາຄົມ​ການ​ພັດທະນາ​ສາກົນ (IDA).

ຂ່າວທີ່ກ່ຽວຂ້ອງ