ຍີ່ປຸ່ນ​ວາງ​ຄາດໝາຍ​ເຮັດ​ໃຫ້ການ​ປ່ອຍ​ແກ​​ັສ​ໄປ​ສູ່​ເລກ 0 ພາຍ​ໃນ​ເຄິ່ງ​ທ້າຍ​ສະຕະວັດ​ທີ 21

439 14 ມິ.ຖ. 2019 ຂ່າວຕ່າງປະເທດ
ຍີ່ປຸ່ນ​ວາງ​ຄາດໝາຍ​ເຮັດ​ໃຫ້ການ​ປ່ອຍ​ແກ​​ັສ​ໄປ​ສູ່​ເລກ 0 ພາຍ​ໃນ​ເຄິ່ງ​ທ້າຍ​ສະຕະວັດ​ທີ 21

    ເມື່ອ​ວັນ​ທີ 11 ມິຖຸນາ​ນີ້ ຄະນະ​ລັດຖະບານ​ຍີ່ປຸ່ນ ໄດ້​ຮັບຮອງ​ແຜນການ​ຫຼຸດ​ການ​ປ່ອຍ​ແກ​​ັສ ທີ່​ເຮັດ​ໃຫ້​ເກີດ​ປະກົດ​ການເຮືອນ​ແກ້ວ ໃຫ້​ລົງ​ໄປ​ເທົ່າ​ກັບ 0 ພາຍ​ໃນ​ເຄິ່ງ​ທ້າຍ​ສະຕະວັດ​ທີ 21. ແຜນການ​ນີ້ ເປັນ​ສ່ວນ​ໜຶ່ງ​ຢູ່​ໃນ​ຍຸດ​ທະ​ສາດ​ແຫ່ງ​ຊາດ​ຂອງ​ຍີ່ປຸ່ນ ໃນ​ການ​ຕ້ານ​ກັບ​ສະພາບ​ດິນ​ຟ້າ​ອາກາດ​ປ່ຽນແປງ.

    ເພື່ອ​ໃຫ້​ບັນລຸ​ຄາດໝາຍ​ດັ່ງກ່າວ ຍີ່ປຸ່ນ​ຈະ​ສຸມ​ໃສ່​ການ​ໃຊ້​ບັນດາ​ແຫຼ່ງ​ພະລັງງານ​ໝູນວຽນ ເຊັ່ນ​ພະລັງງານ​ແສງ​ຕາເວັນ ແລະ ພະລັງງານ​ແຮງ​ລົມ ໃນ​ຂະນະ​ທີ່​ຍັງ​ຄົງ​ຮັກສາ​ການ​ໃຊ້​ບັນດາ​ໂຮງງານ​ໄຟຟ້າ​ຖ່ານ​ຫີນ​ເອົາ​ໄວ້. ໃນ​ຂະນະ​ດຽວ​ກັນ ຍີ່ປຸ່ນ​ກໍ​ຍັງ​ຈະ​ຂຶ້ນ​ກັບ​ໂຮງງານ​ໄຟຟ້າ​ນີວ​ເຄລຍ ແມ້​ກະ​ທັ້ງ​ວ່າຄວາມ​ກັງວົນ​ກ່ຽວ​ກັບ​ຄວາມ​ປອດ​ໄພ​ຂອງ​ບັນດາ​ໂຮງງານ​ໄຟຟ້າ​ນີວ​ເຄລຍ​ຍັງ​ມີ​ຢູ່ ຫຼັງ​ຈາກ​ທີ່​ເກີດ​ໄພພິບັດ​ແຜ່ນດິນ​ໄຫວ ແລະ ​ສຶ​ນາ​ມິ​ຢູ່​ໃນ ຟູ​ກູ​ຊີ​ມາ ເມື່ອ​ປີ 2011. ຍຸດ​ທະ​ສາດ​ດັ່ງກ່າວ ກໍ​ຮຽກຮ້ອງ​ໃຫ້​ເພີ່ມ​ທະວີ​ການ​ນຳ​ໃຊ້​ພະລັງງານ​ແກ​​ັສ ຮີ​ໂດຣ (hydro) ແນໃສ່​ຫຼຸດຜ່ອນ​ການ​ຂຶ້ນ​ກັບໄຟ​ຟ້າ​ນີວ​ເຄລຍ  ເພື່ອ​ຫຼຸດຜ່ອນ​ການ​ໃຊ້​ພະລັງງານ​ປະເພດ​ນີ້ ແລະ​ ເພື່ອ​ພັດທະນາ​ບັນດາ​ເຕັກ​ໂນ​ໂລ​ຊີ​ທີ່​ກ້າວໜ້າ.

    ຄາດ​ວ່າ ຍີ່ປຸ່ນ ຈະ​ແນະນຳ​ຍຸດ​ທະ​ສາດ​ດັ່ງກ່າວ ຢູ່​ໃນ​ສະຫະ​ປະຊາ​ຊາດ ພາຍ​ໃນ​ທ້າຍ​ເດືອນ​ມິຖຸນາ​ນີ້ ຊຶ່ງ​ເປັນ​ເວລາ​ທີ່​ຍີ່ປຸ່ນ​ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດ ຂອງ​ກຸ່ມ​ບັນດາ​ພື້ນຖານ​ເສດຖະກິດ​ພັດທະນາ ແລະ​ ເກີດ​ໃໝ່​ແຖວ​ໜ້າ​ຂອງ​ໂລກ (G20).

    ສັນຍາ​ປາ​ຣີ​ວ່າ​ດ້ວຍ​ສະພາບ​ດິນ​ຟ້າ​ອາກາດ​ປ່ຽນແປງ ໄດ້​ຮັບ​ການ​ຮັບຮອງ​ຈາກ​ເກືອບ 200 ປະເທດ​ໃນ​ໂລກ ເມື່ອ​ປີ 2015 ໂດຍ​ວາງ​ຄາດໝາຍ​ຈຳກັດ​ລະດັບ​ເພີ່ມ​ຂຶ້ນ​ຂອງ​ອຸ່ນ​ຫະ​ພູມ​ທົ່ວ​ໂລກ ແຕ່ 1,5-2 ອົງສາ C ເມື່ອ​ທຽບໃສ່​ກ່ອນ​ຍຸກ​ອຸດສາຫະກຳ. ຍີ່ປຸ່ນ ແລະ​ອີ​ຕາ​ລີ ເປັນ​ສອງ​ປະເທດ​ທີ່​ຍັງ​ເຫຼືອ​ຢູ່​ໃນ​ກຸ່ມ​ບັນດາ​ພື້ນຖານ​ເສດຖະກິດ​ພັດທະນາ​ແຖວ​ໜ້າ​ຂອງ​ໂລກ (G7) ທີ່​ຍັງ​ບໍ່​ໄດ້​ປະກາດ​ເຖິງ​ຍຸດ​ທະ​ສາດ ກ່ຽວ​ກັບ​ການ​ຕ້ານ​ການ​ປ່ຽນແປງ​ສະພາບ​ດິນ​ຟ້າ​ອາກາດ.

ຂ່າວທີ່ກ່ຽວຂ້ອງ