ຂ່າວຫຼ້າສຸດ

ທາງໄປວັດໝອງ ທາງໄປໜອງກ້ຽງ

3.264 14 ມິ.ຖ. 2019 ນານາສາລະ

    ຜູ້​ຂຽນ​ມີ​ໂອ­ກາດ​ເຂົ້າ​ຮ່ວມ​ປະ­ຊຸມ​ຟັງ​ຄວາມ​ຄິດ​ເຫັນ ຈາກ​ພະ­ນັກ­ງານ​ຂັ້ນ​ເທິງ ມີ​ບາງ​ທ່ານ​ເພິ່ນ​ຊີ້​ທັດ­ສະ­ນະ​ວ່າ ບ້ານ​ເຮົາ​ທຸກ​ມື້­ນີ້​ໃຜ​ກະ​ແລ່ນ­ນຳ​ເສດ­ຖະ­ກິດ​ປາກ​ທ້ອງ ຈົນ​ລືມ​ທາງ​ໄປ​ວັດ​ກໍ​ເສົ້າ­ໝອງ ແຕ່​ທາງ​ໄປ​ໜອງ​ຫາ​ຢູ່​ຫາ​ກິນ​ຜັດ​ກ້ຽງ ເລື່ອງ​ນີ້​ມັນ​ສະ­ທ້ອນ​ໃຫ້​ເຫັນ​ວ່າ ຍາມ​ໃດ​ກໍ​ຕາມ ຖ້າ​ເຮົາ​ຖື​ເບົາ​ເລື່ອງ​ສິນ​ທຳ ແລະ ຮີດ­ຄອງ​ຍ່ອມ​ໜີ​ບໍ່​ມົ້ມ​ຄວາມ​ສັບ­ສົນ​ວຸ້ນ­ວາຍ​ເກີດ​ຂຶ້ນ​ໃນ​ຄອບ­ຄົວ ແລະ ສັງ­ຄົມ ຍົກ​ຕົວ­ຢ່າງ ການ​ເວົ້າ​ເລື່ອງ​ສິດ​ສະ­ເໝີ­ພາບ​ຫຼາຍ​ຄົນ​ກໍ​ຮຽກ­ຮ້ອງ ແຕ່​ເຮົາ​ຍັງ​ຂາດ​ການ​ຕົງ​ຕໍ່​ເວ­ລາ ເຊິ່ງ​ເບິ່ງ​ຄື​ວ່າ​ໄປ​ໜ້າ​ແຕ່​ລືມ​ຫຼັງ ຫຼື ໄດ້​ເຕົ່າ​ຜັດ​ເສຍ​ແລນ.

    ການ​ຂາດ​ສິນ​ທຳ​ປະ­ຈຳ​ໃຈ ມັນ​ສະ­ແດງ​ອອກ​ຢູ່​ຫຼາຍ​ບ່ອນ ເຊິ່ງ​ການ​ມີ​ກົດ­ໝາຍ​ຫຼາຍ​ສະ­ບັບ​ຮັບ­ປະ­ກັນ ໃຫ້​ຄົນ​ປະ­ພຶດ​ຖືກ­ຕ້ອງ​ຖື​ເປັນ​ເລື່ອງ​ດີ ສາ­ກົນ​ກໍ​ເຮັດ​ກັນ ແຕ່​ຖ້າ​ສ່ວນ​ເລິກ​ຂອງ​ຫົວ­ໃຈ​ຄົນ​ຂາດ​ສິນ​ທຳ (ຫຼັກ​ທຳ​ມະ) ເຖິງ​ຈະ​ມີ​ກົດ­ໝາຍ​ຫ້າມ​ໄວ້ ຄົນ​ເຮົາ​ກໍ​ລະ­ເມີດ​ໄດ້ ເຊັ່ນ: ອຸ­ບັດ­ເຫດ​ລົດ​ຕຳ​ກັນ ເຊິ່ງ​ມີ​ຫຼາຍ​ຄັ້ງ​ທີ່​ລົດ​ຕຳ​ກັນ​ເພາະ​ຄົນ​ໃນ​ສັງ­ຄົມ​ເຫັນ­ແກ່​ໂຕ ບໍ່​ຍອມ​ຫຼີກ​ໃຫ້​ກັນ ຂາດ​ຫຼັກ​ທຳ​ມະ​ປະ­ຈຳ​ໃຈ ຄື: ຄວາມ​ເມດ​ຕາ ເອື້ອ­ເຟື້ອ ພວກ​ເຮົາ​ຄວນ​ຄິດ​ໃຫ້​ເຫັນ​ສາ­ເຫດ​ບາງ​ປະ­ເດັນ ເຊັ່ນ: ຜູ້​ຂຽນ​ມີ​ຄຳ​ຖາມ​ວ່າ ເປັນ​ຫຍັງ​ພະ­ພຸດ­ທະ­ເຈົ້າ​ຈຶ່ງ​ສອນ​ທຳ​ມະ​ເພີ່ມ​ເຕີມ ເຂົ້າ​ມາ​ຄຽງ​ຄູ່​ກັບ​ວິ­ໄນ​ໃຫ້​ພະ­ສົງ ຖື​ເປັນ​ຫຼັກ­ການ​ດຳ­ເນີນ​ຊີ­ວິດ ທັງໆ​ທີ່​ພະ­ສົງ​ໄດ້​ຊື່­ວ່າ​ເປັນ​ຜູ້​ເຊື່ອ​ຟັງ ແລະ ປະ­ຕິ­ບັດ​ຕາມ​ວິ­ໄນ​ຂອງ​ຕົນ ເຫດ­ຜົນ​ກໍ​ເພື່ອ​ໃຫ້​ທຳ​ມະ​ເປັນ​ແນວ­ທາງ​ອົບ­ຮົມ​ແນວ​ຄິດ​ຈິດ­ໃຈ ເອື້ອ­ເຟື້ອ​ເພື່ອ​ແຜ່​ໃຫ້​ຄົນ​ໃນ​ສັງ­ຄົມ​ເມດ​ຕາ​ຕໍ່​ກັນ.

    ເວ­ລາ​ພະ­ພຸດ­ທະ­ເຈົ້າ​ສອນ​ເລື່ອງ​ສິນ 5 ຂໍ້​ໃຫ້​ປະ­ຕິ­ບັດ ຂະ­ນະ​ດຽວ​ກັນ​ກໍ​ມີ​ຫຼັກ​ທຳ​ມະ​ອີກ 5 ຂໍ້​ໃຫ້​ປະ­ຕິ­ບັດ​ຄູ່​ກັນ ເອີ້ນ​ວ່າ ມະ­ນຸດ­ສະ­ທຳ ທັດ­ສະ­ນະ​ສ່ວນ​ຕົວ​ຜູ້​ຂຽນ ຈຶ່ງ​ເຫັນ​ວ່າ​ມີ​ກົດ­ໝາຍ​ອອກ​ມາ​ຄວບ​ຄຸມ​ພຶດ­ຕິ​ກຳ​ນັ້ນ​ຖື​ເປັນ​ສິ່ງ​ທີ່​ດີ ແຕ່​ຖ້າ​ເຮົາ​ເຊີດ​ຊູ​ສິນ​ທຳ ແລະ ຮີດ­ຄອງ​ປະ­ເພ­ນີ​ອັນ​ເປັນ​ພູມ​ຄຸ້ມ​ກັນ​ທາງ​ດ້ານ​ຈິດ­ໃຈ​ຂອງ​ຄົນ​ລາວ​ມາ​ແຕ່​ອະ­ດີດ ຄົງ​ເປັນ​ທາງ​ຄູ່​ຂະ­ໜານ​ພໍ​ໃຫ້​ຄົນ​ໃນ​ສັງ­ຄົມ ໄດ້​ຮູ້­ຈັກ​ນຳ​ເອົາ​ສິ່ງ​ເຫຼົ່າ​ນີ້​ມາ​ຄິດ​ພິ­ຈາ­ລະ­ນາ​ໃນ​ຄອບ­ຄົວ ແລະ ພຶດ­ຕິ​ກຳ​ສະ­ແດງ​ອອກ​ໃນ​ສັງ­ຄົມ ແຕ່​ຖ້າ​ຈະ​ຖື​ເອົາ​ຄຳ​ຕອບ​ດຽວ​ວ່າ ຂ້ອຍ​ເຮັດ​ດີ ເຮັດ​ຖືກ​ຕາມ​ກົດ­ໝາຍ​ແລ້ວ​ກໍ​ພໍ ນີ້​ຄົງ​ເປັນ​ຄຳ​ເວົ້າ​ທີ່​ໃຊ້​ໄດ້​ພຽງ​ແຕ່​ໃນ​ບາງ​ໂອ­ກາດ ຍົກ​ຕົວ­ຢ່າງ: ເວ­ລາ​ມີ​ບາງ​ຄະ­ດີ​ຂຶ້ນ​ສານ ຖ້າ­ວ່າ​ພະ­ນັກ­ງານ​ສານ​ຂາດ​ຈັນ​ຍາ​ບັນ ແລະ ສິນ​ທຳ​ປະ­ຈຳ​ໃຈ ຄື: ອະ­ຄະ­ຕິ 4 ປະ­ການ ກໍ​ຄົງ​ເຮັດ​ໃຫ້​ເລື່ອງ​ຖືກ​ກາຍ­ເປັນ​ເລື່ອງ​ຜິດ​ໄດ້ ດັ່ງ­ນັ້ນ ຜູ້​ຂຽນ​ຈຶ່ງ​ເຫັນ​ວ່າ: ຄັນ​ໄປ​ໜ້າ​ນຳ​ສາ­ກົນ​ເຂົາ​ເຮົາ​ກະ​ບໍ່​ຄວນ​ລືມ​ຂອງ​ເກົ່າ ບາງ​ອັນ​ທີ່​ດີ​ຄຽງ​ຄູ່​ກັບ​ສັງ­ຄົມ​ລາວ​ມາ​ດົນ​ນານ​ນັ້ນ ຄື: ສິນ​ທຳ ແລະ ຮີດ­ຄອງ​ປະ­ເພ­ນີ...!

    ເຮົາ​ຈະ​ເຮັດ​ແນວ­ໃດ ບໍ່​ໃຫ້​ທາງ​ໄປ​ວັດ​ມັນ​ໝອງ ແລະ ທາງ​ໄປ​ໜອງ​ບໍ່​ໃຫ້​ເສົ້າ ເຊິ່ງ​ຜູ້​ຂຽນ​ຂໍ​ຝາກ​ເພື່ອນ​ຜູ້​ອ່ານ​ຄິດ​ນຳ​ກັນ​ນໍ ! ເພາະ​ຖ້າ​ຄົນ​ໃນ​ສັງ­ຄົມ​ຂາດ​ເມດ​ຕາ​ທຳ​ເມື່ອ​ໃດ ຄົນ​ຜູ້​ນັ້ນ​ກໍ​ຈະ​ເຫັນ­ແກ່​ໂຕ​ທັນ­ທີ !.

ຂ່າວທີ່ກ່ຽວຂ້ອງ